1 Kiinoo 11 - Kafa Linguistics Project

Daawiti Israꞌeeleenaꞌo Toommooch Taato

¹ Ebiyee gubb, Israꞌeeleenaꞌo bulli Kebiroon, Daawit waan waa kiceeꞌi, biich ishichiyeete: “No, ne meeno, ne damoo noone.

² Besheti yemeenooch, Saaꞌooli taateꞌi beehooba, Israꞌeeleenaꞌon ginee koyee xaaꞌoochaa yaabito neene. Ne Nuggishoo Doono Yeeriyoo neech, ‘Ta asheenaꞌo tuneti Israꞌeeleenaꞌon qiddemmo neene; boonoshichoo iraashoo tunemmo neene’ itone” iyeete.

³ Ebina Israꞌeeleenaꞌon qeejjiibeeti geeneenaꞌo bulli Kebiroon, Daawit waan waaheete. Daawitiyoo Kebiroonaa Doono Yeeri aafoochaa boonoshina tookkii wogoon giyiye. Doono Yeeri Saameelina bi gettitoommon boonoshiyoo Daawitichi shimbooch zayitoon huuttiꞌi, Israꞌeelee showooch biin taatiiheete.

Daawiti Yerusaalemin Kochii Yesho

⁴ Daawitinaa Israꞌeeleenaꞌo bullina hammii Yebuseenaꞌochi beeyi xaaꞌoo tuneti Yerusaalemin kochiyeete. Yerusaalemi arooba Yebusi getteehe.

⁵ Arooch beeti Yebuseenaꞌo Daawitin, “No katemooch gimon hakkaachemmo neene” iyeete. Tunebaani Daawiti kochiꞌi, Tsiyooni mishigoon yechiye. Ebiyoo, Daawiti Katemoo getaa ceekkehe.

⁶ Daawiti, “Yebuseenaꞌon shiichii kochimmi asho ginee iraashoo tunemmone” iye. Ebich Tseruuyi bushoo Yoꞌaabi shiichii kechii kochiꞌi ginee iraashoo tunehe.

⁷ Aroochee Daawiti bi beeyi xaaꞌoon mishigechi katemooch tuniihe. Aroo, Daawiti Katemoo getaa ceekkehe.

⁸ Biyoo Miiloo getteebeeti xaaꞌoochee tiijjii bi guudoona katemoon shuunehe. Yoꞌaabiyoo eche katemoon wochinnoon shuunehe.

⁹ Daawitiyoo Beshe Mawe Doono Yeeri biinna tookkii bi tunetoyich, qemi qemona kupphee kupphee hammiye.

Ginee Anaaminaꞌo Tuneti Daawitichi Naayinaꞌo

¹⁰ Daawitichi ginee anaaminaꞌochi iraasheenaꞌo eboshine; boonoshiyoo Israꞌeeleenaꞌo bullina tookkii tuneꞌi, Israꞌeeleenaꞌochon Doono Yeeri gibenikkiti gibenoommon Daawiti taatemmoyich tuniiheete; bi taatittino manjemmoyichoo biin gaacheheete.

¹¹ Daawitichi ginee anaaminaꞌo eboshine: Hakimoonee asho tuneti Yashobaami keeminaꞌo toommooch ukkiroone. Biyoo ikke ginee koyoochaa bi ginoon tiijjiꞌi, keejje balle asheenaꞌon wuxitone.

¹² Keejje ginee anaaminaꞌo daggoochee guttinnoo wotta Ahoohi bushoo, Doodi bushoo Elazaarine.

¹³ Filsixeemeenaꞌo koyeya Fasidaamiim boonoshi kiceehooba, biyoo Daawitina tookkii beetone. Sheqoo ceenniti goyee xaaꞌoochaa Israꞌeelee ginee naayinaꞌo Filsixeemeenaꞌo aafoochee wocee aalleheete.

¹⁴ Tunebaani goyee gutte daggooch neexeechii Filsixeemeenaꞌon wuxiyeete. Doono Yeeriyoo worganikkiti wudoon imona boonoshin wodiihe.

¹⁵ Ikke areddoon Filsixeemee ginee naayinaꞌo Refayee bambooch kaamboon geddiꞌi boonoshi beetaa, ebi aricheti shaasheexi keeminaꞌo Daawit waan, Adulaami xaqqee gofooch dugilla hammiyeete.

¹⁶ Ebiyooba Daawiti mishigooch bi beetaa, Filsixeemee ginee naayinaꞌo Beetilehemin yechitinaꞌone.

¹⁷ Daawitiyoo, “Beetilehemi uxeree kellooch beeti aachi oppoochee ta uchemmi aacon taach koni deeba?” iꞌi oogichii qaatiye.

