Saint Marc 6 - Féké Testament 1947

¹ Da Jésus mi ourou an ndourou, ka do̱li sé guè dodok pou nè, da njou‐séna bong nèli mi sé fali.

² Ko̱ name sabbat mi tèn tou, kème tissaon baï to̱ko̱na fèn an bil synagogue. Ko̱ njoukouli nyèta mi la baï nè, laou kli mi sé siya, da kli sa: Da on njoukou aïn mi jing fèn aïnli an hane dé? Da chokna on ko̱ mi hi njoukou aïn ba fèn lé? Da njèran pinali on ko̱ kème nding ka ndo̱kè on ba fèn lé?

³ Kè ba njou?-?salapandé ya lé, goune a Marie, yine nèli ba Jacques, da Joses da Jude tèn Simon ya lé? Da njo̱‐waïn fèn nèli mi ndé kaou woro na ya lé? Da kè tèn jing kli ba fèn bèna.

⁴ Da Jésus mi sa hi kli: Njoukouna tane aïli prophète ya, wara an dodok pou nè ya, tèn an wora dodok yine nèli, tèn an wora njou‐voulèli ya.

⁵ Da Jésus mi tane ma baï ndingna njèran pinali ya, bo̱l ba goukouna ndo̱kè toula njou‐jangma hanali ka haï mone kli.

⁶ Da laou‐è mi sé siya baï ko̱ klime kaou ka ndouri. Da kème sèrè mane pouli toutoul, ka to̱ko̱ fèn hi kli.

⁷ Da Jésus mi di kli on botoulè‐séré guè monè, ka tissaon baï pina kli sé séré séré, kème hi kli njèran an toula esprit dakamli.

⁸ Da kème wara kli baï an klime tane bi fèna mbéo sé jing kli an domboro ya, bo̱l ba di bana; tane ti jing tarou ya, tane koto, tane mbo̱ri an bil ngou ya;

⁹ ka bou ba sabo̱ko̱, da tane bouna la dala fal hana séré ya.

¹⁰ Da kème sa hi kli: Bil voul hana ko̱ ouime ri guè ndourou, oui kaou ndourou bo̱l tèn ko̱ ouime ourou an pou on.

¹¹ Tokoré an pou hana ko̱ klime tane ga pame oui ya, maléba klime tane la baï abaï ya, ko̱ ouime yé oura an pou on, oui to sassal an sabo̱ko̱ baï ko̱ ba sana bongbaï hi kli.

¹² Da klime sé, ka sa mboura bi kala ba dadaon an njoukouli mi hèkè békéfèn.

¹³ Da klime ni zabololi nyèta tèn kala ka bi nome toula njou‐jangma nyèta, da mone kli mi haï.

¹⁴ Da ko̱ nanjoukaou Hérode mi la tiri baï a Jésus, baï ko̱ ling‐è mi ti maïya kème sa: Jean‐Baptiste mi tome an wora houli da mono baï on mi ko̱ kème nding njèran pinali.

¹⁵ Da njoukou hanali mi sa: Kè ba Élie. Da afékéli mi sa: Kè ba kène prophète hana mbéo an wora prophèteli.

¹⁶ Da ko̱ Hérode mi la baï on, kè sa: Jean on ko̱ mème koung solè jinguèl mi tome tou.

¹⁷ Baï ko̱ ba Hérode fènè mi ko̱ pi jinguèl ka ya Jean, da bou nè voul jo̱bo̱ baï toula Hérodias, waïn a Philippe ko̱ ba mbé yine nè; baï ko̱ Hérode mi ya Hérodias tèn ba waïn nè.

¹⁸ Da ba baï aïn ko̱ Jean mi sa jinguèl hi Hérode: Ka mboro guingna, mo tane ma baï yana waïn a yine no ya.

