1 Kiinoo 29 - Kafa Linguistics Project

Yaafee Kexo Shuuneyemmoyich Giddeti Wojjoo

¹ Taatoo Daawiti iitoo bullich ishichiye: “Doono Yeeri kaacciti ta bushoo Solomooni batt ariyaani bushoone; ebi hakkeyemmi kexo ashi taatee kexo tuneyaanoon Nuggishoo Doono Yeerichi yaafee kexo bi tunetoyich, shuunoo maggoone.

² Ebich tawoo taach hakkeetoommon ta Nuggishoo kexoyich qiicoon qanniito taane; aachee qiicoyich aachoon, birewee qiicoyich birewoon, gooshee qiicoyich gooshoon, xuuree qiicoyich xuuroon, michi qiicoyich mixon, wodde shohaamoonaa baribare aaxxe xaqqeenaꞌonon, baribare malletechi xaqqeenaꞌon, bi shaahi shaahoochee aaxxe xaqqoonaa nacce xaqqoonon qanniito taane.

³ Ta Nuggishoo kexon ta shunnetoyich, ebi yaafee kexoyich ta qanniito bulliyee beshoon, ta hajjoo tuneti aachoonaa birewoonoochee ta Nuggishoo kexoyich immeto taane.

⁴ Ikke balle hume kiilo giraamee Ofiiree aachoonaa gutte ballaa aabbe kiilo giraamee birewoonon yaafee kechi duuho dikkeyemmonaa

⁵ shuunee ariyechinaꞌo shuunemmi qiiceenaꞌo bullinoyich immeto taane; and illa ittoshi daggoochee bi qelloon Doono Yeerich yaafemmo konine?” iye.

⁶ Aroochee yaree ukkireenaꞌo, yoodee iraasheenaꞌo, humee iraasheenaꞌo, ballee iraasheenaꞌonaa taatoochi shuunee iraasheenaꞌona boonoshi mullee daaggoona immiyeete.

⁷ Doono Yeerichi yaafee kechi shuunoyich boonoshi immito, balli shabe hume kiilo giraamee aachoo, keejje ballaa aabbe hume kiilo giraamee birewoo, shiritte ballaa hiye hume kiilo giraamee gooshoonaa keejje miliyoonaa awudde balle hume kiilo giraamee xuuroonane.

⁸ Aaxxe xaqqo biich beeti asho bulli Gerishoonee ashoo Yehiꞌeelichi kishoona Doono Yeerichi yaafee kechi ginjabeetooch giijjiye.

⁹ Asheenaꞌo boonoshi hajjee daaggoona boonoshi immitoyich, boonoshi ceeni mulloona Doono Yeerich boonoshi giddiitoyich, emiriyeete. Taatoo Daawitiyoo oogichii emiriye.

Daawiti Doono Yeerin Galleto

¹⁰ Daawiti iitoo bulli aafoochaa Doono Yeerin ishichiꞌi galletehe: “No qaabbechi Israꞌeelichi Nuggishoo Doono Yeero, bulli yemeenoochee bulli yemeenooch, galleto neech bede.

¹¹ Doono Yeero, shimaayoonaa showoonooch beeto bulli neecho bi tunetoyich, oogo, giidoo, oogee yiiroonaa wudoona neechone; taatittinoo neechone. Newoo bulliyee beshiti taatoo neene.

¹² Gaannoonaa oogoona daneebeeto ne waaneeniye; newoo bullin hajjito neene; asho koninolla oogiyoyich, hakkoonoo imoyich, hakkoonaa giidoona ne kishoochiye.

¹³ No Nuggishoocho, andoo neen galletehone; ooge ne shigoonoo naadiyone.

¹⁴ “Bulliyona daneto ne waaneeniye. Neech no immetoo ne kishoochee no deqqeton baachiye. Ebi bullin no giddiyemmoyich ta koni taane? Ta asheenaꞌochi konoshine?

¹⁵ Nowoo, wonnee no qaabbechinaꞌochoommon ne aafooch shiqqoonaa iibboona noone. No yemeeno showee toommooch gibeneyaani yiirittoommone.

¹⁶ No Nuggishoo Doono Yeero, yaafe ne shigoyich yaafee kexon hagoyich, ebi woddiyaꞌa no kicito bulli ne kishoochee danetone; bulliyoo neechone.

