1 Kiinoo 13 - Kafa Linguistics Project

Taabooto Wotto

¹ Daawiti humee iraasheenaꞌona, ballee iraasheenaꞌonaa iraashoo bullina tookkii boyeehe.

² Aroochee Israꞌeelee iitoo bullich ishichiye: “Gaaweton tuneꞌi ittoshich bi bekkegaata, no Nuggishoo Doono Yeerichi daaggoonoo bi tunegaata, no waan boonoshi woyemmoyich Israꞌeelee showoo bulliich echeti no maneenaꞌo waan, miinji gaddechi boonoshi katemeenaꞌooch koteti qeesheenaꞌonaa Leweenaꞌona waanoo wochoon daachiibone.

³ Saaꞌoolichi taatee yemeenooch duppaa no qajjeti, no Nuggishoochi taabootoon wochi deebone” iye.

⁴ Ebi mooyo asheenaꞌo bullich gaaweto tuneꞌi bi bekketoyich, iitoo ebin tuniyoyich deꞌa iye.

⁵ Ebich Daawiti taabootoon Qiriyaat Yeꞌariimee deeboyich Gibitsee danooch beeti Shihooree tiijjii Hamaati katemooch beshe kaattooch beddaahaa koteti Israꞌeelee asho bullin kiciye.

⁶ Daawitinaa Israꞌeeleenaꞌo bullina taabootee toommooch beeti kiruubeenaꞌoyee tookk tuneꞌi taateebeeti, Doono Yeerichi shigoona ceekketi, Yeerichi taabootoon aroochee deeba, Yihudee showooch beeti, Qiriyaat Yeꞌariimi getteebeeti Baali katemooch hammiyeete.

⁷ Yeerichi taabootoon andire gaari toommooch kotiiꞌi Abinadaabi kexoochee deebiyeete. Uuzinaa Ahiyohina gaarin gashee beeheete.

⁸ Daawitinaa Israꞌeeleenaꞌo bullina boonoshi giidoon qoophaanoon, Yeerin oogiyoyich, giishi ximboon, ooge ximboon, kamboonaa qaaxilloonon yexxii kaachiibee, tiroon (waaringoon) huggiibee shoddee beeheete.

⁹ Kidoonichi maayi buchi xaaꞌooch boonoshi shaggimmona, gatteenaꞌo yaaditoyich Uuzi taabootoon yeshoyich bi kishoon yaggiye.

¹⁰ Uuzi taabootoon bi kishoona bi yechitoyich Doono Yeeri oogichii kaareꞌi biin wuxiye; ebich Yeeri aafoochaa qitiye.

¹¹ Doono Yeeri ippoona Uuzin bi wuxitoyich, Daawiti kaarehe. Hanaach beddaahaa are xaaꞌoo “Ferets Uuzi” getteehe.

¹² Arooba Daawiti Yeerin bi shattitoyich, “Yeerichi taabootoon ta waan ta deebemmo, aabichireeshiye?” iye.

¹³ Ebich Daawiti taabootoon bi waan, Daawiti Katemooch daamaanoone. Biyoo gommon shaddiꞌi, Gaati katemee asho Obeed Edoomi kexooch daammiye.

¹⁴ Doono Yeerichi taabooto Obeed Edoomi kechi asheenaꞌona tookkii bi kexooch keejje agenoon kotehe. Doono Yeeriyoo Obeed Edoomi kechi asheenaꞌonaa biich beeto bullinon diiriye.