Saint Matthieu 21 - Féké Testament 1947

¹ Da ko̱ klime hèdi bèl pou Jérusalem, ka sé pou Bethphagé, an bèl souraguèl Olivier, da on Jésus mi pi njou‐séna bong nèli séré,

² ka sa hi kli: Oui sé guè bil pou on ko̱ na an bèl baï yo̱; da ko̱ ouime tèn bil pou on, koukoulion oui ma ko̱ torofio, ko̱ klime gna nè, da goune torofio jing nè; oui sèlè ka ya nè, gui moni.

³ Da tokoré njoukouna mi sa hi oui fèna, oui sa ba: Nanjou fènè mi ji kli. Da koukoulion kè ma pi kli.

⁴ Da baï mi gui mahana ka on, an tènrèn none baï ko̱ mi sa ka njaka prophète mi tèn kala ka babaï, ka sa:

⁵ Oui sa hi goune waïn a Sion: Mo ko̱, nanjoukaou no mi gui mono tou, Laou‐è mi vomboï, da kè hé toul torofio, Da toul goune wonron torofio.

⁶ Da njou‐séna bongli sé da nding mahana ko̱ Jésus mi sa bi njaka kli.

⁷ Da kli gui jing torofio da goune torofio on, da kli kon la aklili toul kli, da kè kaou toulè.

⁸ Da njoukouli nyèta an woro ro̱kè njoukouli on an ndourou, mi yaïli la aklili kon domboro; da afékéli mi hal goïdi, ka yaïli kon domboro.

⁹ Da ro̱kè njoukouli ko̱ dambèl hi Jésus, da kli on ko̱ sé fal, mi wan njaka, ka sa: Hosanna a David! Same kè on ko̱ mi gui ka ling a Nanjou. Hosanna a sèkèrè guèl ndèk an nonkala!

¹⁰ Da ko̱ kè kan pou Jérusalem tou, laou a njoukouli bon a pou on mi sé siya, kli sa: On ba guè lé?

¹¹ Da ro̱kè njoukouli mi sa: Kè ba prophète on, Jésus an pou Nazareth an guèl Galilée.

¹² Jésus mi ri sé guè bil temple a Ouone. Da kè ni kli bon tèn kala ko̱ jo̱l da zé fènli an bil temple, da sokoro tableli a njou‐komona mbo̱rili kon pa, tèn kangalali akli on ko̱ mi jo̱l nguédéli.

¹³ Da kè sa hi kli: Mahana ko̱ mi dé: Vouli bi lingkè ba voul hiouna Ouone, da oui mosso nè tèn ba kou a njou‐riyali.

¹⁴ Da njou‐foukoura nondi tèn njou‐komoronli mi gui monè an bil temple, da kè haï mone kli.

¹⁵ Da ko̱ loukou sacrificateurli tèn njou‐to̱ko̱na bong guingnali mi ko̱ kakaïya fènli on ko̱ kème nding, da goundi on ko̱ sa guè siya an bil temple, ka sa: Hosanna goune a David! Go̱ro̱ kli sé kli ta.

¹⁶ Da kli sa hi nè: Mo la baï on ko̱ klime sa lé? Da Jésus mi sa hi kli: Ii, oui tane ga kèn Takarata mbéo ya lé? ko̱ sa: Mo la jo̱na guédék ka ba njaka goundi da aïnli ko̱ ame pame.

¹⁷ Da kè yèng kli ka sé guè bil pou Béthanie, da na ndourou ka hangnachoung.

¹⁸ Ka guèlapélé ko̱ kème yé féra an loukou pou on, nzala i nè ta.

¹⁹ Da kè ko̱ di njouï an bèl domboro, kè gui bèlkè; da kè ko̱ lénakè ya, ba goïkè ho̱kè, kè sa hi di on: Bo̱l tèn kassénaï mo ma ba léna ba aféké tane tiya, kambèlè. Da koukoulion di njouï mi ho̱ko̱ bon.

²⁰ Da ko̱ njou‐séna bongli mi ko̱ fèn on, laou kli mi sé siya, kli sa: Di njouï mi ho̱ko̱ koukoulion mè lé?

²¹ Da Jésus mi féré sa, ka sa hi kli: Babaï, mi mé sa hi oui, tokoré ouime kaou ka tounassaon, da tane ndingna ka ndouri ya, yé oui nding fèn on ko̱ mi tèn di njouï aïn ka ho̱kè ya da on kéng, tokoré ouime sa hi souraguèl aïn: Mo ourou ka wou mono fèno sé bil loukou mbi tome, yé gui mahana ka on.

²² Da fènli on ko̱ ouime oui, ka mboro hiouna Ouone, ka la bilaou, yé oui jing.

²³ Da ko̱ Jésus mi gui an bil temple, loukou sacrificateurli tèn tangchidoli a njoukouli guè monè, ko̱ kè pane to̱ko̱na fèn, kli sa: Mo nding fèn aïnli ka ba ling a guè lé? da guème ko̱ sa bi njako̱ lé?

