1 Kiinoo 10 - Kafa Linguistics Project

Saaꞌooli Qitoo

¹ Filsixeemeenaꞌo Israꞌeeleenaꞌon kochiyeete. Israꞌeeleenaꞌo boonoshi aafoochee wocee aalleheete. Meetinaꞌo Giliboꞌi geppoochaa koyaa qitiyeete.

² Filsixeemeenaꞌo Saaꞌoolinaa bi bushiisheenaꞌonon yookkii dabbiyeete. Boonoshiyoo Saaꞌoolichi keejje bushiisheenaꞌon, eboshiyoo Yonaataanin, Abinadaabinaa Malkishuwinon wuxiyeete.

³ Koyoo Saaꞌooli toommooch kupphee kupphee hammiye. Shangechinaꞌo biin qaakkii kochii mayiiheete.

⁴ Saaꞌooli bi quyee naayon, “Hini dokireyaaneenaꞌo waaree ta kashoona kaachemminaꞌone; ebiyee ne goraadoon kaaciree, ne taan koye” iye. Tunebaani bi quyee naayo oogichiꞌi bi shattitoyich, ebin tuniyoon qajjiye. Ebich Saaꞌooli bi goraadoon kaacciꞌi aree toommooch taachehe.

⁵ Bi quyee naayo Saaꞌooli qitoon beeggiꞌi, biyoo ebiyoommon bi goraadee toommooch taacheꞌi qitiye.

⁶ Saaꞌoolinaa keejje bi bushiisheenaꞌona tookkii ikkooch qitiyeete; bi kechi asheenaꞌoo qitiyeete.

⁷ Bambooch beeti Israꞌeeleenaꞌo, Israꞌeelee ginee naayo bulli wocee aalloon, wotta Saaꞌoolinaa bi bushiisheenaꞌona qitoon waayeꞌi, boonoshi katemi katemoon duppii, wocee aalleheete. Filsixeemeenaꞌo waaꞌi are katemeenaꞌooch koteheete.

⁸ Bi dechara Filsixeemeenaꞌo dubenee toommoochee gaacechi mooyon shooti daamma waaꞌi, Saaꞌoolinaa bi bushiisheenaꞌonochi dubeno Giliboꞌi geppooch qeyiꞌi beeton daneheete.

⁹ Boonoshiyoo Saaꞌoolichi qettoon kuxxiyeete; bi ginee qiicoon shoottiyeete. Aroochee ebi mishiraachoon hamiree shahalleenaꞌo beeti kexoochaa, wotta boonoshi asheenaꞌoyich boonoshi gettemmoyich Filsixeemee showoo bulliich wocheyechinaꞌon daachiiheete.

¹⁰ Saaꞌoolichi ginee qiicoonoo boonoshi nuggisheenaꞌochi yaafee kexooch kotiiheete. Bi qelloonoo boonoshi nuggishoo Daagoonichi yaafee kexooch yooddiyeete.

¹¹ Filsixeemeenaꞌo Saaꞌooli toommooch tuniito bullin Gilaadee showooch beeti, Yabeeshi asheenaꞌo bulli waayeꞌi,

¹² ginee anaaminaꞌo tiyii hammii, Saaꞌoolichi dubenoonaa bi bushiisheenaꞌochi dubenoonon tiijjii, Yabeeshi katemooch deebiyeete. Boonoshi shaawushoon Yabeesh beeti ooge michi baatooch duukkiyeete. Shabaatte qemonoo coomiyeete.

¹³ Saaꞌooli Doono Yeerich gibeneyoo bi qajjitoyich qitiye. Doono Yeerichi getoon ceechaanoone. Beshoonoo qititi ashoona yibbaatee beeti waanee ciicoon qaawiye.

¹⁴ Ebinoo Doono Yeer waanee qaawaanoone. Ebich Doono Yeeri biin wuxiye. Bi taatittinoonoo Iseyi bushoo Daawitich guudiihe.