1 Kiinoo 21 - Kafa Linguistics Project

Daawiti Israꞌeeleenaꞌon Haddiyoo

¹ Sheexaanoo Israꞌeeleenaꞌo toommooch tiyiꞌi, Daawiti Israꞌeeleenaꞌon haddiyemmoyich tuniihe.

² Daawitiyoo Yoꞌaabinaa bi ginee iraasheenaꞌonon, “Hamiree Beershaabee Daan beddaahaa beeti Israꞌeeleenaꞌon haddibote; ambicheenaꞌo gaata ta ariyemmoyich taach getote” iye.

³ Tunebaani Yoꞌaabi ishichiye: “Doono Yeeri bi asheenaꞌo haddoon andichoyee balle kishoon beshiibe; taatoo ta doonocho, bulliyona ne guuninaꞌo tooneenaꞌone? Taatoo ta doonocho, ebin tuniyoona Israꞌeeleenaꞌon xuꞌechinaꞌo ne tuniyemmo amoyichiye?” iye.

⁴ Tunebaani taatoo bi getoon Yoꞌaabi toommooch manjiihe; ebina biyoo kechii hammiye; Israꞌeelee showoo bulliich bi guudditoyee gubb Yerusaalem wottehe.

⁵ Yoꞌaabiyoo koyoyich bedditi asheenaꞌochi haddoon Daawitich gettiye. Goraadoon kaaccii koyoyich hakkoo boonoshich beeti asheenaꞌo, Israꞌeelee showoo bulliichee ikke miliyoonaa balle humeenaꞌo, Yihudee showoochee wotta awudde ballaa shabe humeenaꞌo tuneheete. Eboshiyoo goraadoon kaaccii koyoon hakkitinaꞌone.

⁶ Tunebaani Yoꞌaabi ebi taatoochi getoon bi shixxitoyich, Lewi yoodoonaa Biiniyaami yoodoonon haddaanoone.

⁷ Ebi mooyo Yeerin emirikkaano bi tunetoyich Yeeri Israꞌeeleenaꞌon naxehe.

⁸ Aroochee Daawiti Yeerich ishichiye: “Ebi mooyon tuniyoona oogeti axaaxoon shuuneto taane; ne guuno ta gondoon ne maaremmoyich neen qollehoye. Mullaalli ashi shuunoon shuuneto taane” iye.

^9-10 Doono Yeeri Daawitichi yaaꞌecho tuneti Gaadich ishichiye: “Hamiree Daawitich ishichibe: ‘Doono Yeeri ishichiye: “Keejje mooyon neech goommeto taane; aroochee ikkoon ne kaaccemmona, aroon tuniyemmo taane” itone’ gete” iye.

¹¹ Ebich Gaadi Daawit waan hammii, Doono Yeeri gettiton biich gettiꞌi, ishichii biin echehe:

¹² “Keejje nati shaacoo ne showooch giba? Woyee keejje agenee wottoon ne etteenaꞌo neen yoohi dabbi beetaa, boonoshi aafoochee woci beeyenne? Woyee keejje qemi wottoon Doono Yeerichi goraadoona, ebi geto qeqqichiibeeti biiyoona wuxii aalliibeeti maraakoon Israꞌeelee showoo bulliich deejjiba? Ebi mooyon gaawichi gabiree taach ne getee, taan wocheto waan daambona” iye.

¹³ Aroochee Daawiti Gaadich ishichiye: “And oogeton xuuxeto taane. Bi wodde maarecho bi tunetoyich, Doono Yeerichi kishooch dihoo taach gaawiye. Tunebaani ashi kishooch dihoon qaawaache” iye.

¹⁴ Ebina Doono Yeeri Israꞌeeleenaꞌo toommooch qeqqichiibeeti biiyoon deejjiye; Israꞌeeleenaꞌo daggoochee shabe hume asheenaꞌo ciireheete.

¹⁵ Aroochee wotta Doono Yeeri Yerusaalemin bi aalliyemmoyich maraakoon deejjiye. Maraakoo katemoon aalliiya bi geton Doono Yeeri beeggiꞌi, ebi tuneebeeti gonde mooyoyich ayiniye. Ebi aalliibeeti maraakoon, “Beddiye; ne kishoon wochibe” iye. Areegaata, are maraakoo neexeꞌi bi beeto Yebusee asho Orinaanichi maayi buchi xaaꞌoochiye.

