Saint Matthieu 8 - Féké Testament 1947

¹ Da ko̱ Jésus mi diri an souraguèl tou, ro̱kè njoukouli nyè maïya sé falè.

² Da mono, njou‐ndo̱wè mi guè monè da houdou mbèlè ka hiou nè, ka sa: Nanjou, tokoré mome jiji mo ma baï mossona mi tangta.

³ Da Jésus mi ndara ndo̱kè, ka da nè, ka sa: Mè ji bo̱ko̱kè, an mono mi tangta. Da koukoulion ndo̱wè nè mi fé tou.

⁴ Da Jésus sa hi nè: Mi bo̱l bilo̱ ka mo tane sa hi njoukouna mbéo ya; da mo sé ka to̱ko̱ mono hi ba sacrificateur, da hi toul ndo̱ko̱ on ko̱ Moïse mi sa bi njakè, ko̱ ba sana bongbaï hi kli.

⁵ Da ko̱ Jésus mi sé guè pou Capernaüm tou, kabita a tourougouli mi guè monè, ka sa jo̱jo̱ nè, ka sa:

⁶ Nanjou, njou‐bakara ni mi na jangma yawè, da na bou voulou, ka to̱ko̱ssé nyèta.

⁷ Da Jésus sa hi nè: Yé mè guè ka haï monè.

⁸ Da kabita tourougouli mi féré sa, ka sa: Nanjou, mè tane ga ma an mome gui bil vouli ya; da mo sa ba baï njako̱ ka ho̱kè, da yé mona njou‐bakara ni ma haï.

⁹ Baï ko̱ mè ba njou‐bina njaka kéng. Mè ba nanjou a tourougouli; da mème sa hi aïn mbéo: Mo sé! da kè sé; mè sa hi aféké; mo gui! da kè gui; da mè sa hi njou‐bakara ni: Mo nding on! da kè nding.

¹⁰ Da ko̱ Jésus mi la baï on laou‐è mi sé siya, da kè sa hi kli on ko̱ sé falè: Babaï, mi mè sa hi oui, mè tane ga ko̱ loukou tounassaon mahana ka aïn ya, tèn njoukouna an Israël ya.

¹¹ Da mè sa hi oui, yé njoukouli nyèta ma ourou ka mboro tènassé da mboro linassé, da ma kaou table jing Abraham, da Isaac tèn Jacob, an bilkaou a nonkala.

¹² Da mi wou goundi a bilkaou bou yilime tèn kala, guèl ko̱ lénaléou da sona sél kli mana an ndourou.

¹³ Da Jésus sa hi kabita tourougouli on: Mo sé fèno, an fèn mi nding hi mo, mahana ko̱ mo la bilaou. Da mona njou‐bakara mi haï ka l’heure o̱kèo̱.

¹⁴ Da ko̱ Jésus mi ri sé bil voula Pièrre tou, kè ko̱ ma a waïn a Pièrre mi na jangma jing monè mba hèlè ta.

¹⁵ Da kè da ndo̱kè da hèlè monè vo tou, da waïn on mi ourou siya ka nding bakara hi nè.

¹⁶ Da ko̱ bèlaléou mi lé tou, kli fan njoukouli nyèta jing zabololi guè mona Jésus. Da kè ni espritli tèn kala ka baïnjakè, da kè haï mona njou‐jangmali bon,

¹⁷ an tènrèn none baï ko̱ mi sa ka njaka prophète Ésaïe mi tèn kala ka babaï, ka sa: Kè fènè mi ya hèfèrè na guèfal da hol jangma nali bi toulè.

¹⁸ Da ko̱ Jésus mi ko̱ rokè njoukouli nyèta kaou gui ki nè, kè sa bi njaka kli an klime do̱li sé hélé nguèng a lèkè.

¹⁹ Da njou‐to̱ko̱na bong guingna mbéo gui monè, ka sa hi nè: Njou‐to̱ko̱nafèn, guèl bon ko̱ mome sé, yé mè ma sé falo̱.

²⁰ Da Jésus mi féré sa hi nè: Kou a guéli mana, da ndoïli an nonkala makaou ka voula kli; da guèl mi tane ti an Goune a njoukou mi bi toulè guè rou ya.

²¹ Da njou‐séna bong aféké mi sa hi nè: Nanjou, yèng an mè sé ka goro baba ni ti dambèl da.

²² Da Jésus mi féré sa hi nè: Mo gui fali, mo yèng an houl mi goro houl klili fèn kli.

²³ Da ko̱ Jésus mi hé bil kombone, njou‐séna bong nèli sé falè.

²⁴ Da mono koukouna bine‐té mi kou yan none mbi nyèta, da on wouna mbi sé bil kombone ta, da Jésus mi na name.

²⁵ Da njou‐séna bongli mi guè monè ka tome nè, ka sa: Nanjou mo lé mbèla, ba yé na hou!

²⁶ Da kè sa hi kli: Baïfèn da waou mi i oui on lé? oui njoukouli jing tounassaon nyè ya! Da on kè ourou siya ka to koukouna da loukou mbi, da guèl mi o chiou.

²⁷ Da laou a njoukouli on mi sé siya, kli sa: Njoukou aïn ba guè, da koukouna da loukou mbi mi ndé la baï nè lé?

²⁸ Da ko̱ kème sé hélé nguèng a lèkè guèl njou?-?Gadarénienli, kè woutoul jing njoukouli séré ko̱ jing zabololi, ko̱ tèn gui toul pal kou. Kli ba wonron ta, da njoukouna mbéo tane ma baï tana guèl o̱kèo̱ ya.

²⁹ Da mono, kli wan njaka, ka sa: Fème ko̱ mbèl mo jing na lé? mo Goune a Ouone. Mo gui guèl aïn baï zara na ambèl, ko̱ namkè mi pane lé?

³⁰ Sarang ngoïyali nyèta mi kaou dita jing kli baï sona laka.

³¹ Da zabololi mi sa jo̱jo̱ a Jésus: Tokoré mome ni na tèn kala, mo pi na sé bila ngoïyali on an soko.

³² Da kè sa hi kli: Oui sé! Da kli tèn kala ka sé guè bila ngoïyali. Da mono, sarang a ngoïyali bon mi ourou an bèl souraguèl ka ngou gata diri sé njaka loukou mbi, ka lé mbi da hou guè mbi.

³³ Da kli on ko̱ ko̱ro̱ ngoïyali, kli ngou sé guè bil loukou pou, ka to̱ko̱ bong fènli bon da fèn ko̱ mi tèn njoukouli on jing zabololi jinguèl.

³⁴ Da mono, njoukouli bon an pou aïn mi gui ka woutoul jing Jésus, da ko̱ klime ko̱ nè, kli sa jo̱jo̱ nè, an kème ourou an bil sél pou kli.