Saint Matthieu 2 - Féké Testament 1947

¹ Ko̱ Jésus mi tèn a pou Bethéhem guèl Judée, name ko̱ Hérode ba nanjoukaou, mono on, ho̱ko̱na njoukouli mi ourou ka mboro tènassé ka gui pou Jérusalem, ka sa:

² Kè on ko̱ mi tèn ko̱ ba nanjoukaou a Juifli, kè an hane dé? baï ko̱ name ko̱ mèssè nè mi tèn ka mboro tènassé, da na gui baï hiouna nè.

³ Da ko̱ nanjoukaou Hérode mi la baï on, monè mi hou mbi, tèn njoukouli an pou Jérusalem bon jing nè kéng.

⁴ Da ko̱ kème ndoï loukou sacrificateurli da njou‐to̱ko̱na bong guingnali bon a njoukouli, da kè oui kli ba guèl ko̱ Christ mi tèn an hane dé?

⁵ Da klime, féré sa, hi nè: An pou Bethléhem guèl Judée; baï ko̱ prophète mi dé bi takarata on:

⁶ Da mo, Bethléhem, koukoula a Juda, Mo tane ti ba lélé pou an wora loukou pouli a Juda ya, Da yé njou‐name gangna ma tèn kala an bilo̱. Ko̱ nding baï kora Israël, njoukou nili.

⁷ Mono, Hérode di ho̱ko̱na njoukouli ka foli, ka oui kli ba mèssè aïn tèn name ro̱ko̱ ane dé?

⁸ Da kè pi kli sé guè pou Bethléhem, ka sa: Oui sé ka tou saon baï a joï goune on tang ta, da ko̱ ouime jing nè, oui gui ka sa hi mi, an mème sé ka ndé hiou nè kéng.

⁹ Da afal ko̱ klime la baï a nanjoukaou aïn tou, kli ourou ka sé. Da mono mèssè on ko̱ klime ko̱ jinguèl ka mboro tènassé, mi sé amè dambèl hi kli bo̱l tèn mi kan ka o toul guèl ko̱ joï goune mi kaou rou.

¹⁰ Da ko̱ klime ko̱ mèssè aïn, kli jangndaï ka ba wala.

¹¹ Da kli ri guè voulou ka ko̱ joï goune kira Marie, ma nè, kli lé bou koukoula, ka hiou nè; kli bi fèn nguèra aklili, ka hi toul ndo̱ko̱ l’or, yombo da myrrhe hi nè.

¹² Da Ouone mi wara kli ka lo̱la, baï an klime féré guè mona Hérode ya, klime féré sé pou kli ka mbora aféké katoul.

¹³ Da ko̱ klime sé tou, mono ange a Nanjou mi tèn gui mona Joseph ka lo̱la, ka sa: Mo ourou siya ka bi joï goune tèn ma nè, ka ngou sé guè pou Égypte, da mo kaou soko bo̱lgo̱ ko̱ mème sa hi mo da; baï ko̱ yé Hérode ma nza joï goune aïn baï ina nè.

¹⁴ Da kè ourou siya ka hangnachoung ka bi joï goune tèn ma nè, ka sé guè pou Égypte tou.

¹⁵ Da kli kaou soko, bo̱l tèn houl a Hérode, an tènrèn none baï ko̱ Nanjou mi sa ka njaka prophète mi tèn kala ka babaï, ka sa: Mè di goune ni tèn kala an pou Égypte.

¹⁶ Ko̱ Hérode mi ko̱ko̱ ko̱ ho̱ko̱na njoukouli mi yèn jing nè, hèrè mi mba nè ta, da kè pi baï ina goune wonronli bon, an pou Bethléhem da an bilkaou nè, ko̱ tèn ma saka séré, da aïnli ko̱ mi tane ga ma saka on ya, ko̱ ma ka séssé o̱kèo̱ ko̱ ho̱ko̱na njoukouli mi to̱ko̱ hi nè.

¹⁷ Da on, tènlên none baï ko̱ mi sa ka njaka prophète Jérémie mi tèn kala ka babaï tou, ka sa:

¹⁸ Kli la wananjaka a Rama, Lénaléou da wananjaka houl nyèta, Rachel di sing léou baï goune nèli, Da ji baï bina laou‐è guè tiya ya. Baï ko̱ klime tane tiya.

¹⁹ Da ko̱ Hérode mi hou tou, mono, ange a Nanjou mi tèn gui mona Joseph ka lo̱la an pou Égypte, ka sa:

²⁰ Mo ourou siya ka bi joï goune tèn ma nè, ka sé guè koukoula Israël, baï kli on ko̱ nza mborokè baï ina joï goune aïn mi hou tou.

²¹ Da Joseph mi ourou siya ka bi joï goune tèn ma nè, ka sé guè koukoula Israël tou.

²² Da ko̱ kème la ba Archélaüs mi na gangna toul guèl Judée guèl bo̱ka baba nè Hérode, waou i nè ta, baï féra sé soko. Da baï ko̱ Ouone mi wara nè ka lo̱la mi kè sé guè koukoula an guèl Galilée,

²³ da kè gui ka kaou pou aïn ko̱ klime bi lingkè ba Nazareth, an tènrèn none baï ko̱ mi sa ka njaka prophèteli mi tèn kala ka babaï: Kli ma bi ling‐è ba njou‐Nazaréen.