1 Kiinoo 12 - Kafa Linguistics Project

Batti Batt Daawitin Dabbiti Asheenaꞌo

¹ Daawiti Qiishi bushoo Saaꞌooli aafoochee maxxeꞌi, Tsiqilaag bi beetaa bi waan waati asheenaꞌo eboshine; ebi asheenaꞌo bi koyee beehooba biin gaacheti ginee naayinaꞌo daggeexinaꞌone.

² Boonoshiyoo maꞌee awurechinaꞌone. Wotta boonoshi qanne kishoonoo tuneba yooche kishoona shangee awuroonaa xaqqee dufonon hakkii beetinaꞌone. Boonoshiyoo Biiniyaami yoodeenaꞌo, Saaꞌoolichi meechi xibeenaꞌone.

³ Boonoshi ukkireenaꞌo Gibaahechi Shemaahi bushiisheenaꞌo, Ahezeerinaa Yoꞌaashinane. Ebi asheenaꞌo: Azimaweeti bushiishoo Yezeelinaa Feleexina; Baraaki, Anaatootechi Yehi;

⁴ shaasheenaꞌo daggooch ginee anaamo, boonoshi toommoochoo ukkiroo tuneti Gibeꞌoonechi Ishimaayi, Erimiyaasi, Yahazeli, Yohanaani, Gedeerechi Yozabaadi;

⁵ Eluzayi, Yerimooti, Beliyaahi, Shemaariyinaa Haruufee asho tuneti Shefaxiyina;

⁶ Qoraahee asheenaꞌo tuneti Eliqaani, Ishiyaahi, Azareli, Yoꞌezeerinaa Yashobaamina;

⁷ Gedoorechi Yerohaami bushiisheenaꞌo tuneti, Yoꞌelaahinaa Zebaadiyinane.

⁸ Barahooch beeti mishigooch Daawiti beetaa, Gaadi yoodoochee gaachoonaa ginoonon yechiꞌi koyoona aricheti, ginee anaaminaꞌo tuneti asheenaꞌo bi waan waaheete. Boonoshiyoo daaheree baroommi barechinaꞌo, geppee toommooch capphiibeeti doolloommi afaafinechinaꞌone.

⁹ Eboshichi iraashoo Ezeerine. Iraashittinoona guttinnoo Abidiyi, keejjinnoo Eliyaabi,

¹⁰ awuddinnoo Mishimaani, uuchinnoo Erimiyaasi,

¹¹ shirittinnoo Ataayi, shabaattinnoo Eleli,

¹² shimittinnoo Yohanaani, yiixiyinnoo Elizabaadi,

¹³ aashirinnoo Erimiyaasi, aaraa ikkinnoo Makibanaayine.

¹⁴ Ebi Gaadi yoodee asheenaꞌo ginee iraasheenaꞌone. Boonoshiichee qatinaꞌo ballee iraasheenaꞌo tunemmona wotta qatinaꞌo humee iraasheenaꞌone.

¹⁵ Ebi asheenaꞌo ikke areddoon, Yoordaanoosi aaco batti batti agenooch ceenniꞌi gaagemoon bi capphiyooba, aacon kimmiꞌi, bambooch, aabi-keyo waaninaa aabi-gimo waaninooch, koteti asheenaꞌo bullin yookkiyeete.

¹⁶ Ikkikke Biiniyaamee asheenaꞌonaa Yihudee asheenaꞌona Daawit waan, bi beeti mishigooch waaheete.

¹⁷ Daawitiyoo boonoshina daneya hammiꞌi, boonoshich ishichiye: “Ittoshi waato taan gaacheya diggoyich bi tunegaata, ta mulloon ittoshich immemmo taane. Tunebaani ta etteenaꞌoyich beshiiꞌi taan imoyich waato ittoshi tunegaata, xuꞌo ta kishooch aallo bi tunetoyich, no qaabbechinaꞌochi Nuggishoo ciine; ittoshi toommoochoo nallibe” iye.

¹⁸ Aroochee Ayaano shaasheenaꞌochi ukkiroo Amasayi toommooch waataa ishichiye: “Daawito, no, neecho noone; Iseyi bushoocho, neenna tookkaa noone; ne Nuggishoo neen gaacheebeeto bi tunetoyich, diggoo, diggoo neech tunebe, diggoo neen gaachee beetinaꞌoyichoo tunebe” iye. Daawitiyoo boonoshin daammiꞌi bi ginee naayinaꞌo toommooch ukkiriihe.

¹⁹ Daawiti Filsixeemeenaꞌona tookkii Saaꞌoolin kocha bi hamiyooba Minaasi yoodee asheenaꞌoochee ikkikkeenaꞌo Daawit waan waaheete. Tunebaani Filsixeemee iraasheenaꞌo “No toommooch iritoon halliichi bi taatoo Saaꞌool waan wottemmone” ii koceeꞌi Tsiqilaagi katemooch biin boonoshi wochitoyich, Filsixeemeenaꞌon gaacheyaanoone.

