Saint Matthieu 19 - Féké Testament 1947

¹ Da baï mi gui mahana ka on ko̱ Jésus mi sa baïnjaka aïnli o̱tou, kè ourou an guèl Galilée, ka sé guè sél koukoula an guèl Judée an fal mbi Jourdain.

² Da ro̱kè njoukouli nyè maïya mi sé falè, da kè haï mona njou‐jangmali an ndourou.

³ Da pharisienli mi guè monè baï léna nè, ka sa: Ka mboro guingna ma an njoukou mi yèng waïn nè baï baïli bon lé?

⁴ Da kème féré sa, ka sa: Oui tane ga kèn Takarata ya lé, kè on ko̱ mosso kli jinguèl ka titilikè, kè mosso kli ba wonronkè da waïnkè,

⁵ da kè sa: Baï aïn mi ko̱ wonron njoukou ma ourou an mona baba tèn ma nè, da yé kè ma ndoï jing waïn nè, da kli séré ma gui naïn‐mone mbéo ya lé?

⁶ Mono on, kli tane ti séré ba aféké ya, da kli ba naïn‐mone mbéo bo̱l, mono on, fèn aïn ko̱ Ouone mi ba bi mbo̱lo̱ hana tane ti ba an njoukouna mi sél kon ya.

⁷ Kli sa hi nè: Baïfèn da Moïse mi sa bi njaka, baï hina takarata an klime wal hana, da yèng waïn lé?

⁸ Kè sa hi kli: Baï ko̱ go̱ro̱ baï mi na bang, mono mi ko̱ Moïse sa oui ma yèng waïn abaï; da ka titilikè, tane ti on ya.

⁹ Da mè sa hi oui, njoukouna ko̱ mi yèng waïn nè, wara aïn ko̱ kème nding rome ya, da kème é waïn aféké, kème nding maïn, da njoukouna ko̱ mi é waïn on ko̱ kème yèng nè tou mi nding maïn.

¹⁰ Da njou‐séna bongli mi sa hi nè: Tokoré baï hana mana jing wonron kira waïn nè, dadaon an klime tane é hana ya.

¹¹ Da kème sa hi kli: Njoukouli bon ma baï lana baï aïn ya, bo̱l ba a kli on ko̱ kè hi kli ka ho̱kè.

¹² Baï ko̱ founa njoukou mana ko̱ ma nè mi mboung on; aféké ba founa ko̱ njoukouna mi fou nè; aféké mi kaou bo̱on ba klime ji fèn kli, baï toul bilkaou a nonkala. Kè ko̱ ma baï yana baï aïn kème ya nè.

¹³ Da kli fan lélé goundi guè monè, an kème goukou ndo̱kè toul kli, da sa jojo Ouone kon toul kli. Da njou‐séna bongli mi to kli on ko̱ mi ya lélé goundi on gui.

¹⁴ Da Jésus mi sa: Oui yèng lélé goundi an klime gui moni, ka tane dèn kli bi ya; baï ko̱ bilkaou a nonkala ba baï akli on ko̱ mi mahana ka lélé goune aïnli.

¹⁵ Da kè goukou ndo̱kè toul kli, da kè ourou an ndourou ka sé.

¹⁶ Da mono, njoukouna mbéo mi guè mona Jésus, ka sa: Njou‐to̱ko̱nafèn, yé mè nding bèla fèn ba fèn an mème jing yana kambèlè lé?

¹⁷ Da kème sa hi nè: Baïfèn da mo oui mi toul fèn ko̱ bèlta lé? Hana mbéo bo̱l mi ko̱ bèlta, ko̱ ba Ouone. Da tokoré mome ji jingna yana kambèlè, mo bou fal bina baïnjaka guingna.

¹⁸ Da njoukou on mi sa hi nè: Njaka guingna ba fèn lé? Da Jésus mi sa: Mo i njoukou ya; mo nding maïn ya; mo ri fèn ya; mo sa bongbaï wo̱ko̱ ya;

¹⁹ mo dik baba tèn ma no; da mo sé hang ba no mahana ka ba mono fèno.

²⁰ Bala goune mi sa hi nè: Fèn aïnli bon mè bou falkè guèbassoko; garakè pane ba fèn lé?

²¹ Jésus sa hi nè: Tokoré mome ji guina guédék mo sé ka jo̱l fèn noli bon, ka hi foïna njoukouli, da yé mo ma jing nguèra an nonkala. Da mo gui ka sé fali.

²² Da ko̱ bala goune mi la baï on, kè ourou ka go̱ro̱ séta; baï ko̱ kème jing fènli nyè maïya.

²³ Da Jésus mi sa hi njou‐séna bong nèli: Babaï, mi mè sa hi oui, on lata baï a nguèra njoukou mi ri bilkaou an nonkala.

²⁴ Da mè sa hi oui ba aféké, on laïya baï an chameau mi tèn lo̱ko̱ tène, ka lata baï an nguèra njoukou mi ri bilkaou a Ouone.

²⁵ Da ko̱ njou‐séna bongli mi la baï aïn, laou kli mi sé siya, nyèta, ka sa: Da on yé guème mabongkè baï kouna lé?

²⁶ Da Jésus mi ènrèn guè mone kli, ka sa hi kli: Mbéya a njoukouli mana bongkè tane tiya, ka mbéya an Ouone yé fènli bon mi mabongkè.

²⁷ Da on Pièrre mi féré sa, ka sa hi nè: Mo ko̱ na yèng fènli bon baï séna falo̱; da on, yé na ma jing ba fèn lé?

²⁸ Da Jésus mi sa hi kli: Babaï, mi mè sa hi oui, ka name baï féra ndingna fèn ba aféké, ko̱ Goune a njoukou makaou an kangala njaka bara nè ka jonafèn amè, oui kéng ko̱ gui bong ni, yé oui kaou kangala njaka bara botoulè‐séré, baï wala baï ka douk a Israël botoulè‐séré.

²⁹ Da njoukouli bon ko̱ mi yéng voulouli, maléba yindi, maléba njo̱‐waïn fènli maléba baba, maléba ma, maléba waïn, maléba goundi, maléba sél koukoulali, baï toul ling ni, yé kè ma ya toul ndo̱kè bo̱ko̱ té, da yé kli yapélé yana kambèlè.

³⁰ Da njoukouli nyèta ko̱ ba titilikèli ma féré tèn ba sèkèrèkèli, da sèkèrèkèli ma féré tèn ba titilikèli.