Saint Matthieu 27 - Féké Testament 1947

¹ Da ko̱ guèl mi taka tou, loukou sacrificateurli tèn tangchidoli a njoukouli mi ndoï jing hana ka bakèdakè toul ling a Jésus baï ina nè.

² Da kli gna nè, ka ya nè sé, ka hi nè bi ndo̱ka njou‐name gangna Ponce Pilate.

³ Da on Judas on ko̱ mi jo̱lè, ko̱ kè ko̱ barabaï aïn mi lé toulè kè hèkè mboro nè, ka féré ka mbo̱ri l’argent bongkè‐saï on hi loukou sacrificateurli tèn tangchidoli,

⁴ ka sa: Mè nding békéfèn baï ko̱ mè jo̱l séme guédék tou. Da kli sa: Baï ama an ndourou lé? On ba baï amo fèno.

⁵ Da Judas wou mbo̱ri l’argent bou koukoula an bil temple, ka tèn sé kala. Da kè sé ka bou sal solè fènè.

⁶ Da loukou sacrificateurli mi fan mbo̱ri l’argent on ka sa: Ka mboro guingna tane ma baï bouna mbo̱ri on an bil kouba mbori a Ouone ya baï ko̱ on ba mbo̱ri zéna séme.

⁷ Da kli bakèdakè jing hana, an klime zé ba sél koukoula on a njou‐bona ilili baï gora houl a goni njoukouli rou ka mbo̱ri on.

⁸ Mono koukoula on kli bi lingkè ba koukoula séme bo̱l tèn kassénaï.

⁹ Da on, tènrèn none baï ko̱ mi sa ka njaka prophète Jérémie mi tèn kala ka babaï tou, ka sa: Da kli ya mbo̱ri l’argent bongkè‐saï tou, cho̱ko̱kè on ko̱ kè kèn cho̱ko̱kè, ko̱ goundi a Israël mi kèn cho̱ko̱kè baï jo̱la nè;

¹⁰ da kli hi mbo̱rikè on baï a sél koukoula a njou?-?mbo̱na ilili, mahana ko̱ Nanjou mi sa bi njaka ni.

¹¹ Da Jésus mi o mbèla njou‐name gangna, da njou‐name gangna mi oui nè, ka sa? Mo ba nanjoukaou a Juifli lé? Da Jésus mi sa hi nè: Mo sa on tou.

¹² Da ko̱ loukou sacrificateurli tèn tangchidoli mi sa kita nè, kè tane sa baï ya.

¹³ Da on Pilate mi sa hi nè: Mo tane ga la ko̱ klime sa kon toulo̱ toul fènli nyèta ya lé?

¹⁴ Da Jésus mi tane féré sa hana gounfènakè ya, da mono on, laou a njou‐name gangna mi sé siya nyèta.

¹⁵ Jinguèl ka name gnèna laka aïn, njou‐name gangna mi ji baï séla njou‐jo̱bo̱ mbéo hi ro̱kè njoukouli, kè on ko̱ klime ji.

¹⁶ Ka name o̱kèo̱ loukou njoukouna makaou jo̱bo̱, ko̱ ling‐è ba Barabbas.

¹⁷ Da mono on ko̱ klime ndoï jing hana tou, Pilate mi sa hi kli: Oui ji ba mè sél ba guè hi oui lé Barabbas maléba Jésus, kè on ko̱ oui bi ling‐è ba Christ lé?

¹⁸ Baï ko̱ kè tou tou kli hi Jésus bi ndo̱kè ka ba fanahang.

¹⁹ Da ko̱ kème kaou kangala walabaï, waïn nè mi pi guè monè, ka sa Mo nding fèna mbéo jing njou‐guédék aïn ya; baï ko̱ mè to̱ko̱ssé toul fènli nyèta kassénaï ka lo̱la baï nè.

²⁰ Da loukou sacrificateurli tèn tangchidoli mi mong njoukouli nyèta ko̱ kaou ndourou baï an klime oui ba baï a Barabbas ka i Jésus.

²¹ Da njou‐name gangna mi féré sa, ka sa hi kli: Njoïli séré ba oui ji ba mè sél ba guè hi oui lé? Da kli sa ba: Barabbas.