¹⁹ Mono on ko̱ hèrè mi ba Hérodias maïya jing Jean, da kème ji baï ina nè. Da ba baï ko̱ kème tane ga mabongkè ya;

²⁰ baï ko̱ waou mi i Hérode baï toula Jean ta, baï ko̱ kème toutou ko̱ Jean ba njou‐guédék da tangna fofoto, da kème pèng nè bèlta, da ko̱ kème la baï a Jean laou‐è mi sé siya, da kème la baï nè kara nè.

²¹ Da ko̱ name mapélékè tou ko̱ loukou name tèna Hérode mi gui tou, kème mosso name gnèna laka baï toula nanjou nèli, da baï toula kabita nèli, tèn loukou njoukou hanali an guèl Galilée.

²² Da ko̱ goune waïn a Hérodias mi ri guè guèl kaouna ka ndandaï; da baï ko̱ kème bi wélé toula Hérode ta, tèn kli on ko̱ mi son laka jing nè. Da nanjoukaou mi sa hi goune waïn on: Mo oui fèn on ko̱ mome jiji, da yé mè ma hi mo.

²³ Da keme hanfèn hi goune waïn on ba: Yé fèn on ko̱ mome oui mi, yé mè ma hi mo, tongna ba baï wala hanguèl bilkaou ni hi mo.

²⁴ Da kème tèn kala ka sa hi ma nè: Yé mè oui ba fèn lé? Da ma nè mi sa hi nè ba: Toula Jean‐Baptiste.

²⁵ Da koukoulion goune waïn mi ngou féré fal ri sé guè mona nanjoukaou, ka oui nè ba: Mè ji mo hi ba toula Jean‐Baptiste bou bil tassi hi mi koukoulion.

²⁶ Da go̱ra nanjoukaou mi sé nè maïya; da ba baï aïn ko̱ kème ti hanfèn tou, da baï toula kli on ko̱ mi son laka jing nè, kè tane ji ba dènakè jing goune waïn on ya.

²⁷ Koukoulion nanjoukaou mi pi tourougou hana mbéo an bèl monè, ka sa bi njakè baï an kème sé ka gui jing toula Jean‐Baptiste.

²⁸ Da kème sé ka koung sola Jean an bil voul jo̱bo̱, ka bi toulè bou bil tassi, ka gourou hi goune waïn on, da goune waïn on mi ya ka sé rou guè mona ma nè.

²⁹ Da ko̱ njou‐séna bongli a Jean mi la baï on, kli gui ka bi houla Jean, ka sé goro nè an bil pal.

³⁰ Da njou‐mboro‐pinali mi ndoï jing hana guè mona Jésus, da klime to̱ko̱ bong fènli bon on ko̱ kli nding, tèn fènli bon on ko̱ klime to̱ko̱ hi njoukouli.

³¹ Da Jésus mi sa hi kli: Oui fèn baï mi sé guè woropa ka foli da yan tana baï zada. Baï ko̱ njoukouli nyèta mi hanran siya gui ka féré, da guèl sona laka tiya.

³² Da klime sé guè bil kombone ka ourou baï séna woropa ka foli.

³³ Da ko̱ njoukouli mi ko̱ kli ko̱ klime guè oura, da njoukouli nyèta on ko̱ mi toutou none kli, tèn njoukouli mane pouli ka pime bon mi ndoï ka ngou fal kli ka bo̱ko̱ kli, da ti ta mbèl kan soko hi kli.

³⁴ Ko̱ Jésus mi yé tèna kala an bil kombone, kème ko̱ rokè njoukouli nyèta, ka ko̱ kli passé ta, baï ko̱ klime kaou mahana ka badouali on ko̱ njou‐kora badoua kli mi tane tiya. Da kème tissaon baï to̱ko̱na fènli nyèta hi kli.

³⁵ Da ko̱ séssé mi ri tou, njou‐séna bong nèli mi guè monè, ka sa hi nè: Guèl aïn ba woropa da guèl mi lé tou;

³⁶ mo sa hi kli an klime sé guè njaka wakali tèn pouli ko̱ na diya, baï zéna laka sona kli fèn kli.

