Saint Matthieu 15 - Féké Testament 1947

¹ Da on, njou‐to̱ko̱na bong guingnali da pharisienli an pou Jérusalem guè mona Jésus, ka sa:

² Baïfèn da njou‐séna bong noli mi moungnourou tang baï a tangchidoli lé? Baï ko̱ klime tane ga tourou ndo̱ko̱ kli ya ko̱ klime yé sona laka.

³ Da kème féré sa, ka sa hi kli: Oui kéng baïfèn da oui moungnourou bina baïnjaka guingna a Ouone, baï pèngna tang baï abaï lé?

⁴ Baï Ouone sa: Mo dik baba no da ma no; da: Kè ko̱ poukou baba nè maléba ma nè, dadaon ma an kème hou.

⁵ Da oui sa: Yé kè on ko̱ sa hi baba nè maléba ma nè: Bèlafèn ni on ko̱ mi lé mbèlo̱, mè hi Ouone tou.

⁶ Mono kè tane ga dik baba nè maléba ma nè ya. Da oui aïli bina baïnjaka guingna Ouone baï pèngna tang baï abaï.

⁷ Oui njou‐mongnafènli, Ésaïe mi to̱ko̱ bong njaka Ouone bèlta toul baï jinguèl, ka sa:

⁸ Njoukou aïnli mi dik mi ka ba njaka kli, Da go̱ro̱ kli mi na dita jing mi.

⁹ Da klime hiou mi bo̱on, Ka to̱ko̱ to̱ko̱nafèn akli ka ba bina baïnjaka a njoukouli.

¹⁰ Da kè di ro̱kè njoukouli guè monè, ka sa hi kli: Oui la, da oui tou nguite.

¹¹ Fèn ko̱ mi ri haou, mi tane ga nding njoukou tèn ba dakame ya; da ba fèn on ko̱ mi tèn gui kala an haou mi ko̱ nding njoukou tèn ba dakame.

¹² Da on, njou‐séna bongli mi gui, ka sa hi nè: Mo tane ga tou ya ko̱ on mi tèn jing pharisienli ba fèn bèna, ko̱ klime la baïnjaka on.

¹³ Da kème féré sa, ka sa: Gora fènli bon ko̱ Baba ni an nonkala mi tane goro ya, yé kè lourou.

¹⁴ Oui yèng kli, baï ko̱ kli ba njou‐foukoura nondi, ko̱ ko̱ko̱ ba nè njou‐foukoura nondi. Da tokoré njou‐foukoura none mi ko̱ko̱ ba nè njou‐foukoura none, kli séré bon ma lé lo̱ko̱.

¹⁵ Da Pièrre mi féré sa, ka sa hi nè: To̱ko̱ hi na saon a ébèlbaï on.

¹⁶ Da kè sa: Oui kéng, oui kaou bo̱on, tane tounakè nguite lé?

¹⁷ Oui tane ga tou, fèn ko̱ ri haou, ta sé bila njoukou, da afal da, sé kon pa ya lé?

¹⁸ Da fèn on ko̱ mi tèn gui kala an haou a njoukou tèn ka bo̱ko̱ go̱rè, da fèn on mi nding njoukou tèn ba dakame.

¹⁹ Baï ko̱ fèn on ko̱ mi tèn kala a bil go̱ra njoukouli ba béké kèrafèn, da ina njoukou, da ndingna maïn tèn ba ndingna rome, da riya, da bongbaï wo̱ko̱, da kèkènafèn.

²⁰ Fèn on ba fèn ko̱ mi nding njoukou tèn ba dakame; da sona laka tane toura ndo̱ko̱ tane ga nding njoukou tèn ba dakame ya.

²¹ Da Jésus ourou an ndourou ka sé guè koukoula Tyre tèn Sidon.

²² Da mono, waïn Cananéenne mi ourou an koukoula an ndourou, ka gui, da wan njaka, ka sa: Nanjou mo Goune a David, mo nding haïo hi mi! Zabolo mi to̱ko̱ssé hi goune waïn ni nyèta.

²³ Da kè tane féré sa baïnjaka hi nè ya. Da njou‐séna bong nèli mi gui ka sa jo̱jo̱ nè, ka sa: Mo pi nè sé fal, baï ko̱ kème wan njaka an bong na.

²⁴ Da kème féré sa, ka sa: Mè gui baï a badouali ko̱ mi bo̱l an voula Israël, ka ho̱kè.

²⁵ Da waïn mi gui ka houkou mbèlè ka hiou nè, ka sa: Nanjou, mo lé mbèli!

²⁶ Da kème féré sa, ka sa: On tane ti bèlta ya, baï yana tarou an ndo̱ka goundi ka wou bou hi mvali.

²⁷ Da waïnkè mi sa: Babaï Nanjou, da mvali mi son goune boutoukè ko̱ mi ta lé an bo̱ko̱ table a nanjou akli.

²⁸ Da Jésus mi féré sa, ka sa hi nè: O waïn, tounassaon no ba loukoukè, mi nding hi mo, mahana ko̱ mome ji. Da mono goune waïn nè mi haï tou, ka mbé l’heure o̱kèo̱.

²⁹ Da Jésus ourou an ndourou ka sé diya jing loukou mbi an guèl Galilée, da kè hé toul souraguèl ka kaou an ndourou.

³⁰ Da ro̱kè njoukouli nyè maïya mi guè monè, da kli gui jing njou‐komoron ka bo̱ko̱ kli, da njou‐foukoura nondi, da mbo̱li, da njou‐komoron ka ndo̱ko̱ kli, da njou‐jangma afékéli nyèta jing kli. Da kli yèng kli kon bèl bo̱ka Jésus, da kè haï mone kli;

³¹ mi ko̱ laou a ro̱kè njoukouli sé siya, da ko̱ klime ko̱ko̱ ba mbo̱li mi sa baï, da njou‐komoron ka ndo̱ko̱ kli mi haï tou, da njou‐komoron ka bo̱ko̱ kli mi sé siya, da njou‐foukoura nondi mi ko̱ guèl; kli jone Ouone a Israël.

³² Da Jésus mi di njou‐séna bong nèli guè monè, ka sa: Mè ko̱ ro̱kè njoukouli passé ta, baï ko̱ klime laïbi jing mi ma name saï, da tane ga son laka ya. Da mè ji pina kli sé guè fal tane sona laka ya, ka touya kli ma kpéme an domboro.

³³ Da njou‐séna bongli mi sa hi nè: Yé na jing tarou an woropa an hane, an ro̱kè njoukouli on mi son ka mba lé?

³⁴ Da Jésus sa hi kli: Tarou ro̱ko̱ ane an ndo̱ko̱ baï lé? Da kli sa: Difala‐séré, da goune njouï nyè ya.

³⁵ Da kè sa bi njaka ro̱kè njoukouli, an klime kaou koukoula.

³⁶ Da kè ya tarou difala‐séré on da njouïli on, kè kaou koukoula hi Ouone, ka haou ka hi njou‐séna bongli, da njou‐séna bongli mi hi ro̱kè njoukouli on.

³⁷ Da kli bon mi son ka mba, da kli fan gara boutoukèli ko̱ na, mba karo difala‐séré.

³⁸ Da kli on ko̱ son ba wonron njoukouli mane ténakè‐bongkè‐nèng, tane waïnli da goundi ya.

³⁹ Da kè sa hi ro̱kè njoukouli on an klime sé, da kè hé kombone, da sé guè sél koukoula an guèl Magadan.