1 Kiinoo 15 - Kafa Linguistics Project

Taabooto Yerusaalem Womo

¹ Daawiti bi qellich kexinaꞌon Daawiti Katemooch bi shuunetoyee gubb, Yeerichi taabootoyich xaaꞌoon qanniiꞌi, duukkaanoon xogiye.

² Aroochee Daawiti ishichiye: “Bulli yemeenoon taabootoon boonoshi shaaggemmonaa bi aafoochaa boonoshi maddemmonoyich, Doono Yeeri boonoshin bi kaaccitoyich, Leweenaꞌoyee besh Doono Yeerichi taabootoon koniyoona shaaggaaye” iye.

³ Biyoo Doono Yeerichi taabootoon, ebi aroyich bi qanniiti xaaꞌooch boonoshi deebemmoyich Israꞌeeleenaꞌo bullin Yerusaalem kiciye.

⁴ Haroonichi yareenaꞌonaa Leweenaꞌonon ikkooch kiciye.

⁵ Qohaati yaroochee, iraashoo Urelinaa balli hiye bi maneenaꞌonon;

⁶ Meraari yaroochee, iraashoo Asayaahinaa gutte ballaa hiye bi maneenaꞌonon;

⁷ Gerishooni yaroochee, iraashoo Yoꞌeelinaa balli shaashe bi maneenaꞌonon;

⁸ Elitsafaani yaroochee, iraashoo Shemayaahinaa gutte balle bi maneenaꞌonon;

⁹ Kebirooni yaroochee, iraashoo Elelinaa shinne bi maneenaꞌonon;

¹⁰ Uzeeli yaroochee, iraashoo Aminadaabinaa balli aaraa gutte bi maneenaꞌonon kiciye.

¹¹ Aroochee Daawiti qeesheenaꞌo Sadooqinaa Abiyataarinon, Leweenaꞌo Urelin, Asayaahin, Yoꞌeelin, Shemayaahin, Elelinaa Aminadaabinon ceeggiꞌi,

¹² boonoshich ishichiye: “Ittoshi, Lewee yoodee yareenaꞌochi ukkiroo ittoshi tunetoyich, ittoshinaa Leweenaꞌo tuneti ittoshi maneenaꞌona ittoshi qelloon yaafibote. Ebiyee gubb, Israꞌeelee Nuggishoo Doono Yeerichi taabootoon biich ta qanniiti xaaꞌooch deebote.

¹³ Ebiyee aaf, Lewoo tuneti ittoshi taabootoon shaago ittoshi qajjitoyich, nooch icheti doyoommon biich maddaano no tunetoyich, no Nuggishoo Doono Yeeri kaaro no toommooch cufitone” iye.

¹⁴ Ebich qeesheenaꞌonaa Leweenaꞌona Israꞌeelee Nuggishoo Doono Yeerichi taabootoon deeboyich boonoshi qelloon yaafiyeete.

¹⁵ Doono Yeerichi qaaroona Muusi gettitoommon, Leweenaꞌo Doono Yeerichi taabootoon yaroona boonoshi gogooch shaaggiyeete.

¹⁶ Daawitiyoo shoddee qiicoona, ebiyoo giishi ximboona, ooge ximboonaa qaaxilloona, emiroona qaaroon oogichiree shoddemmi, boonoshi maneenaꞌon boonoshi ukkiriyemmoyich Leweenaꞌochi ukkireenaꞌoyich gettiye.

¹⁷ Ebich Leweenaꞌo Yoꞌeeli bushoo Hemaanin ukkiriiheete. Bi maneenaꞌoocheenoo Beraakiyi bushoo Asaafin, boonoshi manoo Meraari yaroochee, Kushaayi bushoo Etaanin ukkiriiheete.

¹⁸ Boonoshina tookkii boonoshiyee desh Zakaariyaasi, Yazeeli, Shemiramooti, Yehiꞌeeli, Uuni, Eliyaabi, Beenayi, Maseyaahi, Matitiyi, Elifeluuhinaa Mikiniyina, wottoo kellechinaꞌo Obeed Edoominaa Yeꞌeelinoo ukkireheete.

¹⁹ Shoddechinaꞌoochee gooshee qaaxilloon yexxii kaachiibeeti, Hemaani, Asaafinaa Etaanina ukkireheete.

²⁰ Zakaariyaasi, Azeli, Shemiramooti, Yehiꞌeeli, Uuni, Eliyaabi, Maseyaahinaa Beenayina ooge qaarechi ximboon yexxii kaachii beeheete.

²¹ Matitiyi, Elifeluuhi, Mikiniyi, Obeed Edoomi, Yeꞌeelinaa Azaziyina giishi qaarechi ximboon yexxii kaachii beeheete.

²² Kananiyi shoddee ariyecho bi tunetoyich, Lewee shoddechinaꞌo toommooch ukkiretone.

²³ Beraakiyinaa Eliqaanina taabootee kechi kelloon quyechinaꞌone.

²⁴ Qeesheenaꞌo tuneti Shebaniyi, Yoshafeexi, Netaaneli, Amasayi, Zakaariyaasi, Beenayinaa Elezeerina Yeerichi taabootee aafoochaa tiroon huggii beeheete. Obeed Edoominaa Yehiyahinoo wotta taabootee kechi kelloon quyechinaꞌone.

²⁵ Ebich Daawiti, Israꞌeelee ogoogeenaꞌonaa humee iraasheenaꞌona Doono Yeerichi wogee taabootoon Obeed Edoomi kexoochee deeba emiroona hammiyeete.

²⁶ Doono Yeerichi wogee taabootoon shaaggiti Leweenaꞌon Yeeri gaachetoyich shabaatte wuronaa shabaatte ogooge bagee baaddoonon deejjiyeete.

²⁷ Daawiti muttee tuppoochee shippeti tahoon tahetone; taabootoon shaaggiti Leweenaꞌo bulli, shoddechinaꞌonaa shoddechinaꞌonochi ukkiroo Kananiyina wotta muttee tuppoochee shippeti tahoon tahetinaꞌone. Daawiti wotta muttee tuppoochee shippeti efoodoon tahetone.

²⁸ Ebiyoommi gommona Israꞌeeleenaꞌo bulli emirii ililiibee, tiroonaa shametoonon huggiibee, qaaxilloon, giishi ximboonaa ooge ximboonon yexxii kaachiibee, Doono Yeerichi taabootoon Yerusaalem deebiyeete.

²⁹ Doono Yeerichi wogee taabooto Daawiti Katemooch giyii bi beetaa, Saaꞌooli bushee Mikaali mallee kelloona ciinnaa beehan. Taatoo Daawiti emiriꞌi capphi duubbii bi beetaa beeggaꞌa, bi mulloona biin hoxahan.