¹⁸ Ebina ebi giidechi keejje asheenaꞌo Filsixeemeenaꞌochi kaambee gutte daggoona kuxxii besheꞌi, Beetilehemi uxeree kellooch beeti aachi oppoochee aacon kittii Daawitich deebiyeete. Tunebaani Daawiti uchemmon qajjiichii, Doono Yeerich deejjoon tunii ukkiꞌi,

¹⁹ “Ebi aacon uyon ta Nuggishoo ta waanee wokkiibe! Ebi boonoshi kashoona gajjiteeꞌi hammiti asheenaꞌochi damoo toone?” iye. Ebich are aacon uchemmon qajjiye. Ebi giidechi keejje asheenaꞌo tuniiti mooyo ebine.

²⁰ Yoꞌaabichi manoo Abishayi shaasheenaꞌochi toommooch ukkiroone. Aroo bi ginoon tiijjiꞌi keejje balle asheenaꞌon wuxiye. Ebina keeminaꞌoyee barii aricheti ashoon tunehe.

²¹ Biyoo shaasheenaꞌochi daggoochee beshoon aricheton tuneꞌi, boonoshi toommooch ukkirehe. Tunebaani keeminaꞌochoommon aricheto toonoone.

²² Kabizeelee asho, Yoyaadi bushoo Beenayi aricheti mooyon tuniiti ginee anaamone. Biyoo gutte Moꞌabee ginee anaaminaꞌon wuxiye. Wotta ikke areddoon kecho shimaayoochee kindiyooba dugilla hammiꞌi oppooch beeti daaheroon wuxiye.

²³ Wotta andoo bi neexo uuche hiroo tuneti, ikke hakka ooge Gibitsee ashoon wuxiye. Ebi Gibitsee asho qoreddee shippechochi waanjoommi (shobboommi) yaabechi ginoon yechito bi tunetaanoona, Beenayi gumboon yechiꞌi bi waan hammiye. Biyoo ginoon Gibitsee ashoo kishoochee shottee deqqiꞌi uroon bi hajjee ginoona wuxiye.

²⁴ Yoyaadi bushoo Beenayi tuniiti aricheti mooyo ebine; biyoo giidechi keeminaꞌochoommon aricheton tunehe;

²⁵ shaasheenaꞌo daggooch aricheton tunehe; tunebaani ohe keeminaꞌona tookkii tateyaanoone. Daawiti bi quyee naayinaꞌo toommooch biin ukkiriihe.

²⁶ Ginee anaaminaꞌo eboshine: Yoꞌaabi manoo Asaheeli, Beetilehemechi Doodi bushoo Elihanaani,

²⁷ Haroodechi Shamooti, Feloonee asho Heleezi,

²⁸ Teqoꞌechi Ikeeshi bushoo Iraahi, Anaatootechi Abezeeri,

²⁹ Hushatechi Sibekayi, Ahoohechi Ilaayi,

³⁰ Nexoofechi Maharayi, Nexoofechi Banaahi bushoo Heleedi,

³¹ Biiniyaamee showooch beeti Gibaahee asho Ribayi bushoo Itayi, Feratoonechi Beenayi,

³² bambooch beeti Gaashee asho Huraayi, Arebee asho Abiꞌeeli,

³³ Baharuumechi Azimaweeti, Shalibonechi Eliyahibi,

³⁴ Gizoonee asho Hasheemi bushiisheenaꞌo, Haraaree asho Shagi bushoo Yonaataani,

³⁵ Haraaree asho Sakaari bushoo Ahiyami, Uuri bushoo Elifaali,

³⁶ Mekeraatee asho Hefeeri, Feloonee asho Akiyi,

³⁷ Qermeloosechi Hetsiri, Ezibayi bushoo Naarayi,

³⁸ Naataanichi manoo Yoꞌeeli, Hagiri bushoo Mibihaari,

³⁹ Amoonee asho Tseleeqi, Tseruuyi bushoo Yoꞌaabichi quyee naayo tuneti, Beerootee asho Naharaayi,

⁴⁰ Itiree asho Iraahi, Itiree asho Gareebi,

⁴¹ Hitee asho Uuriyi, Ahilayi bushoo Zabaadi,

⁴² Roobeelee asho Shiizi bushoo Adiini; biyoo Roobeeleenaꞌochi ukkiroone. Wottoo biinna tookkii beeti shaasheenaꞌo,

⁴³ Maꞌaki bushoo Hanaani, Mitinee asho Yoshafeexi,

⁴⁴ Ashiteraatee asho Uuziyayi, Aroꞌeeree asho Hotaami bushiishoo Shaaminaa Yeꞌeelina,

⁴⁵ Shimiiri bushoo Yediyaꞌeeli, Tizee asho tuneti bi manoo Yohi,

⁴⁶ Mahawee asho Eleli, Elinaami bushiishoo Yeribayinaa Yoshabiyina, Moꞌabee asho Itimaahi,

⁴⁷ Mezoobee asheenaꞌo Eleli, Obeedinaa Yaselinane.