Saint Matthieu 9 - Féké Testament 1947

¹ Da Jésus hé bil kombone, ka sé hélé nguèng an lèkè, da gui dodok pou nè.

² Da mono, kli bi njou‐jangma yawè, ko̱ na bou toko. Da ko̱ Jésus mi ko̱ tounassaon akli kè sa hi njou‐jangma yawè: Goune ni, bi hang‐o̱ guè tiya, mè yèng bi mboro békéfèn noli tou.

³ Da mono, njou‐to̱ko̱na bong guingna hanali mi kèrè ka laou kli: Njoukou aïn mi poukou ba Ouone.

⁴ Da Jésus mi toutou kèrafèn an bil go̱ro̱ kli, kè sa: Baïfèn da ouime kèrè békéfèn on ka bo̱ko̱ go̱ro̱ baï lé?

⁵ An hane mi la maïya lé? Baï sanakè ba: Mè yèng bi mboro békéfèn noli tou, maléba baï sanakè ba: Mo ourou siya ka sé lé?

⁶ Da ba baï an ouime toutou ko̱ Goune a njoukou mi jing njèran an koukoula ma baï yèngna bi mboro békéfènli, da kè sa hi njou‐jangma yawè on: Mo ourou siya ka bi toko no ka sé guè bil voulo̱.

⁷ Da kè ourou siya, ka sé guè voulè.

⁸ Da ko̱ njoukouli nyèta mi ko̱ fèn on, waou i kli, da kli jone Ouone baï ko̱ kème hi njèran on hi njoukouli.

⁹ Da ko̱ Jésus mi yé tana, kè ko̱ njoukouna mbéo ko̱ bi ling‐è ba Matthieu. Kè kaou guèl mangna l’impôt. Da Jésus sa hi nè: Mo gui fali. Da kè ourou siya ka sé falè.

¹⁰ Da baï on mi gui mahana ka on, ko̱ Jésus mi kaou sona laka an bil voulou, mo ko̱, njou‐mangna l’impôtli, da njou‐békéfènli nyèta mi gui, da kaou jing Jésus tèn njou‐séna bong nèli.

¹¹ Da ko̱ pharisienli mi ko̱ fèn on, kli sa hi njou‐séna bong nèli: Baïfèn da njou‐to̱ko̱nafèn abaï mi son laka jing njou‐mangna l’impôtli tèn njou‐békéfènli lé?

¹² Da ko̱ Jésus la baï on, kè sa hi kli: Tane ti ba kli on, ko̱ mi tane ga na jangma ya, mi ko̱ ji médecin, da ba kli on ko̱ mi na jangma mi ko̱ ji médecin.

¹³ Da oui sé, ka la saon a baï on: Ndingna haïo mi na hang ni ta, da tane ti ba sacrifice ya. Baï ko̱ mè tane ga gui ba baï dina njou‐guédékli ya, da mè gui ba baï dina njou‐békéfènli.

¹⁴ Da on njou‐séna bongli a Jean mi gui monè, ka sa: Baïfèn da na kira pharisienli mi chang laka name nyèta, da njou‐séna bong noli mi tane ga chang laka ya lé?

¹⁵ Da Jésus sa hi kli: Yé ndo̱ko̱bali a wa waïn mi lé léou ko̱ wa waïn mi kaou jing kli lé? Da namkè ma gui o̱ ko̱ klime ya wa waïn an woro kli, da yé kli chang laka, ka name o̱kèo̱.

¹⁶ Njoukouna mi tane ga san féké la an toul tangkè ya; maléba tokoré kème nding on féké la on ma goro tangkè ta guèlkè nyèta.

¹⁷ Da njoukouna mi tane ga kon féké vin bil tang mboung outre ya; maléba tongna kème nding on mboung outre ma dèrè vin kon pa, da mboung outre on ma bo; da kli kon féké vin bil féké mboung outre, da on séré bon ma pèng.

