1 Kiinoo 16 - Kafa Linguistics Project

¹ Aroochee Yeerichi taabootoon deebii, Daawiti xogiti duukkaanooch giijjiꞌi, kotiiheete; micciibeeti deejjoonaa ikkittinee deejjoonon Yeerich deejjiyeete.

² Daawiti micciibeeti deejjoonaa ikkittinee deejjoonon bi deejjitoyee gubb, Doono Yeerichi shigoona asheenaꞌon diiriye.

³ Aroochee Israꞌeeleenaꞌo bullich, anaaminaꞌonaa maacheenaꞌonoyich boonoshi ikkikkoona ikke koshon, boonoshi qoodee meenonaa ikke nuuphi woyinee aafoonon immiye.

⁴ Daawitiyoo Doono Yeerichi taabootee aafoochaa boonoshi maddemmoyich, Israꞌeelee Nuggishoo Doono Yeerin boonoshi oogiyemmoyich, boonoshi galletemmonaa naademmonoyich ikkikke Leweenaꞌon ukkiriihe.

⁵ Boonoshi wulloo Asaafine; biyee deshoo Zakaariyaasi, Yeꞌeeli, Shemiramooti, Yehiꞌeeli, Matitiyi, Eliyaabi, Beenayi, Obeed Edoominaa Yeꞌeelina ukkireheete. Boonoshiyoo ooge ximboonaa giishi ximboona shoddee beetaa, Asaafi qaaxilloon yexxii beehe.

⁶ Ebiyoommon wotta qeesheenaꞌo Beenayinaa Yahazelina bulli aaboon Doono Yeerichi taabootee aafoochaa tiroon kuxaanoon huggii beeheete.

⁷ Ebi galletee shoddoon Doono Yeerich boonoshi shoddemmoyich Asaafinaa bi maneenaꞌonon batti batt Daawiti kaaccito ebiyoobane.

Daawitichi Galletee Shoddo

⁸ Doono Yeerin galletebote; bi shigoonoo ceegote; bi tuniito bullinoo aageteenaꞌoyich arichiibote.

⁹ Biich shoddebote; galletee shoddoon biich shoddebote; worganeeti bi shuunoo bullinoo getote.

¹⁰ Yaafe bi shigoonoo geecibote; Doono Yeerin qaawiibeeti mullecho emiribe.

¹¹ Doono Yeerin, bi kupphiyoonoo qaawibote; bulli aaboon biin qaawibote.

^12-13 Bi guuno Israꞌeelichi yareenaꞌote, bi kaacciti Yaaqobi bushiisheenaꞌote, bi tuniiti gaakkechi shuunoon, bi nalliti nalloonoo, shalligibote.

¹⁴ Doono Yeeri no Nuggishoone; showoo bulliich dayinnetoona nallii beetone.

¹⁵ Bi giyiti wogoon bulli yemeenooch, bi gettiti qaaroonoo hume shiijjerooch beddaahaa, batteyaache.

¹⁶ Abrahamina tookkii bi giyiti wogoon, Yisaaqich bi gibenikkiti gibenoon, batteyaache.

¹⁷ Ebinoo Yaaqobich qociyoon, Israꞌeelichoo bulli yemeenee wogoon, tuniiꞌi manjiihe.

¹⁸ Ishichiinoo iye: “Kanaanee showoon neech immemmo taane; ne hajjoo tuniiree woraashemmo neene” iye.

¹⁹ Haddoona giishecho tuneꞌi boonoshi beetaa, are showooch shiqqoo tuneꞌi boonoshi beetaa,

²⁰ ikke showoochee bare showooch, ikke taatoo waanee bare taatoo waan, yallyallimii boonoshi beetaa,

²¹ koniyoona boonoshin neexi hajjemmoyich daaggaanoone; boonoshi naboona taateenaꞌon kaarehe.

²² Ishichiinoo iye: “Huutteti ta asheenaꞌochi achooch shaggaahote; ta keemechinaꞌo toommoochoo gondoon shuuneyaahote” iye.

²³ Showee toommo bulliich beeti asheenaꞌote, Doono Yeerich shoddebote. Bi wodiyoonoo qemi qemona getote.