³⁷ Da kème féré sa, ka sa hi kli: Oui hi laka hi kli an klime son. Da klime sa hi nè: Mo ji ba name sé ka zé tarou ka pata bongkè‐dioui‐faltoulkè?-?séré gui, ka hi kli an klime son lé?

³⁸ Da kème sa hi kli: Tarou ro̱ko̱ hane an ndo̱ko̱ baï lé? oui sé ènrèn an name ko̱. Da afal ko̱ klime ko̱ tou, kli féré sa ba: Tarou dioui da njouïli séré.

³⁹ Da Jésus mi sa bi njaka kli baï kaouna joup joup ka douk an toul do̱lo̱ pa.

⁴⁰ Da klime kaou koukoula ka ba douk bon, hanali mi ndoï mane té‐té da afékéli mi ndoï mane bongkè‐dioui‐dioui.

⁴¹ Da kème bi tarou on dioui tèn njouïli séré on, da ènrèn sé guè nonkala, kè same, ka haou tarou on, da kè hi njou‐séna bong nèli baï walakè hi kli, da kème ndé wal njouïli on séré kon bongkè hi kli bon.

⁴² Da kli bon mi son, ka mba.

⁴³ Da klime fan gara boutoukèli mba karo botoulè‐séré, tèn gara njouïli kéng.

⁴⁴ Da kli ko̱ mi son laka on wonron njoukouli hèdi ténakè‐bongkè‐dioui.

⁴⁵ Koukoulion kème sa hi njou‐séna bong nèli, an klime hé kombone gata ka sé guè mboro héla lèkè dambèl hi nè, guè Bethsaïda ko̱ kè fènè mi pane sana hi ro̱kè njoukouli on an klime sé.

⁴⁶ Afal ko̱ kème yèng kli, kè sé guè toul souraguèl baï hiouna Ouone.

⁴⁷ Da ko̱ bèlaléou mi lé tou, kombone mi na an none loukou mbi, da Jésus mi o amè ka ho̱kè bo̱l an koukoula.

⁴⁸ Kè ko̱ klime héré la maïya; baï ko̱ koukouna mi kou mingta jing kli. Ka hangnachoung hèdi l’heure tomna ènran fèn an nèngkè, Jésus mi guè mone kli, ka sé yan none loukou mbi da kème ji tana kli.

⁴⁹ Da ko̱ klime ko̱ nè baï séna toul loukou mbi, kli kèrè ka laou kli on ba gajéna, da klime wan njaka guè siya;

⁵⁰ baï ko̱ kli bon mi ko̱ko̱ nè, da waou mi i kli maïya. Da koukoulion kème sa baï guè hi kli, ka sa: Bi hang baï guè tiya, mè mini, oui ngou waou ya!

⁵¹ Da kème guè mone kli ka hé bil kombone, da koukouna on mi o. Da klime kaou yéléme;

⁵² baï ko̱ klime tane ga kéré toul njèran pina tarou on ya, da go̱ro̱ kli mi pane name bang.

⁵³ Da afal ko̱ klime hé sé héla lèkè tou, klime kan an koukoula guèl a Génésareth, ka gna kombone bi bèl nguéng.

⁵⁴ Da ko̱ klime tèn kala an bil kombone, koukoulion njoukouli mi tou nona Jésus,

⁵⁵ da kli ngou mane pouli an ndourou bon, ka tissaon baï hola njou‐jangmali an bil toko klili, ka fan kli gui guèl on ko̱ klime la ba Jésus makaou ndourou.

⁵⁶ Mane guèli bon on ko̱ kème tèn rou, an bil pouli maléba an bil loukou pouli, maléba an wakali klime fan djou‐jangmali kon guèl zénacho̱ko̱li, ka sa jo̱jo̱ nè an klime da ba njaka la nè bo̱l. Da njoukouli bon on ko̱ mi da ba njaka la nè, mono, mone kli mi haï bèlta.