1 Kiinoo 28 - Kafa Linguistics Project

Yaafee Kexo Shuuneyemmi Yamoon Daawiti Imo

¹ Daawiti Israꞌeelee iraashoo bullin, Yerusaalem kiciye. Eboshiyoo: Yoodee iraasheenaꞌo, taatee showee shuunoon shuuneebeeti iraasheenaꞌo, humee iraasheenaꞌo, ballee iraasheenaꞌo, taatoonaa bi bushiisheenaꞌonochi yaaphoonaa gijjoonochi toommooch iraasheti iraasheenaꞌo, taatee kechi iraasheenaꞌonaa giidechi beelle ginee naayinaꞌonone.

² Aroochee taatoo Daawiti tiyii neexeechii ishichiye: “Ta maneenaꞌonaa ta asheenaꞌonote, hach ellebote; Doono Yeerichi wogee taabooto kotemmonaa no Nuggishoochi baatoo kashemmonoyich kexon hagga ta mulloona gabiyoye; shuunoyichoo qaawii beeton qanniihoye.

³ Tunebaani Yeeri, ‘Ginee asho ne tunetoyich, damoonoo ne ukkitoyich ta beeyemmi kexon taach hagaachemmo neene’ iye.

⁴ “Israꞌeelee Nuggishoo Doono Yeeri ta yaroo bulliichee Israꞌeeleenaꞌo toommooch bulli yemeenoon no taatemmoyich taannaa ta shiijjeroonon kaaccitone. Yihudin iraashoo bi tunemmoyich kaacciye. Yihudi yaroochee ta nihoochi kechi asheenaꞌon kaacciye. Ta nihoochi bushiishoochee Israꞌeelee showoo bulliich taan taatiyoyich shunniye.

⁵ Doono Yeeri meeti bushiishoon taach immitone; ta bushiishoo bulliichee Israꞌeelee showooch taateree Doono Yeerichi taatittinee showoon bi qeejjemmoyich Solomoonin kaaccitone.

⁶ Taachoo ishichiye: ‘Ta bushoo bi tunemmoyich biin ta kaaccetoyich, ta yaafee kexonaa bi addibaaboonon shuunemmo ne bushoo Solomoonine. Tawoo biich nihoo tunemmo taane.

⁷ And bi tunii beetoommon, ta geteenaꞌonaa ta sheereenaꞌonon kuxaanoon ceechii bi quyegaata, bi taatittinoon bulli yemeenoon manjiyemmo taane’ itone.

⁸ “Andoo Doono Yeerichi iitoo tuneti Israꞌeelee asho bulli ciinnii beetaa, Yeeriyoo waayee beetaa, ittoshi Nuggishoo Doono Yeerichi geto bullin ittoshi quyemmoyich ittoshich gettoye. Ebin ittoshi tuniigaata, hini ittoshi woraashiti gaawe showooch beeyemmo ittoshine; ittoshi shiijjeroyichoo woraashiyemmo ittoshine.

⁹ “Newoo ta bushoo Solomoono, Doono Yeeri, mullo bullin haattiibeeto bi tunetoyich, ashi gaboo bullinoo ariibeeto bi tunetoyich, ne nihoochi Nuggishoon ariibe; ceeni ne mulloona, ne hajjee daaggoonoo biich maddebe; biin ne qaawigaata danemmo neene; tunebaani biin ne qayigaata bulli yemeenoon neen qajjemmone.

¹⁰ Illa and, Doono Yeeri yaafee kexon biich ne haggemmoyich neen bi kaacon batteyaahine; kuppheree shuunebe” iye.

¹¹ Aroochee Daawiti bi bushoo Solomoonich yaafee kexo, ginjabeeto, kechi toommeexi kexinaꞌo, maaci gateenaꞌonaa axaaxoon maariyee guufo kotemmi xaaꞌoona shuuneyemmi yamoon immiye.

¹² Wotta Doono Yeerichi yaafee kechi addibaaboonaa bi guudoona beeti gato bullina, Yeerichi yaafee kechi qiicoonaa Yeerich kechiti mooyinaꞌonochi ginjabeeteenaꞌo shuuneyemmoyich bi gabiti yamoon immiye.

¹³ Qeesheenaꞌonaa Leweenaꞌona maddooch qoodeyee yamoon, Doono Yeerichi yaafee kechi maddoo bullichi yamoonaa Doono Yeerichi yaafee kechi maddooch heechemmi qiico bullin quyee yamoonon biich immiye.

¹⁴ Baribare maddoyich heechemmi qiiceenaꞌo shuuneyemmi aachoonaa birewoonoyich qeelloon immiye.

¹⁵ Qeelloon bi immito, maqirajjo bi ikkikkoonaa bi ceechee koteenaꞌonoyich tunemmi aachoyich, maqirajjo bi ikkikkoonaa bi ceechee koteenaꞌonoyich tunemmi birewoyich,

¹⁶ yaaree kosho kotemmi aachee madelloo bi ikkikkoonaa birewee madelloonoyich,

¹⁷ aachee gomeenaꞌo, quppe saaneenaꞌo, koddeenaꞌonaa birewee saaneenaꞌonoyichiye.

¹⁸ Wotta daakkiꞌi, xalle aachoochee shuuneyemmi ixaanee deejjee gudoonaa Doono Yeerichi wogee taabootoon boonoshi qoshoona qeremmi kiruubeenaꞌochi gaarina shuuneyemmi aachee qeelloon immiye.

¹⁹ Daawitiyoo, “Shuunoo aabichaa bi shuuneyemmo gaata ta ariyemmoyich, ebi bulli Doono Yeerichi kishoona kooreeꞌi taach icheehe” iye.

²⁰ Aroochee Daawiti bi bushoo Solomoonich ishichiye: “Illa kupphebe; maaci kuxo tunebe; shuunoonoo wonnibe; ta Nuggishoo Doono Yeeri neenna tookkii bi tunetoyich shattaahine; keqqiyaahine. Biyoo ebi yaafee kechi shuunoo ciiremmi wottoon neen qayaachemmone; neen dufaachemmone.

²¹ Doono Yeerichi yaafee kexooch maddemmi qeesheenaꞌonaa Leweenaꞌona guuphi guuphona qannitinaꞌone. Shuunoo bullin shuunoon ariyechi, wottoo boonoshi daaggoona shuuneebeeti asheenaꞌo bulli neenna tookkii beetinaꞌone. Iraasheenaꞌonaa asheenaꞌona bulli ne getoon ceechemminaꞌone” iye.