1 Kiinoo 14 - Kafa Linguistics Project

Daawiti Yerusaalemaa Shuuneti Shuunoo

¹ Arooba Xiroosi taatoo Kiraami Daawit waan wocheyechinaꞌon deejjiye; ebiyoommon wotta yigee mixon, taatee kexon boonoshi haggemmoyich, xaqqee xarechinaꞌonaa anaaxeenaꞌonon deejjiye.

² Daawitiyoo Doono Yeeri biin Israꞌeelee taatoo tuniiꞌi bi manjiyoon, bi asheenaꞌo tuneti Israꞌeeleenaꞌoyicha iꞌi bi taatittinoon oogichii bi oogiyoonoo ariihe.

³ Daawiti Yerusaalemaa mecheenaꞌon daakkii shaaggiꞌi anaami bushiisheenaꞌonaa maache bushiisheenaꞌonon daakkiꞌi shiyihe.

⁴ Arooch beechii bi shiyiti bushiisheenaꞌochi shigo ebine: Shamuꞌi, Shobaabi, Naataani, Solomooni,

⁵ Ibihaari, Elishuwi, Eliphaleexi,

⁶ Nogaahi, Nefeegi, Yafiyi,

⁷ Elishami, Beliyaadinaa Elifeleexinane.

Daawiti Filsixeemeenaꞌon Koyo

⁸ Filsixeemeenaꞌo Daawiti huutteꞌi Israꞌeeleenaꞌo bulliich toommooch bi taatoon waayeheete. Boonoshi bulliyoo Daawitin qaawi yecha kaama waaheete. Daawiti ebin waayeꞌi boonoshina koyeya kechiye.

⁹ Ebiyooba Filsixeemeenaꞌo waaꞌi, Refayee bamboon kochiyeete.

¹⁰ Daawitiyoo, “Ebi Filsixeemeenaꞌon keyiree koyote? Ta kishooch beshiiree immenne?” iꞌi Yeerin echehe. Doono Yeeriyoo, “Hamiree koye; ne kishooch beshiiree immemmo taane” iye.

¹¹ Ebich Daawiti Baꞌaal Feratsim hammiꞌi, aroochaa boonoshin kochii wochiye. Daawitiyoo, “Diqqoona ambamboo shaggiꞌi bi gaahoommon, Yeeri ta etteenaꞌon ta kishoona gaakkiye” iye. Ebich are xaaꞌoo Baꞌaal Feratsimi getteehe.

¹² Filsixeemeenaꞌo boonoshi shahalleenaꞌon arooch boonoshi duppitoyich Daawiti qaaqqooch bi asheenaꞌo michemmoyich bi getaa, michiyeete.

¹³ Filsixeemeenaꞌo wochinnoon waaꞌi are bamboon kochiyeete.

¹⁴ Andoo Daawiti Yeerin echehe. Yeeriyoo biich, “Boonoshi beetooch baad cikki hammaahine; gubbaa guudiree caaree mixinaꞌo beetooch hamiichi arooch quye beebe.

¹⁵ Ebi caaree mixinaꞌochi cilloochaa guubbee qaaroon ne waayegaata, Yeeri ta, Filsixeemeenaꞌochi ginee naayinaꞌon kocha ne aafooch kecheto ta tunetoyich, keyi koyebe” iye.

¹⁶ Daawitiyoo Yeeri gettitoommon tuniihe. Filsixeemeenaꞌon Gibeꞌoonee tiijjii Gezeer beddaahaa yookkii dabbiꞌi kochiyeete.

¹⁷ Ebina Daawitichi mooyo showoo bulliich waayeehe; Doono Yeeriyoo taatee showeenaꞌo bulli biin shattemmoyich tuniihe.