1 Kiinoo 17 - Kafa Linguistics Project

Doono Yeeri Daawitich Gibenikkiti Gibeno

¹ Daawiti bi taatee kexooch bi kotetoyee gubb, keemechi Naataanich ishichiye: “Ta, yigee mixoochee hakkeeti kexooch beeto taane. Tunebaani Doono Yeerichi wogee taabooto duukkaanoochiye bi beeto” iye.

² Naataaniyoo Daawitich, “Yeeri neenna tookkii bi tunetoyich, ne mullooch beeto bullin tuniibe” iye.

³ Tunebaani aroobee xum Doono Yeeri Naataanich ishichiye:

⁴ “Ta guuno Daawit waan hamiree, Doono Yeeri ishichiye: ‘Ta beeyemmi kexon taach shuunemmo, ne toono neene.

⁵ Israꞌeeleenaꞌon Gibitsee ta kichiti aaboochee tiijjaꞌa hanaach beddaahaa, duukkaanoochee duukkaanooch, xaaꞌoochee xaaꞌooch, guuddaa beehoani, kexooch beetaano taane.

⁶ Israꞌeeleenaꞌo bullina tookkaa ta shaꞌeti xaaꞌoo bulliichaa, ta asheenaꞌo tuneti Israꞌeeleenaꞌon boonoshi quyemmoyich ta ukkiriiti ukkireenaꞌo daggoochee “Yigee mixoochee kexon taach ittoshi hago qajjito, amoyichiye?” iyaꞌa ta echeto beete?’ itone gete.

⁷ “Andoo ta guuno Daawitich ishichibe: Beshe Mawe Doono Yeeri ishichiye: ‘Neen gaddoochee, bagee quyoochee daammaꞌa, ta asheenaꞌo tuneti Israꞌeeleenaꞌo toommooch ne iraashemmoyich tuniihoye.

⁸ Ne hammeti gommo bulliich neenna tookkaa tunehoye. Ne etteenaꞌo bullin ne aafoochee aalliihoye. Andoo ne shigoon, showee toommooch beeti ogooge iraasheenaꞌochoommon aricheton tuniyemmo taane.

^9-10 Ta asheenaꞌo tuneti Israꞌeeleenaꞌoyich xaaꞌoon immemmo taane; boonoshinoo arooch manjiyemmo taane. Keqqaalloon boonoshi hajjee xaaꞌooch kotemminaꞌone. Ebiyee aafichoommon, ta asheenaꞌo tuneti Israꞌeeleenaꞌo toommooch woraaferasheenaꞌon ta ukkiriiti yemeenoochoommon, gonde asheenaꞌo boonoshin neexi hajjaachemminaꞌone. Ne etto bullin neech hajjiyemmo taane. “ ‘Andoo daakkaꞌa Doono Yeeri ta, taatoo tunemmi shiijjeroon neech immemmo taane.

¹¹ Qitaꞌa ne qaabbechinaꞌo waan ne xaꞌeehooba, ne bushiisheenaꞌo daggoochee ikkoon taatiyemmo taane; bi taatittinoonoo manjiyemmo taane.

¹² Taach kexon haggemmo, biine. Bi qeenonoo bulli yemeenoon manjiyemmo taane.

¹³ Tawoo biich nihoo tunemmo taane; biyoo taach bushoon tunemmone. Neyee aaf taateto waanee ta shoodoon ta wokkiyoommon bi waanee wokkiyaachemmo taane.

¹⁴ Ta kexonaa ta taatittinoonooch bulli yemeenooch biin manjiyemmo taane. Bi taatee qeenoo bulli yemeenooch manjemmone’ itone gete” iye.

¹⁵ Naataani Yeeri biich bekkiiti ebi mooyo bullin Daawitich gettiye.

Daawiti Corootoona Yeerin Galleto

¹⁶ Aroochee taatoo Daawiti danee duukkaanooch giyiye; Doono Yeeri aafooch koteechii ishichiye: “Nuggishoo Doono Yeero, ebiich taan ne bechiti ta, halla koni taane? Ta kechi ashoochi, konine?

¹⁷ Ta Nuggishoocho, ebi ne tuniiti mooyo ne aafoochaa giisheche mooyon tuneꞌi bekkehe; gubb woyemmi ta shiijjereenaꞌochon gibenikkihine. Nuggishoo Doono Yeero, taanoo moogeeti ashoon tuniyaꞌa ciinnehine.

¹⁸ “Ne guuno taan ariyaabeeto neene; oogoon taach ne immetoyich, illa ebiyee beshoon amoon neech geton hakkehote!

¹⁹ Ebin taach tuniyoyich, gubb taan oogiyemmo ne tunoon taach arichiyoyich, gaawe ne daaggoonaa ne gaboonon tunetone.

²⁰ “Doono Yeero, neen shaahemmo koniyoona aalloone. No waamona no waayetoommon, neyee bare nuggishoo aalloone.

²¹ Ne hajjee asheenaꞌon tuniyoyicha iyaꞌa guuchittinoochee ne biisheti Israꞌeeleenaꞌoommi asho showee toommooch aalloone. Boonoshich ne tuniiti, oogetonaa worganikkiti mooyona ne shigo showee toommo bulliich arichetone. Ne hajjee asheenaꞌo boonoshi tunemmoyich, Gibitsee ne biisheti asheenaꞌo aaf boonoshi hammimmona, bare asheenaꞌonaa boonoshi nuggisheenaꞌonon boonoshi aafoochee gashaa kichihine.

²² Ne asheenaꞌo tuneti Israꞌeeleenaꞌon bulli yemeenoon ne hajjee asheenaꞌo tuniito neene. Doono Yeero, newoo boonoshich Nuggishoon tunehine.

²³ “Illa and Doono Yeero, ne guuno taannaa ta shiijjeroonoyich ne gibenikkiti gibeno bulli yemeenoon manjoo tunebe; ne gettetoommonoo tuniibe.

²⁴ Ne shigo bulli yemeenoon manjitonaa oogetonon tunemmone. Asheenaꞌo, ‘Beshe Mawe Doono Yeeri, aroo Israꞌeelee Nuggishoone’ gettemminaꞌone. Tayee gubb woyemmi, ne guuno ta kechi asheenaꞌo ne aafooch manjoo tunemminaꞌone.

²⁵ “Ta Nuggishoo Yeero, ‘Ta neech kexon haggemmo taane’ iyaꞌa ebi mooyon taach ne arichiitoyich, ne guuno ta ebi corootoon ne aafooch giddiyoyich aafoon kuppheto taane.

²⁶ Doono Yeero, ne, Nuggishoo neene; ebi gaawe mooyon ne guuno taach gibenikkito neene.

²⁷ Ebich and, ne aafooch bulli yemeenoon manjiree bi beeyemmoyich, ne guuno ta shiijjeroon diiribe. Doono Yeero, ta shiijjeroon diirito neene; ne diiroo bulli yemeenoon ta kechi asheenaꞌo toommooch tunemmone” iye.