Saint Matthieu 14 - Féké Testament 1947

¹ Ka name o̱kèo̱, Hérode ko̱ ba tétrarque, la baï toula Jésus,

² da sa hi njou‐bakara nèli: On ba Jean‐Baptiste! Kè tome an wora houli, da mono baï on mi ko̱ kème nding njèran pinali.

³ Baï ko̱ Hérode mi ba Jean jinguèl ka gna nè ka bou nè jo̱bo̱, baï toula Hérodias, waïn a Philippe, ko̱ ba yine nè,

⁴ baï ko̱ Jean sa hi nè: Ka mboro guingna mo tane ma baï yana nè ka waïn ya.

⁵ Da kè ji baï ina nè, kè waou ro̱kè njoukouli on baï ko̱ klime ko̱ Jean mahana ka ba prophète.

⁶ Da ko̱ loukou name mboungna Hérode mi gui tou, goune waïn a Hérodias mi ndandaï an nona goroli, da on bi wélé toula Hérode ta.

⁷ Da baï on ko̱ kème bi gonjakè ka han fèn, ba fèn ko̱ kème oui nè, yé kè hi nè.

⁸ Da afal ko̱ ma nè mi jo̱lè tou, kè sa: An guèl aïn kassénaï, mè ji mo koung toula Jean‐Baptiste bou bil loukou tassi hi mi.

⁹ Da go̱ra nanjoukaou mi sé nè nyèta. Da baï on ko̱ kème han fèn tou; da baï a goroli on ko̱ kaou baï sona laka jing nè, kè sa bi njaka kli, an klime hi fèn on hi nè.

¹⁰ Da kè pi njoukou baï koungna sola Jean ko̱ kaou jo̱bo̱.

¹¹ Da kè bi toula Jean an bil loukou tassi da hi goune waïn on, da kè sé rou hi ma nè.

¹² Da njou‐séna bong nèli mi gui ka bi houlè ka goro nè, da kli sé ka sa bongkè hi Jésus.

¹³ Da ko̱ Jésus mi la baï on, kè ourou an ndourou, ka ta sé bil kombone, ka sé woropa ka foli. Da ko̱ ro̱kè njoukouli mi la baï on, kli ourou an bil pou bon baï séna falè ka bo̱ko̱ kli.

¹⁴ Da kè tèn gui kala ka ko̱ ro̱kè njoukouli, kè ko̱ kli passé ta, da kè haï mona njou‐jangmali an woro kli.

¹⁵ Da ko̱ bèlaléou mi lé tou, njou‐séna bongli mi guè monè, ka sa: Guèl aïn ba woropa da séssé mi ri nyèta tou; mo sa hi ro̱kè njoukouli on an klime sé, an bil pouli ka zé laka baï an kli fèn kli.

¹⁶ Da Jésus mi sa hi kli: Kli tane ji oura ya; oui hi laka hi kli an klime son.

¹⁷ Da kli féré sa hi nè: Na jing tarou dioui da njouïli séré an guèl aïn.

¹⁸ Da kè sa: Oui fan kli gourou hi mi.

¹⁹ Da kè sa bi njaka ro̱kè njoukouli, an klime kaou toul pa, da kè ya tarou dioui on da njouïli séré, ka ènrèn sé nonkala, kè same ka haou, ka hi tarou hi njou‐séna bongli, da njou‐séna bongli mi hi ro̱kè njoukouli on.

²⁰ Da kli bon mi son ka mba. Da kli fan gara boutoukèli, ko̱ na mba karo botoulè‐séré.

²¹ Da kli on ko̱ son ba wonron njoukouli hèdi ténakè‐bongkè‐dioui, tane waïnli da goundi ya.

²² Da koukoulion, Jésus sa hi njou‐séna bongli an klime hé kombone da sé hélé mboro lèkè dambèl hi nè, bo̱l tèn ko̱ kème sa hi ro̱kè njoukouli on an klime sé.

²³ Da afal ko̱ kème sa hi ro̱kè njoukouli on an klime sé, kè hé sé toul souraguèl ka foli, baï sana jojo Ouone; da ko̱ bèlaléou mi lé tou, kè kaou ho̱kè an ndourou.

²⁴ Da kombone mi na an none mbi, da wouna mbi mi wou kombone mingta; baï ko̱ koukouna mi ji dèna mboro akli.

²⁵ Hangnachoung ka l’heure tomna ènran fèn an nèngkè, Jésus mi guè mone kli, ka sé yan none loukou mbi.

²⁶ Da njou‐séna bongli mi ko̱ nè ko̱ kème yé séna yan none loukou mbi on, mone kli hou mbi ta, kli sa: On ba gajéna! Da kli wan njaka ka none waou.

²⁷ Da koukoulion, Jésus mi sa baï jing kli, ka sa: Oui bi hang baï guè tiya, mè mini; oui ngou waou ya!

²⁸ Da Pierre mi féré sa hi nè, ka sa: Nanjou tokoré mi yé ba mo, mo sa bi njaka ni an mème guè mono an toul none mbi.

²⁹ Da kè sa: Mo gui! Da Pièrre mi tèn kala an bil kombone ka diri guè none mbi, kè sé toulkè baï guèna mona Jésus.

³⁰ Da ko̱ kème ko̱ koukouna ko̱ mi kou mingta, waou mi i nè maïya; da kème tissaon baï bina, kè wan njaka, ka sa: Nanjou, mo lé mbèli!

³¹ Da koukoulion Jésus mi ndara ndo̱kè ka ba nè, da sa hi nè: Mo jing tounassaon gounfènakè, baï fèn da mo nding ka ndouri lé?

³² Da ko̱ klime hé bil kombone, koukouna mi o chiou.

³³ Da kli on ko̱ mi kaou bil kombone mi houkou mbèla Jésus, da hiou nè, ka sa: Babaï, mo ba Goune a Ouone.

³⁴ Da ko̱ klime hé mbi tou, kli tèn njaka nguéng ko̱ ba koukoula a njou‐Génésareth.

³⁵ Da ko̱ njoukouli on an guèl on mi toutou ba Jésus, kli pi njoukouli sé mane bil pouli an ndourou bon, an klime fan njou‐jangmali bon guè monè.

³⁶ Da kli sa jo̱jo̱ nè, an klime da ba njaka la nè bo̱l. Da kli bon on ko̱ mi da, mone kli haï tou.