1 Kiinoo 22 - Kafa Linguistics Project

¹ Aroochee Daawiti ishichiye “Nuggishoo Doono Yeerichi yaafee kexo hiniich tunemmone; Israꞌeeleenaꞌo micciibeeti deejjoon giddiyemmi deejjee gudo hiniich tunemmone” iye.

Yaafee Kexon Shuunoyich Qanniti Mooyo

² Israꞌeelee showooch beeti shiqqeenaꞌo ikkooch boonoshi kiceyemmoyich Daawiti gettiye. Boonoshi daggoocheenoo yaafee kexo shuuneyemmi xaqqoon baddemminaꞌon kichiye.

³ Uxeree kellee shaaqqoo shuuneyemmi misimaaroonaa maaxaafoonoyich tunemmi wodde xuuroonaa bi woddoochee tiyitona machoona qoco hakkeyaani gooshoonon qanniihe.

⁴ Ebiyoommon wotta Sidoonee asheenaꞌonaa Xiroosee asheenaꞌona biich boonoshi deebitoyich dofee yigee mixon qanniihe.

⁵ Daawiti ishichiye: “Ta bushoo Solomooni batt ariyaani giisheche bushoone; Doono Yeerich shuuneyemmi yaafee kexo oogiichi worganikkito, showee toommo bulliich bi woroo waayeeto tuno qaawiihe. Ebich bulli mooyon biich qanniyemmo taane” iye. Ebina Daawiti bi gettitoommon bi qitoyee shiichiꞌi wodde mooyon qanniihe.

⁶ Aroochee bi bushoo Solomoonin ceeggiꞌi, Israꞌeelee Nuggishoo Doono Yeerichi yaafee kexon bi shuunemmoyich gettiye.

⁷ Daawitiyoo Solomoonich ishichiye: “Ta bushoocho, ta Nuggishoo Doono Yeerichi shigoyich kexon hagga ta mulloona gabiyoye;

⁸ tunebaani Doono Yeeri taach ishichiye: ‘Ne, meeti ashi damoon ukkito neene; meeti koyoonoo koyeto neene; ta aafooch meeti ashi damoon ne ukkitoyich, ne taach kexon hagaachemmo neene;

⁹ tunebaani diggee asho tunemmi bushoo neech shiijjemmone; bi guudoona beeti bi etto bulliichee biin kashiyemmo taane; bi taatee yemeeno bulliich Israꞌeeleenaꞌoyich diggoonaa tooqqii kashoonon immemmo ta tunetoyich, bi shigo Solomooni getteyemmone.

¹⁰ Taach kexon haggemmo biine. Biyoo taach bushoon tunemmone; tawoo biich nihoon tunemmo taane. Bi taatee qeenonoo bulli yemeenooch Israꞌeeleenaꞌo toommooch manjiyemmo taane’ iye.

¹¹ “Andoo ta bushoocho, Doono Yeeri neenna tookki tunebe; neechon bi gibenikkitoommon, ne Nuggishoo Doono Yeerichi kexon ne haggemmoyich neech kaachibe.

¹² Israꞌeeleenaꞌo toommooch neen bi iraashiihooba, ne Nuggishoo Doono Yeerichi getoon ne ceechemmoyich Doono Yeeri ariyoonaa shalligoonon neech imbe.

¹³ Doono Yeeri Muusina bi immiti sheeroonaa qociyoonon manjiyaꞌa ne quyegaata, mooyo neech kaamemmone. Kupphebe; maac kuxo tunebe; shattaahine; ne gibenoon kuxxaahine.

¹⁴ “Doono Yeerichi yaafee kexoyich bi tunemmoyich, keejje miiliyoonaa awudde balle hume kiilo giraamee aachoon, shaashaa awudde miiliyoonee kiilo giraamee birewoon, bi meetoochee tiyitona machoona qocaa hakkeyaani gooshoonaa xuuroonon qanniito taane; ebichi toommooch wotta xareeti mixonaa xaqqoonon qanniito taane. Newoo arooch daakkibe.

¹⁵ Meeti shuunechinaꞌo, eboshiyoo xaqqoon xariꞌi kotiyechinaꞌo, anaaxeenaꞌonaa baribare shuunee ariyechinaꞌona neech beetinaꞌone.

¹⁶ Aachoon, birewoon, gooshoonaa xuuroonon shuunoona aricheti asheenaꞌo neech beetinaꞌone; tiyiree shuunebe; Doono Yeeri neenna tookki tunebe” iye.

¹⁷ Aroochee Daawiti bi bushoo Solomoonin boonoshi gaachemmoyich Israꞌeelee ukkireenaꞌoyich ishichiꞌi gettiye.

¹⁸ “Ittoshi Nuggishoo Doono Yeeri and beddaahaa ittoshina tookkiiniye. Ittoshi etto bulli waanee ittoshin kashiitone. Hini showooch beeti asheenaꞌon ta kishooch beshiiꞌi immitone. Showoo Doono Yeerinaa bi asheenaꞌonoyich hajjeetone.

¹⁹ Andoo ittoshi Nuggishoo Doono Yeer waan wottoyich ittoshi mulloonaa ittoshi gaboonon ikkochibote; tiyiree Nuggishoo Doono Yeerichi yaafee kexon ittoshi hagaa, Doono Yeerichi wogee taabootoonaa yaafeeti yaafee kechi qiiceenaꞌona Doono Yeerichi shigoyich hakkemmi yaafee kexooch gibeete” iye.