Saint Matthieu 20 - Féké Testament 1947

¹ Baï ko̱ bilkaou a nonkala mi mahana ka njoukou ko̱ ba nanjou‐voulou, ko̱ tèn kala ka guèlapélé chout baï nzana njou‐pinali baï waka lénadi nè.

² Da ko̱ kème kèn mbo̱ri dénier mbéo ka name mbéo hi kli, da kli ji bo̱ko̱kè, kè pi kli sé bil waka lénadi nè.

³ Da ko̱ kème sé kala l’heure mi hèdi saï, da kè ko̱ njoukou afékéli mi o bo̱on an guèl zénacho̱ko̱,

⁴ kè sa hi kli: Oui sé guè bil waka lénadi on kéng, yé mè ma hi bèlafèn hi mo. Da kli sé ndourou.

⁵ Kè kaïn sé kala ba aféké ko̱ l’heure mi hèdi difala‐mbéo, da l’heure mi ndé hèdi difala‐nèng, ka nding mahana ka ambèl.

⁶ Ko̱ l’heure mi hèdi botoulè‐mbéo, kè sé kala ka nza afékéli ko̱ mi o bo̱on, da kè sa hi kli: Baïfèn da oui o bo̱on guèbassoko lé?

⁷ Klime féré sa hi nè: Baï ko̱ njoukouna mi tane ga to̱ko̱ pina hi na ya. Kè sa hi kli: Oui sé guè bil waka lénadi on kéng.

⁸ Da ko̱ bèlaléou mi lé tou, nanjou a waka lénadi mi sa hi njou‐pèngna fèn nè: Mo di njou‐pinali bon gui, ka hi mbo̱ri hi kli ko̱ klime jing, mo tissaon jing sèkèrèkè bo̱l tèn titilikè.

⁹ Da ko̱ klime gui, aïn ko̱ tissaon pina ko̱ l’heure mi nding baï mana botoulè‐mbéo, kli ya njoukou mbéo dénier mbéo.

¹⁰ Da ko̱ titili njoukouli mi gui, kli kéré ba yé kli ma jing ta afékéli; da kli ndé ya mabahana, mono njoukou mbéo dénier mbéo kéng.

¹¹ Da ko̱ klime ya akli tou, kli gnonron nanjou‐voulou,

¹² ka sa: Sèkèrè njoukou aïnli mi nding akli ma l’heure mbéo bo̱l, da mo hi kli mahana ko̱ mome hi na, ko̱ na nding pina ka guèlapélé bo̱l tèn bèlaléou, ko̱ séssé mi jang maïya da na tanta.

¹³ Da kème féré sa, ka sa hi hana mbéo a zéng kli: Bakola ni, mè tane ga pènrèn ndo̱ko̱ jing mo ya; mo ji bo̱ko̱kè jing mi baï toul dénier mbéo ya lé?

¹⁴ Mo ya fèn aïn ko̱ ba amo, ka ourou; ba mè ji hina njou‐sèkèrèkè mahana ko̱ mème hi mo.

¹⁵ Ka mboro guingna mè ma baï ndingna jing fèn nili mahana ko̱ mè jiji ya lé? Maléba nono mi bèlya baï ko̱ mè bèlta lé?

¹⁶ Mono, yé sèkèrèkèli ma féré tèn titilikèli, da yé titilikèli ma féré tèn sèkèrèkèli.

¹⁷ Da ko̱ Jésus mi hé sé guè pou Jérusalem, kè ya njou‐séna bong nèli botoulè‐séré ka foli, da kè sa hi kli an domboro:

¹⁸ Mono, name hé sé guè pou Jérusalem, da yé kli ma hi Goune a njoukou bi ndo̱ka loukou sacrificateurli tèn njou‐to̱ko̱na bong guingnali. Da yé kli ma kon barabaï houl toulè.

¹⁹ Da kli ma souti nè hi Gentili an klime gaï nè, ka jo̱ nè jing baraza, ka bara nè bi di‐croix; da yé name a saïkè kè ma tome an houl.

²⁰ Da on, ma a goundi a Zébédée mi gui mona Jésus jing goune nèli, da houkou mbèlè ka hiou nè, baï ouina fèn jing nè.

²¹ Da kè sa hi nè: Mo ji ba fèn lé? Kè sa hi Jésus: Mo sa bi njaka goune wonron nili séré on, aïn mbèo mi kaou an mboro wonron ndo̱ko̱, da aïn mbéo an mboro wain ndo̱ko̱ an bilkaou no.

²² Da Jésus mi féré sa, ka sa: Oui tane tou fèn on ko̱ ouime oui ya. Oui mabongkè baï njona kopo aïn ko̱ mè nding baï njonakè lé? Kli sa hi nè: Na mabongkè.

²³ Da kè sa hi kli: Ka babaï, yé oui ma njo kopo ni; da baï kaouna mboro wonron ndo̱ko̱ ni malèba mboro waïn ndo̱ko̱ ni, ti ba baï ni baï hinakè ya, yé Baba ni mi to̱ko̱ guèl kaouna hi kli, ko̱ kème mosso baï kli.

²⁴ Da garakèli bo mi la baï on, go̱ro̱ kli mi sé kli ta jing yindi séré on.

²⁵ Da Jésus mi di kli guè monè, ka sa: Oui toutou zaworoli a gentili mi ba njaka kli, da loukou njoukou klili mi na gangna toul kli.

²⁶ Da tane ti on an woro baï ya: Da njoukouna ko̱ mi ji tèna ba loukou njoukou an woro baï, yé kè ma tèn ba njou‐bakara hi oui;

²⁷ da njoukouna ko̱ mi ji tèna ba titilikè an woro baï, yé kè tèn ba ko̱ï abaï,

²⁸ mahana ka Goune a njoukou mi tane ga gui ba baï yana bakara ya, da ba baï ndingna bakara tèn baï hina yana nè baï chona njoukouli nyèta.

²⁹ Da ko̱ klime tèn kala pou Jéricho tou, ro̱kè njoukouli nyè maïya mi sé fala Jésus.

³⁰ Da mono, njou‐foukoura nondi séré mi kaou bèl domboro. Ko̱ klime la ba Jésus ma ta domboro, kli sa guè siya, ka sa: Nanjou, mo Goune a David, mo nding haïo hi na!

³¹ Mono, ro̱kè njoukouli mi to kli, an klime kaou ka njaka kli; da kli sa ba sanakè mingta, ka sa: Nanjou, mo Goune a David, mo nding haïo hi na!

³² Da Jésus o da di kli, ka sa: Oui ji ba mè nding ba fèn jing oui lé?

³³ Kli sa hi nè: Nanjou na ji ba nona mi bourou.

³⁴ Da Jésus mi ko̱ kli passé ta, da kè da none kli; da koukoulion, kli ko̱ guèl bèlta, da kli sé falè.