²² Pilate mi sa hi kli: Da on yé mè nding ba fèn jing Jésus, kè on ko̱ oui bi ling‐è ba Christ lé? Kli bon mi sa: Oui bara nè bi di croix!

²³ Da njou‐name gangna sa: Békéfèn ba fèn ko̱ kè nding lé? Da kli bon wan njaka guè siya mingta ho, ka sa: Oui bara nè bi di‐croix!

²⁴ Da ko̱ Pilate mi ko̱ on ko̱ kème sa jing kli pélé, da ko̱ njakana mi nding baï guina, kè ya mbi ka tourou ndo̱kè rou an nona ro̱kè njoukouli on, ka sa: An mi ba rongo jing séme a njou‐guédék aïn. Da on ba baï abaï fèn baï.

²⁵ Da njoukouli bon mi féré sa, ka sa: Baï séme nè mi lé toula da toula goune nali kéng!

²⁶ Da on kè sél Barabbas hi kli da kè jo̱ Jésus ka baraza, da kè hi nè baï an klime bara nè bi di‐croix.

²⁷ Da afal tourougouli a njou‐name gangna mi sé jing Jésus an voul walabaï da kli ndoï sarang tourougouli bon guè monè.

²⁸ Da kli vourou la nè, da bou sèngnè la hi nè.

²⁹ Da kli toung mbélé ngassa di, da goukou toulè, da hi pakala an mboro wonron ndo̱kè; da kli houkou mbèlè ka gaï nè, ka sa: Woromon, nanjoukaou a Juifli!

³⁰ Da kli san same kon toulè, da bi pakala on da wan toulè rou.

³¹ Da ko̱ klime gaï nè tou, kli vourou la on ko̱ mi na moné, da kli bou ba dodok la nè fènè hi nè, da kli sé jing nè, ka bara nè bi di‐croix.

³² Da ko̱ klime tèn kala, kli ko̱ njoukou pou Cyrène, ling‐è ba Simon, kè on ko̱ kli to̱ko̱ssé hi nè baï séna jing kli, da on an kème ma baï hola di‐croix a Jésus.

³³ Da ko̱ klime kan guèl on ko̱ lingkè ba Golgotha, on mi ba guèl hourou toul,

³⁴ kli hi vin hi nè on ko̱ klime joukourou ka joungnafèn baï njonakè. Da ko̱ kème lé kè ji njonakè ya.

³⁵ Da ko̱ klime bara nè bi di‐croix tou, kli rou mbadé baï wala la nè jing hana,

³⁶ da kli kaou koukoula ka ènrèn guè monè an soko.

³⁷ Da klime dé none fèn on ko̱ klime sa kon toulè ka bara bi guè siya an laou toulè, ko̱ mi sa: ON BA JÉSUS NANJOUKAOU A JUIFLI.

³⁸ Da on kli mi ndé bara njou‐riyali séré jing Jésus kéng, mbéo an mboro wonron ndo̱kè da kènkè an mboro waïn ndo̱kè.

³⁹ Da kli on ko̱ ta ndourou, kli poukou nè ka tékéré toul kli,

⁴⁰ ka sa: Mo ko̱ bèngnèrèn temple ka kaïn za nè ma name saï, mo kou mono fèno! Tokoré mome yé ba Goune a Ouone mo diri an toul di‐croix gui tiya!

⁴¹ Da loukou sacrificateurli mi ndé gaï nè kéng jing njou‐to̱ko̱na guingnali tèn tangchidoli, ka sa:

⁴² Kème kou ba njou afékéli, kè ma baï kouna monè fèné ya! Tokoré kème ba nanjoukaou a Israël, oui yèng nè an kème diri gui tiya kassénaï an toul di‐croix, da yé na ma tou saon‐è.

⁴³ Kè vourou laou‐è bou mona Ouone; yèng a Ouone mi lé mbèlè kassénaï, tokoré kème jiji nè, baï ko̱ kème sa ba kè ba Goune a Ouone.

⁴⁴ Da njou‐riyali on ko̱ klime bara kli bi di‐croix jing nè, kli ndé oui njakè mabahana.

