1 Kiinoo 20 - Kafa Linguistics Project

Daawiti Raabin Kochii Yesho

¹ Nato shaddeebeeti yemeenooch taateenaꞌo koyooch hammiibeeti aabooba, Yoꞌaabi bi ginee naayinaꞌon yechii hammiꞌi Amoonee showoon kochiye. Hammiꞌi Raabin giichiye. Tunebaani Daawiti Yerusaalem echetone. Yoꞌaabi Raabin kochii aalliihe.

² Daawitiyoo boonoshi taatoochi gubbichoon bi qelloochee kindii daammiye. Ebi gubbichoo shaashaa awudde kiilo giraamee aachoona shuuneetone; bi toommoochoo aaxxe xaqqo beetone; ebinoo Daawitichi qellooch ukiiheete. Daawitiyoo are katemoochee wodde mooyon keccii daammiye.

³ Arooch beeti asheenaꞌon kichii daammiꞌi, magaazoona, kootteroonaa qofiyona shuunoon boonoshi shuunemmoyich tuniihe. Daawiti Amooneenaꞌochi katemoo bulliichoo ebiyoommon tuniihe. Aroochee Daawitinaa bi ginee naayinaꞌo bullina Yerusaalem wotteheete.

Filsixeemeenaꞌona Koyeeti Koyo

⁴ Ebiyee gubb, Filsixeemeenaꞌona tookkii Gezeeri katemoochaa koyo koyeehe; ebiyooba Hushatechi Sibekayi Refayee yaroochee tuneti Sifayin wuxiye. Filsixeemeenaꞌonoo kochii wochiyeete.

⁵ Wotta wochinnoon Filsixeemeenaꞌona tookkii koyo koyeehe. Yaꞌiiri bushoo Elihanaani qoreddee shippechochi waanjoommi (shobboommi) ginee yaabechi, Gaatee asho Gooliyaadichi manoo Lahimin wuxiye.

⁶ Wotta wochinnoon Gaataa koyo koyeehe. Bi kishoonaa bi baatoonooch shiritti shiritte yapherechi, bulli hiyaa awudde yapherechi, hakka ooge ikke uro beehe. Biyoo Rafayimee yaroone.

⁷ Ebi uro Israꞌeeleenaꞌon coonehe; Daawitichi manoo Shimeꞌi bushoo Yonaataani biin wuxiye.

⁸ Eboshi Gaat beeti Rafayimee yareenaꞌone. Boonoshinoo Daawitinaa bi asheenaꞌona wuxiyeete.