Saint Matthieu 17 - Féké Testament 1947

¹ Da afal name difala‐mbéo Jésus mi ya Pièrre da Jacques, da yine nè Jean jing nè, da kè hé sé jing kli guè laou gangna souraguèl hana mbéo ka foli.

² Da kè komo monè an none kli; nona Jésus mi cha mahana ka séssé, da la nè mi poukou mahana ka takanafèn.

³ Da mono, Moïse tèn Élie mi tèn gui mone kli, da sa baï jing nè.

⁴ Da Pierre mi féré sa, ka sa hi Jésus: Nanjou, dadaon an name kaou guèl aïn. Tokoré mome jiji yé mè bara tenteli saï an guèl aïn; aïn mbéo ba baï no, da aïn mbéo ba baï a Moïse, da kènkè ba baï a Élie.

⁵ Da ko̱ kème pane sana baï on, yiri mbame on mi gui ka goukou toul kli ko̱ mi cha ta. Da mono, bounaka mi ba gui ka bil yiri mbame on, ka sa: Kè on ba Goune ni ko̱ mème sé hang‐è nyèta, ko̱ mi bi wélé touli ta: oui la nè!

⁶ Da ko̱ njou‐séna bongli mi la baï on, kli lé ka goukou none kli koukoula, ka waou mi i kli ta.

⁷ Da Jésus gui, ka da kli, ka sa: Oui ourou siya, ka nding waou ya!

⁸ Da ko̱ klime bi none kli guè siya tou, kli tane ga ko̱ njoukouna mbéo ya, bo̱l ba Jésus ka ho̱kè.

⁹ Da ko̱ klime yé dira an toul souraguèl, Jésus mi gna bi njaka kli, ka sa: Oui sa bong fèn on ko̱ ouime ko̱ hi njoukouna mbéo ya, bo̱l tèn ko̱ Goune a njoukou mi tome an wora houlkèli da.

¹⁰ Da njou‐séna bong nèli mi oui nè, ka sa: Baïfèn da njou‐to̱ko̱na bong guingnali mi sa ba yé Élie ma ti gui dambèl lé?

¹¹ Da kème féré sa, ka sa: Babaï, yé Élie mi gui ti dambèl, da ma féré rèk fènli bon,

¹² da mè sa hi oui, ko̱ Élie mi gui tou, da kli tane tou nè ya, da kli nding jing nè mahana ko̱ klime jiji. Da on, yé kli ma ndé to̱ko̱ssé hi Goune a njoukou kéng.

¹³ Da on, njou‐séna bongli mi tou nguite ko̱ kè sa hi kli ba toula Jean‐Baptiste.

¹⁴ Da ko̱ klime tèn gui mona ro̱kè njoukouli, njoukouna mbéo mi gui mona Jésus ka houkou ka njaka toukè, da sa.

¹⁵ Nanjou, mo nding haïo hi goune ni, baï ko̱ kou mi nding nè, da to̱ko̱ssé hi nè nyèta; kè lé hèlè, da mbi bo̱ko̱ ro̱ko̱ta.

¹⁶ Da mè ya nè guè mona njou‐séna bong noli, da kli tane mabongkè baï haïna né ya.

¹⁷ Da Jésus mi féré sa, ka sa: O! mèran njoukou aïnli ko̱ kaou ka ba ndouri, da sé maï maï, yé mè kaou jing oui bongkè di ane dé? da yé mè panran oui bo̱ko̱ ro̱ko̱ ane dé? Mo ya nè gui moni.

¹⁸ Da Jésus mi to zabolo, da kè tèn kala an monè; da mona goune on mi haï tou, ka ba mbé l’heure o̱kèo̱.

¹⁹ Da on, njou‐séna bongli mi guè mona Jésus ka foli, ka sa: Baïfèn da na tane mabongkè baï nina zabolo aïn tèn kala ya lé?

²⁰ Da Jésus sa hi kli: Baï ko̱ tounassaon abaï nyèya. Babaï, mi mè sa hi oui, tokoré tounassaon abaï mi mahana ka mèrèn sénevé, yé oui sa hi souraguèl aïn: Mo ourou sé guèl o̱, da kè ma ourou; da fèna tane ti baï tana oui ya.

²¹ Da zabolo aïn tane ma baï tèna kala ya, wara ka ba mboro hiouna Ouone, ka chang laka ya.

²² Da ko̱ klime pane séna guè guèl Galilée, Jésus mi sa hi kli: Yé kli ma souti Goune a njoukou bi ndo̱ka njoukouli;

²³ da kli ma i nè, da name a saïkè, yé kè ma tome a houl. Da go̱ro̱ kli mi sé kli maïya.

²⁴ Da ko̱ klime gui pou Capernaüm, kli ko̱ mang l’impôt drachmeli séré gui mona Pierre, ka sa: Njou‐to̱ko̱nafèn no mi ndé hi l’impôt drachmeli séré kèng ya lé?

²⁵ Kè sa: Ii. Da ko̱ kè ri guè voulou, Jésus sa ti dambèl hi nè, ka sa: Simon, mo kèrè ba fèn lé? Nanjoukaouli a koukoula mang l’impôt da tribut an guè lé? ka goune klili maléba ka goni njoukouli lé?

²⁶ Pierre mi sa hi nè: Ka goni njoukouli. Da Jésus mi sa hi nè: Mono, goundi on kaou bo̱on.

²⁷ Da baï ko̱ na tane ga ti jing kli ba fèn bèna ya, mo sé guè loukou mbi, ka bou boï, da titili njouï ko̱ mi ba boï; mo bourou haou‐è, yé mo ko̱ mbo̱ri statère. Mo bi nè, da hi nè hi kli baï l’impôt ni da amo.