²⁴ Bi oogoon aagetoo bullich awaajjibote; worganikkiti bi shuuneenaꞌonoo asheenaꞌo bullich getote.

²⁵ Doono Yeeri oogoone; oogichiꞌi galleteetone; nuggisheenaꞌo bulliyee beshoon shatteetone.

²⁶ Aageteenaꞌochi nuggisheenaꞌo bulli, shahalleenaꞌone; tunebaani shimaayeenaꞌon hallito Doono Yeerine.

²⁷ Oogoonaa oogee yiiroona bi guudoona bekkee beetone; hakkoonaa emiroona bi yaafee kexooch ceennitone.

²⁸ Showee toommooch beeti ashi yareenaꞌote, bi oogoonaa bi hakkoonoyich Doono Yeerin galletebote.

²⁹ Bi shigoyich bede oogoon Doono Yeerich deebote; buuroon yeshiree bi aafooch wobote; bi yaafittino koojjii aaxxeebeeti Doono Yeerich goyinnebote.

³⁰ Showee toommo bulliich beeti asheenaꞌote, bi aafooch qewebote. Showoo manjiitaa bi shuuneetoyich shuuraachemmone.

³¹ Showoonaa shimaayoona oogichi emiribeete; aageteenaꞌo daggoochaa, “Doono Yeeri taatete” geteete.

³² Baharoonaa bi daggooch beeto bullina cookibe; gaddoonaa bi toommooch beeto bullina emiribe.

³³ Doono Yeeri, showee toommooch nalliya woyemmo bi tunetoyich, kubbi daggooch beeti mixinaꞌo emiroona, bi aafooch shoddemminaꞌone.

³⁴ Deꞌo bi tunetoyich Doono Yeerin galletebote; bulli yemeenooch shoodechone.

³⁵ Biichoo ishichibote: “Noon wodiyechi no Nuggishoocho, noon wodiibe; neen no galletemmoyich, yaafe ne shigoon no oogiyemmoyich, aageteenaꞌo daggoochee noon shiweree, ikkooch noon kicibe” getote.

³⁶ Bulli yemeenoochee bulli yemeenooch, Israꞌeelee Nuggishoo Doono Yeeri diireebe. Asheenaꞌo bulliyoo, “Ameena” iyeete; Doono Yeerinoo galleteheete.

Goyinno Qoceyoo

³⁷ Qemi qemoyich bi qoceetoommon, Asaafinaa bi maneenaꞌona Doono Yeerichi taabootee aafoochaa bulli aaboon boonoshi maddemmoyich Daawiti tuniihe.

³⁸ Ebiyoommon Yedutuuni bushoo Obeed Edoominaa shichaa shimitte bi maneenaꞌona boonoshin gaacheheete. Hoosinaa Obeed Edoomina kellechinaꞌone.

³⁹ Daawiti qeeshoo Sadooqinaa qeesheenaꞌo tuneti bi maneenaꞌonon Gibeꞌooni guudi toommeexi goyinnee xaaꞌooch beeti Doono Yeerichi yaafee duukkaanee aafooch neechiye.

⁴⁰ Ebiyoo Doono Yeeri Israꞌeeleenaꞌoyich bi gettito Sheeree Macaafooch kooreetoommon deejjee gudooch giddeebeeti micciibeeti deejjoon bulli aaboon maaddoonaa womikkoonon boonoshi giddiyemmoyichiye.

⁴¹ Boonoshina tookkii Hemaaninaa Yedutuunina, wotta bulli yemeenee bi shoodoyich Doono Yeerin boonoshi galletemmoyich bariitaa kaacheti, bareenaꞌoo beetinaꞌone.

⁴² Hemaaninaa Yedutuunina shumbureenaꞌochi, qaaxilleenaꞌonaa galletee shoddee beegaata kaacheebeeti shoddee qiiceenaꞌonochi toommooch ukkireheete. Yedutuuni bushiisheenaꞌoo kellechinaꞌo tuneheete.

⁴³ Aroochee asho bi ikkikkoona bi kexi kexooch hammiye; Daawitiyoo bi kechi asheenaꞌon diiroyich bi kexooch hammiye.