¹⁸ Da ko̱ kème sa baï on hi kli, zaworo mbéo mi gui, da houkou mbèlè, ka hiou nè, ka sa: Goune waïn ni mi hou koukoulion; da mo gui ka goukou ndo̱ko̱ toulè, da yé kè ma tome.

¹⁹ Jésus ourou siya, da sé falè jing njou‐séna bong nèli.

²⁰ Da mono, waïn mbéo ko̱ séme mi tèn nè nyèta ma saka botoulè‐séré mi gui fala Jésus, da da njaka la nè,

²¹ da kè kèrè ka go̱rè: Tokoré mème da ba njaka la nè, yé moni ma haï.

²² Da ko̱ Jésus mi ki monè, kè ko̱ nè, ka sa: Goune waïn, mo bi hang‐o̱ guè tiya, tounassaon no mi haï mo tou. Da mona waïn aïn mi haï ka mbé l’heure o̱kèo̱.

²³ Da ko̱ Jésus mi ri sé bil voula zaworo aïn, da ko̱ njou‐oula gagali, da njoukouli nyèta ba bo̱ko̱ baï.

²⁴ Kè sa hi kli: Oui yèng domboro; baï ko̱ goune waïn aïn mi tane ga hou ya, da kè na ba name. Da kli saka nè nyèta.

²⁵ Da ko̱ kème téne ro̱kè njoukouli tèn kala, kè ri sé bil voulou, kè ba ndo̱ka goune waïn on, da goune waïnkè mi ourou siya.

²⁶ Da tiri baï on mi ti manguèl an bil sél koukoula on bon.

²⁷ Da ko̱ Jésus mi ourou ka ta ka soko, njou‐foukoura nondi séré mi sé falè, kli wan njaka guè siya, ka sa: Mo nding haïo hi na, mo Goune a David!

²⁸ Da ko̱ kè ri sé bil voulou tou, njou‐foukoura nondi on mi guè monè. Da Jésus sa hi kli: Oui la bilaou, yé mè ma baï ndingna fèn on lé? Da kli sa hi nè: Ii, Nanjou.

²⁹ Mono on, kè da none kli, ka sa: Mi nding hi oui, ko̱ mi ma tounassaon abaï.

³⁰ Da none klili mi bourou tou. Da Jésus mi gna bi njaka kli pou ta, ka sa: Oui pèng, an njoukouna mbéo mi tane ga tou fèn aïn ya.

³¹ Da kli sé, ka sèrè jing baï nè manguèl an bil sél koukoula on bon.

³² Da ko̱ klime guè séna, mono, kli gui jing njou‐mbo jing zabolo guè mona Jésus.

³³ Da ko̱ kè ni zabolo tèn kala tou, njou‐mbo on mi sa baï. Da laou a ro̱kè njoukouli mi sé siya, kli sa: Jinguèl na tane ga ko̱ fèn on an Israël bo̱ko̱ mbéo ya.

³⁴ Da pharisienli mi sa: Kè téne zabololi tèn kala ka ba njèran a zaworo zabololi.

³⁵ Da Jésus mi sèrè yan bil loukou pouli da lélé pouli bon, ka to̱ko̱ fèn an bil synagogue aklili, da sa mboura bèlabaï a bilkaou, da haï mèrèn jangmali toutoul bon da mèrèn sétali toutoul bon.

³⁶ Da ko̱ kème ko̱ ro̱kè njoukouli ko̱ mi nyè maïya, kè ko̱ kli passé ta, baï ko̱ séna mi tèn kli ta, da kli yaïli mahana ka badouali ko̱ njou‐kora kli mi tane tiya.

³⁷ Da on, kè sa hi njou‐séna bong nèli: Waka to maïya babaï, da njou‐bakarali tane nyè ya.

³⁸ Mono on, oui sa jojo Nanjou waka on an kème pi njou‐bakarali gui bil waka, ko̱ to maïya.