1 Kiinoo 19 - Kafa Linguistics Project

Daawiti Amooneenaꞌonaa Sooriyeenaꞌonon Koyo

¹ Ebiyee gubb, Amoonee taatoo Nahaashi qitiye. Bi bushoo Hanuuni bi xaaꞌooch kereeꞌi taatehe.

² Daawitiyoo, “Bi nihoo taach deeti deꞌoommon, bi bushoo Hanuunich deemo taach qaawiihe” iye. Ebina bi nihoochi eefon bi cacheyoon boonoshi gettemmoyich, Daawiti bi wocheyechinaꞌon daachiihe. Daawiti asheenaꞌo Amoonee showooch hammiꞌi Hanuun waan shaggiyeete.

³ Tunebaani Amoonee iraasheenaꞌo Hanuunich ishichiyeete: “Daawiti ebi cacheyechinaꞌon ne waan bi deejjito, ne aabbin oogiiꞌi neech shaahii beete? Asheenaꞌo ne waan boonoshi waato, showoon bi kochemmoyich, qiidi boshe boonoshi beeggemmoyich toone?” iyeete.

⁴ Ebich Hanuuni Daawiti asheenaꞌon yechiꞌi, boonoshi ishaanoon caggiye. Boonoshi tahoon shimetoochaa maaccii, shokkaachoon echiiꞌi daachiihe.

⁵ Boonoshiyoo oogichiꞌi yeelleheete. Daawiti ebin waayeꞌi, wocheyechinaꞌon boonoshi waan daachiihe. Biyoo, “Ittoshi ishaanoo diccimmi wottoon, Yaarika yagibote; aroyee gubb wottemmo ittoshine” iye.

⁶ Hanuuninaa Amooneenaꞌona Daawitina tiyaareetinaꞌo boonoshi tunoon ariiꞌi, Mesopotaamee, Araam Maꞌakinaa Tsobaahinoochee gaarinaꞌonaa hareshechinaꞌonon kirayoyich shaashaa awudde hume kiilo giraamee birewoon daachiiheete.

⁷ Aroochee shaashaa gutte hume gaarinaꞌon, wottoo Maꞌakee taatoonaa bi ginee naayinaꞌonon gijjoona kiraayeheete. Boonoshiyoo waaꞌi Medeebi katemee ciinooch kaamboon geddiꞌi koteheete; Amooneenaꞌoo boonoshi katemi katemoochee koyooch kechiyeete.

⁸ Daawiti ebin waayeꞌi, Yoꞌaabin Israꞌeelee ginee naayinaꞌo bullina tookkii daachiihe.

⁹ Amooneenaꞌo kechiꞌi, katemee kellooch yaaroona neexeheete; boonoshin gaachoyich waati taateenaꞌoo boonoshi qell xalle gaddooch neexeheete.

¹⁰ Yoꞌaabiyoo aafinaa gubbina gino biin giichito tunoon ariihe; ebich Israꞌeelee ginee naayinaꞌo daggoochee arichetinaꞌon kaacciꞌi, Sooriyeenaꞌochi ciinooch neechiye.

¹¹ Echeti bi ginee naayinaꞌo toommooch bi manoo Abishayin ukkiriiꞌi, Amooneenaꞌochi ciinooch neechiye.

¹² Yoꞌaabiyoo ishichiye: “Sooriyeenaꞌo taan kochii wochigaata, waaree taan gaachebe; Amooneenaꞌo neen kochii wochigaata, ta neen gaachemmo taane.

¹³ Illa shataanoon kupphebone; no asheenaꞌonaa no Nuggishoochi katemeenaꞌonoyich kuppheree koyebone. Doono Yeeri bi daaggoon baach ceechibe” iye.

¹⁴ Aroochee Yoꞌaabinaa bi asheenaꞌona Sooriyeenaꞌon kocha boonoshi waan giddeheete. Sooriyeenaꞌoo boonoshi aafoochee wocee aalleheete.

¹⁵ Amooneenaꞌo Sooriyeenaꞌo wocee aalloon beeggiꞌi, boonoshiyoo Abishayi aafoochee woceꞌi katemooch wottee giyiyeete. Aroochee Yoꞌaabi Yerusaalem wotteꞌi hammiye.

¹⁶ Israꞌeeleenaꞌo boonoshin kochii wochoon Sooriyeenaꞌo beeggiyeete. Efiraaxisi aachee beqach beeti Sooriyeenaꞌo waan wochoon daachiiꞌi, boonoshi woyemmoyich tuniiheete. Boonoshi wulloo Hadadezeerichi ginee iraashoo Shobaakine.

¹⁷ Daawiti ebin waayeꞌi Israꞌeelee ginee naayinaꞌo bullin kiciye; biyoo Yoordaanoosin kimmiye. Aaf hammiꞌi boonoshi ciinoochaa koyee xaaꞌoon yechiye. Sooriyeenaꞌochi ciinooch yaaroona bi ginee naayinaꞌon neechiye. Boonoshiyoo biinna koyeheete.

¹⁸ Tunebaani Sooriyeenaꞌo Israꞌeeleenaꞌo aafoochee wocee aalleheete. Daawitinaa bi asheenaꞌona gaari toommoochaa tuneꞌi koyeebeeti shabaatte hume asheenaꞌonaa aabbe hume baatechinaꞌonon wuxiyeete. Ginee naayinaꞌochi iraashoo Shobaakinoo wuxiyeete.

¹⁹ Hadadezeerich hajjeebeeti taateenaꞌo bulli Israꞌeeleenaꞌo boonoshin kochii wochoon ariiheete; ebich Daawitina tookkii shuneꞌi biich hajjeeheete. Aroyee gubb, Sooriyeenaꞌo Amooneenaꞌon gaachemmon qajjiyeete.