⁴⁵ Da ko̱ l’heure mi mane difala‐mbéo tou, guèl mi yiri kon toula koukoula bo̱l tèn l’heure difala‐nèng.

⁴⁶ Da ko̱ l’heure mi hèdi difala‐nèngkè Jésus mi wan njaka guè siya mingta, ka sa: Éli, Éli lama sabachthani? Fèn aïn mi sa ba: Ouone ni, Ouone ni, baïfèn da mo yèng mi lé?

⁴⁷ Da hanali an woro kli ko̱ mi o an ndourou, ko̱ klime la on, kli sa: Njoukou aïn di ba Élie.

⁴⁸ Da koukoulion hana mbéo a woro kli mi ngou, ka ya raro da kon on mba jing fona mbi lénadi, da kè gna on bi njaka pakala, ka hi Jésus an kème njo.

⁴⁹ Da garakèli mi sa: Oui yèng an name ko̱ kong ba yé Élie ma gui baï kouna nè?

⁵⁰ Da Jésus mi kaïn wan njaka guè siya mingta, da kè féré hi esprit nè.

⁵¹ Da mono loukou la voile ko̱ na an bil temple mi go̱ro̱ mane séré, ka siya bo̱l tèn tiya, da koukoula mi to̱ da kondi mi wélé,

⁵² da pali mi bourou, da houli a njou‐lana bilaouli nyèta ko̱ hou jinguèl mi tome tou.

⁵³ Kli tèn kala an pali afal ko̱ Jésus mi tome tou, da kli sé bil tangna fofoto pou, da kli tèn nona njoukouli nyèta.

⁵⁴ Da kabita tourougouli tèn kli on ko̱ sé jing nè, baï ènran Jésus da ko̱ klime ko̱ koukoula mi to̱, da fènli on ko̱ mi gui, da waou mi i kli nyèta, kli sa: Babaï, njoukou aïn ba Goune a Ouone.

⁵⁵ Da waïnli nyèta, ko̱ kaou dita mi ènrèn nè; kli on ko̱ sé bong an Jésus guè guèl Galilée, baï ndingna bakara hi nè.

⁵⁶ Da an woro kli on ba Marie an Magdala mi kaou tèn Marie ma a Jacques da Joseph, da ma a goundi a Zébédée.

⁵⁷ Da ko̱ bèlaléou mi lé tou, nguèra njoukou an pou Arimathée, ko̱ ling‐è ba Joseph mi gui, ko̱ ba mbé njou‐séna bong a Jésus kéng.

⁵⁸ Njoukou on mi sé guè mona Pilate, ka oui nè baï houl a Jésus. Da Pilate mi sa bi njakè baï hina nè.

⁵⁹ Da Joseph mi bi houlkè ka gna nè jing la lin ko̱ mi tang ta,

⁶⁰ da kè goro nè bil féké dodok pal amè fènè, ko̱ kè fél an bil kone ambèl. Da kè tou njaka pal on jing saou, ka ourou.

⁶¹ Da Marie an Magdala tèn Marie aféké makaou ndourou, kli kaou an toul pal on.

⁶² Da ko̱ guèl mi taka tou ko̱ ba name afal rèknafèn a Pâque, loukou sacrificateurli tèn pharisienli mi ndoï guè mona Pilate,

⁶³ ka sa: Njoï, laou na pane toul baï on ko̱ njou‐mongna fèn on mi sa, ko̱ kème pane yana jing na: Afal name saï yé mè ma tome an houl.

⁶⁴ Mono on, mo bi njako̱ an klime pèng pal on pouta bo̱l tèn name saïkè, baï ko̱ ka touya njou‐séna bong nèli ma gui ka ri houl amè, ka sa hi njoukouli: Kè tome an wora houli. Da yé sèkèrè mongnafèn mi bèlya ta ambèl.

⁶⁵ Pilate sa hi kli: Oui ya tourougouli, ka sé ka tou njakakè pouta ko̱ ouime mabongkè.

⁶⁶ Da ko̱ klime sé, kli tou njaka pal on pouta, ka fo̱ko̱ro̱ fal kone on, da pèng tourougouli bi bèlkè.