²⁴ Da Jésus mi féré sa, ka sa hi kli: Mè ji ouina oui ba none baï mbéo kéng, da tokoré ouime sa baï aïn hi mi, yé mè sa hi oui kéng, ka ba ling a guè mi mè nding fèn aïnli.

²⁵ Baptême a Jean mi gui ka hane dé? an nonkala, maléba an njoukouli lé? Da kli kèrè ka bo̱ko̱ go̱ro̱ kli jing hana, ka sa: Tokoré name sa ba: An nonkala, yé kè sa hi na: Baïfèn da oui tane ga la bilaou nè ya lé?

²⁶ Da tokoré name sa ba: An njoukouli, na waou ro̱kè njoukouli, baï ko̱ njoukouli bon mi kèrè ko̱ Jean ba prophète.

²⁷ Da kème féré sa hi Jésus, ka sa: Name tane tou ya. Kè sa hi kli kéng: Da on mè ba sanakè hi oui tane tiya, ka ba bil ling a guè, da mè nding fèn aïnli.

²⁸ Oui kèrè ba fèn lé? Njoukou mbéo mi mboung goune wonronli séré; da kè gui mona boutaïn goune, ka sa: Goune ni mo sé ka nding pina an bil waka lénadi kassénaï.

²⁹ Da kème féré sa, ka sa: Mè ji ya. Da afal kè hèkè mboro nè fènè, ka sé.

³⁰ Da kè guè mona an sérékè da sa mabahana. Da kème féré sa, ka sa: Yé mè sé nanjou, da kè tane sé ya.

³¹ Guème jing goune aïnli séré ko̱ kaou mara fal toula baba nè lé? Kli sa ba: Boutaïn goune. Jésus mi sa hi kli: Babaï, mi mè sa hi oui, njou‐mangna l’impôtli da waïn maïnli ma sé an bilkaou a Ouone ti dambèl hi oui.

³² Baï ko̱ Jean gui mone baï ka mboro ndingna guédék, da oui tane ga la bilaou‐è ya, da njou‐mangna l’impôtli tèn waïn maïnli mi la bilaou‐è; da ko̱ ouime ko̱ fèn on, oui tane ga hèkè békéfèn abaï fèn baï koukoulion ya, an ouime la bilaou‐è.

³³ Oui la ébèlbaï aféké: Jinguèl njoukou mbèo makaou ko̱ ba nanjou voulou, ko̱ pa waka lénadi. Kè èng bang gui ki rou bon, da kè dang lo̱ko̱ baï do̱ko̱na lénadi, da za gangnafèn; da bi njou‐ko̱ra wakali rou, ka ourou sé guè pou aféké.

³⁴ Da ko̱ name doura lénadi mi hèdi tou, kè pi njou‐bakara nèli guè mona njou‐ko̱rali baï yana lénadi a waka nè.

³⁵ Da njou‐ko̱rali mi ba njou‐bakara nèli ka wan mbéo, ka i aféké, ka wou a saïkè.

³⁶ Kè pi njou‐bakara afékéli nyèta ta ambèl, da njou‐ko̱ra wakali mi nding jing kli mabahana.

³⁷ Da afal kè pi dodok goune nè guè mone kli, ka sa: Kli ma dik goune ni.

³⁸ Da ko̱ njou‐ko̱ra wakali mi ko̱ guina a goune, kli kang jing hana: Kè on ba njou‐yana pélé; oui gui an name i nè, ka fan fèn pélé nè bon.

³⁹ Da klime ba nè, da wou nè bou kala an njaka waka, ka i nè.

⁴⁰ Mono on, ko̱ nanjou a waka lènadi mi gui, yé kè ma nding ba fèn jing njou‐ko̱ra waka lénadili on lé?

⁴¹ Kli sa hi nè: Yé kè i béké njoukou aïnli, ka ba houl gbado, da hi waka hi njou‐ko̱ra afékéli, ko̱ ma hi lénadi ni nè, ka name do̱ko̱na lénadi.

⁴² Jésus mi sa hi kli: Oui tane ga kèn Takarata a Ouone bo̱ko̱ mbéo ya lé? Kone aïn ko̱ njou‐zana voulouli mi pong nè tou, Kone on mi tèn ba loukou kone bina kourou voulou; Fèn aïn gui ka Nanjou, Da on ba kakaïya fèn an nona.

⁴³ Mono on, mè sa hi oui, yé bilkaou a Ouone ma ourou an ndo̱ko̱ baï, ka hi pime pou aféké ko̱ ma lé lénakè rou.

⁴⁴ Da kè on ko̱ mi lé toul kone aïn, yé kè haou monè, da njoukou on ko̱ kone aïn mi lé toulè, yé kè ma san, mahana ka sassal.

⁴⁵ Da ko̱ loukou sacrificateurli da pharisienli mi la ébèlbaï nèli, kli toutou ko̱ Jésus sa toul kli.

⁴⁶ Da ko̱ klime nza mborokè baï bana nè; kli waou rokè njoukouli, baï ko̱ klime ko̱ nè mahana ka ba prophète.