²⁰ Daawiti Tsiqilaag bi hamiyooba Minaasi yoodoochee humee iraasheenaꞌo, eboshiyoo Adinahi, Yozabaadi, Yediyaꞌeeli, Mikaꞌeeli, Yozabaadi, Elihinaa Tsiletaayina bi waan waaheete.

²¹ Bulliyona ginee anaaminaꞌo wottoo ginee iraasheenaꞌo boonoshi tunetoyich, bi etteenaꞌon koyona Daawitin gaacheheete.

²² Daawitin gaachoyich qemi qemona asheenaꞌo bi waan waatoyich, Doono Yeerichi ginee naayinaꞌo meetoommon bi ginee naayinaꞌo meettiyeete.

Daawitichi Ginee Naayinaꞌo Haddoo

²³ Doono Yeeri bi gettitoommon, Saaꞌoolichi taatittinoon tiijjiree Daawitich imoyich, Daawiti beeti Kebiroon waati ginee naayinaꞌochi haddoo ebine:

²⁴ Yihudi yoodoochee gaachoonaa ginoonon yechiꞌi koyoyich qannitinaꞌo shiritte humaa shimitte balle asheenaꞌo,

²⁵ Simooni yoodoochee koyoyich qanniti ginee anaaminaꞌo shabaatte humaa ikke balle asheenaꞌo,

²⁶ Lewichi Yoodoochee awudde humaa shiritte balle asheenaꞌo,

²⁷ Harooni yaroochee iraashoo Yoyaadin geddiꞌi, keejje humaa shabaatte balle asheenaꞌo,

²⁸ ginee anaamo tuneti gurimaashoo Sadooqinaa bi yareenaꞌo tuneti hiyaa gutte ginee iraasheenaꞌona,

²⁹ Saaꞌoolichi meechi xiboo tuneti, Biiniyaamee yoodoochee keejje hume asheenaꞌo; tunebaani Biiniyaamee yoodee asheenaꞌoochee meetinaꞌo arooba beddaahaa Saaꞌoolich gibeneetinaꞌone;

³⁰ Efreemi yoodoochee boonoshi yaree daggooch aricheti, ginee anaaminaꞌo tuneti hiye humaa shimitte balle asheenaꞌo,

³¹ Daawitin taatiyoyich boonoshi shigo kooreetaa waati, Minaasi yoodee qatinaꞌo daggoochee aaraa shimitte hume asheenaꞌo,

³² Yisakoori yoodoochee gutte balle iraasheenaꞌonaa boonoshiyee desh beeti boonoshi xibeenaꞌona, ebi iraasheenaꞌo Israꞌeeleenaꞌo tuniyemmi mooyon, wotta ebi mooyon aata boonoshi tuniyemmo gaatoo yemeenoon ariibeeti asheenaꞌone.

³³ Zebulooni yoodoochee Daawitin gaachoyich waati, koyoyich qanniti, ginee qiico aabinona koyoon hakkiibeeti, mullo gaabbaani aache hume asheenaꞌo,

³⁴ Nifitaali yoodoochee hume ginee iraasheenaꞌo, boonoshina tookkii gaachoonaa ginoonon shaaggiibeeti shaashaa shabaatte hume asheenaꞌo,

³⁵ Daani yoodoochee koyoyich qanniti hiyaa shimitte humaa shiritte balle asheenaꞌo,

³⁶ Aseerichi Yoodoochee koyoon hakkiibeeti, koyoyich qanniti aabbe hume asheenaꞌo,

³⁷ Yoordaanoosi aachee beqachee, Roobeelinaa Gaadinochi yoodoonaa Minaasi yoodoochee qatinaꞌonoochee baribare ginee qiicoon yechiti balli hiye hume asheenaꞌone.

³⁸ Ebi ginee naayinaꞌo bulli koyoyich qanniꞌi, Daawitin Israꞌeelee showoo bulliich taatiyoyich kuxxiꞌi, Kebiroon hammiyeete. Echeti Israꞌeeleenaꞌoo Daawitin taatiyoyich mulloon ikkochitinaꞌone.

³⁹ Boonoshi maneenaꞌo maayoonaa uyoonon qanniitoyich, maa uchiibee Daawitina tookkii keejj qeyiyeete.

⁴⁰ Dambi-waan beeti Yisakooree yoodeenaꞌo, Zebuloonee yoodeenaꞌonaa Nifitaalee yoodeenaꞌonooch beddaahaa maayoon kurooch, gaaleech, biceroonaa gattoonooch xaaniꞌi deebiyeete. Israꞌeelee showooch oogeti emiroo bi tunetoyich koshon, buddinoon, nuuppheti balaasee michi aafoon, woyinee aafee yuunjoon, woyinee uyoon, zayitoon, gatteenaꞌonaa bageenaꞌononoo woddiiꞌi deebiyeete.