1 Kiinoo 26 - Kafa Linguistics Project

Yaafee Kechi Kellechinaꞌo Boonoshi Shuuni Shuunooch Neexo

¹ Yaafee kechi kellechinaꞌo shuunooch qoodeeto eechenane: Qoraahi gumbo Asaafichi kechi asheenaꞌoochee: Qoori bushoo Meshelemiyi;

² Meshelemiyi bushiisheenaꞌo: Bi gutenee bushoo Zakaariyaasi, guttinnoo Yediyaꞌeeli, keejjinnoo Zebaadiyi, awuddinnoo Yatineeli,

³ uuchinnoo Elaami, shirittinnoo Yehohanaaninaa shabaattinnoo Eliyehonayinane.

⁴ Doono Yeeri biin diiritoyich Obeed Edoomi shimitte anaami bushiishoon shiyihe; eboshiyoo: Bi gutenee bushoo Shemayaahi, guttinnoo Yehozabaadi, keejjinnoo Yoꞌaahi, awuddinnoo Sakaari, uuchinnoo Netaaneli,

⁵ shirittinnoo Ameli, shabaattinnoo Yisakoorinaa shimittinnoo Fuletaayinane.

⁶ Ebiyoommon wotta bi bushoo Shemayaahich anaami bushiisheenaꞌo beetinaꞌone. Boonoshiyoo gaawe ariyechinaꞌo boonoshi tunetoyich, boonoshi yareenaꞌo toommooch ukkireenaꞌone.

⁷ Shemayaahichi anaami bushiisheenaꞌo: Otini, Refaꞌeeli, Obeedinaa Elizabaadinane. Boonoshi maneenaꞌo Elihinaa Semakiyina wotta aricheti ariyechinaꞌone.

⁸ Obeed Edoomichi yareenaꞌo shichaa gutteenaꞌone. Boonoshichoo tuneba boonoshi anaami bushiisheenaꞌoyich, boonoshi maneenaꞌoyichoo shuunee shuunoyich gaawe ariyoo beetone.

⁹ Meshelemiyich gaawe ariyechi anaami bushiisheenaꞌonaa maneenaꞌona beetinaꞌone; boonoshiyoo aaraa shimitteenaꞌone.

¹⁰ Meraari gumboochee tuneti Hoosich anaami bushiisheenaꞌo beetinaꞌone. Shimiiri gutenee bushoo tuno bi qajjitaanona bi nihoo biin ukkiriihe.

¹¹ Bi hilloo Hiliqiyi, keejjinnoo Xebaliyi, awuddinnoo Zakaariyaasine. Hoosichi anaami bushiisheenaꞌonaa maneenaꞌona bulli aaraa keeminaꞌone.

¹² Kellechinaꞌo boonoshi ukkireenaꞌo kishooch tuneꞌi, boonoshi maneenaꞌochoommon Doono Yeerichi yaafee kechi shuunoon shuunoyich shuunee kaallo boonoshich beetone.

¹³ Kello bulliichaa boonoshi maddemmoyich, oogoo woyee giisho getteyaanoon boonoshi yari yaroona bullichona tate ixoo duppehe.

¹⁴ Aabi-keyo waani kellee ixoo Shelemaayin yechiye. Aroochee ciicon ariyechi bi bushoo Zakaariyaasich ixoon duppiyeete. Bi ixoo dambi-waani kelloon yechiye.

¹⁵ Deshi-waani ixoo Obeed Edoomin yechiye; qiicee kechi quyee shuunoo bi bushiisheenaꞌoyich ichehe.

¹⁶ Aabi-gimo waani kellee ixoonaa dambee gommooch beeti, Shaleketi getteebeeti kellee ixoona Shufiiminaa Hoosinon yechiye. Kello bi quyeebeeto kaalli kaalloonane.

¹⁷ Aabi-keyo waanaa shiritte kellechinaꞌo, dambi-waanaa awudde kellechinaꞌo, deshi-waanaa awudde kellechinaꞌo, qiicee kexooch wotta gutte Leweenaꞌo tuneꞌi qemi qemona quyee beeheete.