¹⁶ Daawiti kaama ciinniꞌi, Doono Yeerichi maraakoo Yerusaalemi toommooch goraadoon kaaccii yechiꞌi shimaayoonaa showoonochi daggooch neexeꞌi bi beetaa beeggiye. Aroochee Daawitinaa ogoogeenaꞌona dookoon taheꞌi showooch baroona guufeheete.

¹⁷ Daawiti Yeerich ishichiye: “Asheenaꞌo haddeyemmoyich getteto ta toone? Axaaxoon shuuneto, xuqqetoo taane; tunebaani hini bagoommi asheenaꞌo amoonolla tuniyaaneenaꞌone. Ta Nuggishoo Doono Yeero, taannaa ta nihoochi kechi asheenaꞌonon baach naxebani, ne asheenaꞌon ne naxeyaachemmoyich neen qollehoye” iye.

¹⁸ Aroochee Doono Yeerichi maraakoo Gaadich, “Daawiti, damba Yebusee asho Orinaanichi maayi buchi xaaꞌooch hami, Doono Yeerich deejjee gudoon bi shuunemmoyich gete” iye.

¹⁹ Daawitiyoo Doono Yeeri Gaadina biich gettitoommon tuniiya damba hammiye.

²⁰ Orinaani teepphoon buchiibee gubb wottee ciinniꞌi, maraakoon beeggiye. Biinna tookkii beeti awudde bi anaami bushiisheenaꞌo woccii aasheheete.

²¹ Orinaani Daawiti bi waan womon beeggiye. Biyoo maayi buchi xaaꞌoochee kechii hammiꞌi, baroona showooch guufeꞌi taatoyich oogoon immiye.

²² Daawitiyoo Orinaanich, “Asheenaꞌo toommooch kinditi naxo neexemmoyich, ne maayi buchi xaaꞌoon taach ne kemaa, Doono Yeerich deejjee gudoon arooch shuunebona. Tawoo ceeni bi gatiyoon qoccemmo taane” iye.

²³ Aroochee Orinaani Daawitich ishichiye: “Baad deꞌe; taatoo ta doono neech gaaweton tuneꞌi bekketon tuniibe. Micciibeeti deejjoyich gatteenaꞌon, qaaqqoon shoohoyich maayi buchi qiicoon, maayi buuroyichoo teepphoon immemmo taane; bullinolla immemmo taane” iye.

²⁴ Tunebaani taatoo Daawiti Orinaanich, “Ebi tuneyaache; ceeni bi gatiyoon qoccemmo taane; gatiyoon qocaanoon neechon Doono Yeerich deejjoon giddiyaache” iye.

²⁵ Ebich Daawiti Orinaanich ebi maayi buchi xaaꞌoyich shiritte balle sheqeelee aachoon qocciye.

²⁶ Daawiti arooch, Doono Yeerich deejjee gudoon shuuneꞌi, micciibeeti deejjoonaa ikkittinee deejjoonon giddiihe. Doono Yeerinoo qollehe; Doono Yeeriyoo deejjee gudee toommooch beeti deejjoon maayemmi qaaqqoon shimaayoochee deejjoona bi qolloon waayehe.

²⁷ Aroochee Doono Yeeri maraakoyich gettiye; maraakoo goraadoon bi gonenooch wochiye.

²⁸ Ebiyooba Daawiti Doono Yeeri Yebusee asho Orinaanichi maayi buchi xaaꞌoochaa bi qolloon bi waayoon beeggiꞌi, are xaaꞌoochaa deejjoon deejjiye.

²⁹ Barahoochaa Muusi shuuneti Doono Yeerichi yaafee duukkaanoonaa micciibeeti deejjoo giddeebeeti deejjee gudoona arooba Gibeꞌooni guudi toommeexi goyinnee xaaꞌooch beetone.

³⁰ Daawiti Doono Yeerichi maraakoochi goraadoon bi shattitoyich arooch hammiꞌi Doono Yeerin echoon hakkaanoone.