¹⁷ Ta Nuggishoocho, mulloon haattaabeeto ne tunoonaa kaamittinoon shunnaabeeto ne tunoonon ariyaabeeto taane. Tawoo ebi bullin ta immeto gaawe daaggoonaa kaame mulloonane. Andoo hiniich beeti ne asheenaꞌo gaawe boonoshi daaggoona emiroona boonoshi imon beeggeto taane.

¹⁸ No qaabbechi Abrahami, Yisaaqinaa Israꞌeelinochi Nuggishoo Doono Yeero, ebi gaboo bulli yemeenoon ne asheenaꞌo mullooch bi beeyemmon tuniibe; boonoshi mulloonoo ne waan wochibe.

¹⁹ Ne geteenaꞌon, ne qociyoonaa ne doyoonon bi quyemmoyich, ta qanniiti qiiceenaꞌona yaafee kexon bi haggemmoyichoo ta bushoo Solomoonich ceeni mulloon imbe” iye.

²⁰ Aroochee Daawiti iitoo bullin, “Ittoshi Nuggishoo Doono Yeerin galletebote” iye. Ebina iitoo bulli boonoshi qaabbechinaꞌochi Nuggishoo Doono Yeerin galleteheete; Doono Yeerinaa taatoonochi aafooch guufeꞌi goyinneheete.

Solomooni Taatoo Tuno Xalla Aricho

²¹ Bi dechara Doono Yeerich deejjoon deejjiyeete. Micciibeeti deejjoonoo Doono Yeerich deejjiyeete. Hume gubbenoo, hume ogooge bagee baaddoonaa hume gishiishi bagee baaddoonon, uyee deejjoonaa bare buuroona tookkii Israꞌeeleenaꞌo bullichi qoodoon woddiiꞌi giddiiheete.

²² Ebiyooba oogeti emiroona Doono Yeeri aafooch maa uchiyeete. Aroochee Daawiti bushoo Solomoonin wochinnoon taatiiheete. Taatoo bi tunemmoyichoo Doono Yeerichi shigoona huuttiyeete. Sadooqinoo qeeshoo bi tunemmoyich huuttiyeete.

²³ Solomooniyoo bi nihoo Daawitichi keroon Doono Yeeri manjiiti taatee qeenooch kotehe. Biichoo mooyo kaamehe; Israꞌeeleenaꞌo bulliyoo biich deꞌa iꞌi hajjeeheete.

²⁴ Ukkireenaꞌo bulli, ginee naayinaꞌonaa taatoo Daawiti bushiisheenaꞌo bullina taatoo Solomoonich gibeneetinaꞌo boonoshi tunoon xiishiyeete.

²⁵ Doono Yeeriyoo Solomoonin Israꞌeeleenaꞌo bulli aafoochaa oogichiꞌi oogiihe. Biyee aaf taateti Israꞌeelee taateenaꞌoyich bi imaani oogee yiiroon biich immiye.

Qaminona Giddeti Daawitichi Taatee Yemeeno

²⁶ Iseyi bushoo Daawiti Israꞌeelee showoo bulliich taatehe.

²⁷ Israꞌeeleenaꞌo toommooch bi taateti yemeeno aabbe natone. Kebiroon beechii shabaatte naton, Yerusaalem beechii shaashaa keejje naton taatehe.

²⁸ Gaannoonaa oogoonon daneꞌi, geenee baayeꞌi qitiye. Bi bushoo Solomooniyoo bi xaaꞌooch kereeꞌi taatehe.

²⁹ Taatoo Daawiti shuuneti shuunoo, batti battichoochee tiijjii ciireexooch beddaahaa, yaaꞌechi Saameelichi kiinooch, keemechi Naataanichi kiinoonaa yaaꞌechi Gaadichi kiinoonooch kooreetone.

³⁰ Ebi arooch kooreeto, bi taatee yemeenooch bi tuniiti mooyo, oogeti giidecho bi tuno, bi toommooch tuneti mooyo, Israꞌeelee showooch tuneti mooyonaa Israꞌeelee showee guudoona beeti taatittino bullinochi toommooch tuneti mooyonane.