¹⁸ Aabi-gimo waan beeti addibaabee gommon awudde quyechinaꞌo, addibaaboonoo gutte quyechinaꞌo tuneꞌi quyee beeheete.

¹⁹ Meraarichi gumbeenaꞌonaa Qoraahichi gumbeenaꞌonoyich qoodeeti kellechinaꞌochi shuunoo ebine.

Yaafee Kechi Eche Maddoo

²⁰ Leweenaꞌo daggoochee Akiyi, Nuggishoo Yeerichi yaafee kechi ginjabeetoonaa yaafeeti qiiceenaꞌo koteebeeti kexinaꞌonooch ukkiroone.

²¹ Ladaanichi yareenaꞌo, Ladaan waanaa Gerishoonee asho tunetinaꞌo, wottoo Gerishoonee asho Ladaanichi yaree ukkireenaꞌo eboshine: Yehiꞌeeli,

²² Yehiꞌeelichi anaami bushiisheenaꞌo, Zetaaminaa bi manoo Yoꞌeelinane. Eboshiyoo Doono Yeerichi yaafee kechi ginjabeetee ukkireenaꞌone.

²³ Ukkireenaꞌo Amiraamee asheenaꞌo, Yitsaaree asheenaꞌo, Kebiroonee asheenaꞌonaa Uzeelee asheenaꞌonane.

²⁴ Muusi bushoochi bushoo, Gerishoomi bushoo Shebuꞌeeli ginjabeetooch ukkiroone.

²⁵ Gerishoomichi manoo Elezeer waanaa Elezeeri bushoo Rehaabiyi, Rehaabiyi bushoo Yeshaayi, Yeshaayi bushoo Yoraami, Yoraami bushoo Zikirinaa Zikiri bushoo Shelomotinane.

²⁶ Shelomotinaa bi maneenaꞌona, taatoo Daawiti, yaree ukkireenaꞌo, humee iraasheenaꞌo, ballee iraasheenaꞌonaa bi ginee iraasheenaꞌona kichiꞌi giddiiti yaafeeti qiiceenaꞌochi ukkireenaꞌone.

²⁷ Koyoochee daneti kecoochee qaton, Doono Yeerichi yaafee kexon andiriyoyich kichiyeete.

²⁸ Yaaꞌechi Saameeli, Qiishi bushoo Saaꞌooli, Neeri bushoo Abeneerinaa Tseruuyi bushoo Yoꞌaabina kichiti yaafee kechi qiico bulli beeto Shelomotinaa bi maneenaꞌonochi kishoochiye.

²⁹ Yitsaaree asho tuneti Kananiyinaa bi maneenaꞌona yaafee kexoyee maach beeti shuunooch Israꞌeeleenaꞌo toommooch iraasheenaꞌonaa nallechinaꞌonon tuneheete.

³⁰ Kebirooneenaꞌoochee Hashabiyinaa beelleenaꞌo tuneti, humaa shabaatte balle bi maneenaꞌona Yoordaanoosi aacoochaa aabi-gimo waan beeti Israꞌeelee showeexi, Doono Yeerichi shuunoo bullinaa taatoochi maddoonooch iraashetinaꞌone.

³¹ Kebirooneenaꞌoyichoo boonoshi yareenaꞌochi shiijjeree mazgaboommona Yeriyi boonoshi ukkiroone. Daawiti bi taateti aabbinnee natooch bi mazgaboochee qaawiꞌi, Gilaadee showooch Yazeer, Kebirooneenaꞌo daggoochee beelle asheenaꞌon danehe.

³² Daawitiyoo gutte humaa shabaatte balle beelleenaꞌo tuneti yaree ukkireenaꞌon Yeriyichi xibeenaꞌoochee kaacciꞌi, Roobeeli, Gaadinaa Minaasinochi yoodee qatochi showooch beeti, Doono Yeerichonaa taatoochona tuneti moochi toommooch iraashiihe.