1 Kiinoo 18 - Kafa Linguistics Project

Daawiti Bi Etteenaꞌon Kochii Wochoo

¹ Ebiyee gubb, Daawiti Filsixeemeenaꞌona koyeꞌi boonoshin kochii wochiye. Gaatinaa bi guudoona beeti gafeenaꞌonon boonoshi kishoochee deqqiye.

² Ebiyoommon wotta Moꞌabeenaꞌon kochii wochiye; ebina Moꞌabee asheenaꞌo Daawitich hajjeeꞌi biich gibiroon qocciyeete.

³ Daawiti Efiraaxisi aachi gaꞌooch beeti showoon koyi yecha bi hamiyooba, Tsobaahee taatoo Hadadezeerin Hamaat beddaahaa hammii kochiye.

⁴ Daawitiyoo hume gaarin, shabaatte hume hareshechi ginee naayinaꞌonaa hiye hume baatechi ginee naayinaꞌonon kecciye. Balle gaarin geechemmi haresheenaꞌon baach echiichii echetinaꞌo bullichi tingoon qeccee kuxxiye.

⁵ Damaasiqa beeti Sooriyeenaꞌo Tsobaahee taatoo Hadadezeerin gaacheya waataa, Daawiti boonoshi daggoochee hiyaa gutte hume asheenaꞌon wuxiye.

⁶ Aroochee Sooriyee showooch beeti Damaasiqa bi ginee kaamboon kotiihe. Ebina Sooriyeenaꞌo Daawitich hajjeeꞌi biich gibiroon qocciyeete. Doono Yeeriyoo Daawiti, bi hammito aabiichaanona wudoon bi danemmoyich tuniihe.

⁷ Daawiti Hadadezeerichi naayinaꞌo yechiibeeti, aachoochee shuuneeti gaacheenaꞌon deqqiꞌi Yerusaalem daammiye.

⁸ Wotta oogeton woddeti gooshoon Tibihaatinaa Kuunina getteebeeti Hadadezeerichi katemeenaꞌoochee daammiye. Solomooni gooshee goonoon, giimbeenaꞌonaa baribare gooshee qiiceenaꞌonon bi shuuneto ebi aroonane.

⁹ Hamaatee taatoo Tooꞌi, Daawiti Tsobaahee taatoo Hadadezeerichi ginee naayinaꞌo bullin kochii bi wochoon waayehe.

¹⁰ Hadadezeeri Tooꞌina tookkii meeti aaboon koyeebee echetone. Biyoo taatoo Daawitin bi diggiyemmonaa Hadadezeerin kochii bi wochitoyich biin bi galletemmonoyich bi bushoo Hadoraamin daachiihe. Hadoraamiyoo aachoochee, birewoonaa gooshoonoochee shuuneeti qiiceenaꞌon Daawitich deebiye.

¹¹ Taatoo Daawiti Edoomeenaꞌochi, Moꞌabeenaꞌochi, Amooneenaꞌochi, Filsixeemeenaꞌonaa Amaleeqeenaꞌonochi taatoo bulli waanee bi kecciti aachoonaa birewoona tookkii ebi qiiceenaꞌon wotta Doono Yeerich kichiye.

¹² Tseruuyi bushoo Abishayi aaraa shimitte hume Edoomee asheenaꞌon Kiikki bamboochaa wuxiye.

¹³ Biyoo Edoomee showooch ginee kaamboon kotiihe. Edoomeenaꞌo bulliyoo taatoo Daawitich hajjeeheete. Doono Yeeriyoo Daawiti bi hammito aabiichaanona wudoon bi danemmoyich tuniihe.

Daawitichi Iraasheenaꞌo

¹⁴ Daawitiyoo Israꞌeelee showoo bulliich taatehe; bi asheenaꞌo bullinoo tachiꞌi gaawe dayinnetoona qeejjiye.

¹⁵ Tseruuyi bushoo Yoꞌaabi bi ginee iraashoone. Ahiluudi bushoo Yoshafaaxi wotta kiinee koorechone.

¹⁶ Ebiyoommon wotta Akixuubi bushoo Sadooqinaa Abiyataari bushoo Abimeleekina qeesheenaꞌone. Shabiishiyoo taatoochi koorechone.

¹⁷ Yoyaadi bushoo Beenayi taatoochi quyee naayinaꞌo tuneti Kereeteenaꞌonaa Feleeteenaꞌonochi toommooch ukkiroone. Daawitichi anaami bushiisheenaꞌo wotta biyee desh iraasheenaꞌone.