Saint Marc 5 - Féké Testament 1947

¹ Da klime tèn njaka nguéng loukou mbi, an lèkè an guèl a Gadarénienli.

² Ko̱ Jésus mi yé tèna an bil kombone, koukoulion kème wou toul jing njoukou ko̱ mi jing béké esprit, ko̱ tèn kala an bil pal.

³ Njoukou on mi bi amè an bil pal, da njoukouna mbéo mi tane ma baï gnana nè ya, tokoré tèn sal réme bon mi tane ma baï gnana nè rou ya.

⁴ Baï ko̱ jinguèl klime gna nè bo̱ko̱ ro̱ko̱ta jing réme tèn jing sal réme, an bo̱kè tèn ndo̱kè, da kème dourou sal réme ka haou réme on bon, da njoukouna mbéo mi tane ma baï féra nè kan ya.

⁵ Guèbassoko ka hangnachoung tèn séssé bon, kème kaou an woro pali tèn an toul loukou souraguèli, da wan njaka mingta guè siya, ka té monè ka kondi.

⁶ Ko̱ kème ko̱ Jésus guè soko dita, kè ngou ka guè monè ka hiou nè,

⁷ da kème wan njaka mingta guè siya, ka sa: Fème ko̱ mbèl mo jing mi lé, Jésus Goune a Ouone an Sèkèrè Guèl Ndèk? Mè rou fèn kon toulo̱ ka bil ling a Ouone an mome tane zara mi ya.

⁸ Baï ko̱ Jésus mi sa hi nè ba: Mo tèn kala an bila njoukou aïn, mo esprit dakame on.

⁹ Da Jésus mi oui nè: Ling‐o̱ ba fèn lé? Da kème sa hi nè: Ling ni ba Roko̱kèli, baï ko̱ name ro̱ko̱ta.

¹⁰ Da kème sa jo̱jo̱ a Jésus, baï an kème tane pi kli tèn kala an koukoula an fal pou soko ya.

¹¹ Da ngo̱yali makaou baï sona fèn an bèl loukou souraguèl soko.

¹² Da zabololi on mi sa jo̱jo̱ a Jésus, ka sa: Mo pi na sé guè bila ngo̱yali on, an name sé bil kli. Da Jésus mi ji bo̱ko̱kè.

¹³ Da esprit dakamli on mi tèn kala ka ri sé bila ngo̱yali on, da sarang a ngo̱yali on mi ourou an bèl souraguèl, ka ngou diri souraguèl da kon mbi, kli hèdi ténakè‐bongkè‐séré, da klime bine guè bil loukou mbi.

¹⁴ Da njoukouli ko̱ ko̱ro̱ ngo̱yali on mi ngou sé, ka to̱ko̱ falkè an bil loukou pou tèn an bil lélé pouli, da klime tèn kala ka gui baï ko̱na fèn on ko̱ tèn.

¹⁵ Da kli gui mona Jésus, ka ko̱ njoukou on ko̱ mi jing ro̱kè zabololi ambèl jinguèl makaou, ka bou la da nonè mi taka tou; da waou mi i kli.

¹⁶ Da kli on ko̱ mi ko̱ fèn aïn ko̱ Jésus mi nding, kli to̱ko̱ falkè hi kli toula njoukou on ko̱ mi jing zabololi ambèl jinguèl, tèn toul baï a ngoyali.

¹⁷ Da klime tissaon baï sana jo̱jo̱ a Jésus an kème ourou an bil sél koukoula akli.

¹⁸ Ko̱ Jésus mi nding baï héna bil kombone, kè on ko̱ mi jing zabololi jinguèl mi sa jo̱jo̱ nè baï an kème kaou jing nè.

¹⁹ Da Jésus mi tane ji bo̱ko̱kè ya, ka sa hi nè: Mo sé voulo̱ guè mona yine noli, ka sa bong kakaïya fènli on ko̱ Nanjou mi nding jing mo hi kli, da ka mboro on ko̱ kème nding haïo hi mo.

²⁰ Da kème sé ka tissaon baï sana bongkè an pou Décapole, toul kakaïya fènli on ko̱ Jésus mi nding jing nè. Da laou a njoukouli on bon mi sé siya.

²¹ Da ko̱ Jésus mi kaou bil kombone ka yé héra sé guè mboro hélé an lèkè, rokè njoukouli nyèta mi ndo̱ï guè monè; da kème kaou bèl loukou mbi.

²² Da zaworo hana mbéo a synagogue ling‐è ba Jaïrus ko̱ kème yé ko̱na Jésus, kè lé bèl bo̱kè,

²³ da sa jo̱jo̱ nè, ka sa: Goune waïn ni mi nding baï houl; mè sa jo̱jo̱ no an mome gui ka goukou ndo̱ko̱ toulè, an monè mi haï, baï an kème tane hou ya.

²⁴ Da Jésus mi sé jing nè, da ro̱kè njoukouli nyèta on mi sé falè, ka chome nè.

²⁵ Da waïn hana mbéo makaou ko̱ séme mi tèn nè ma saka botoulè‐séré.

²⁶ Da kè to̱ko̱ssé jing fènli nyèta ndo̱ka médecinli nyèta, ka bo mbo̱ri nèli bon tou, da monè mi tane ga haï gounfènakè ya, da jangma nè mi gui bèlya nyèta guèbambèl.

²⁷ Da ko̱ kème la baï a Jésus, kè gui ka wora ro̱kè njoukouli on ka kaïn‐è ka da la nè.

²⁸ Baï ko̱ kème sa ba: Tokoré mème da ba la nè bo̱l, yé moni ma haï.

²⁹ Koukoulion séme mi koung tou, da kème toutou an kli‐monè ko̱ béké jangma on mi o̱tou.

³⁰ Da koukoulion baï ko̱ Jésus mi toutou ka laou‐è fènè, ko̱ njèran nè mi tèn kala an monè tou, kème ki ka ènrèn gui ki bèl monè an wora ro̱kè njoukouli on, ka sa: Guème ko̱ da la ni lé?

³¹ Da njou‐séna bong nèli mi sa hi nè: Mo ko̱ ko̱ ro̱kè njoukouli mi chome mo̱, da mo sa ba: Guème ko̱ da mi lé?

³² Da kème ènrèn gui ki bèl monè baï ko̱na nona kè on ko̱ mi nding fèn aïn.

³³ Da waou mi i waïn aïn, da monè mi to̱, baï ko̱ kème toutou fèn on ko̱ mi nding jing nè tou, da kème gui ka lé bou koukoula an mbèla Jésus, ka sa fènli on bon tang ka babaï hi nè.

³⁴ Da Jésus mi sa hi nè: Goune waïn ni, mbol tounassaon no mi ko̱ mono haï tou; mo sé ka go̱ro̱ iki, da mono haï baï a béké jangma on.

³⁵ Ko̱ kème pane sanakè, njoukouli an voula zaworo synagogue mi tèn gui ka sa: Goune waïn no mi hou tou; baïfèn da an njou‐to̱ko̱nafèn mi wan bo̱kè sé bo̱on lé?

³⁶ Da mona Jésus mi tane hou mbi ya toul baïnjaka on ko̱ klime sa, kè sa hi zaworo synagogue: Mo tane ngou waou ya, ka la bi ba laou ka ho̱kè bo̱l.

³⁷ Da Jésus mi tane ji an njoukouna mi ba nè sé ya, bo̱l ba Pierre, da Jacques tèn Jean yine a Jacques ka ho̱ko̱ kli bo̱l.

³⁸ Da ko̱ klime gui kan voula zaworo synagogue, Jésus mi ko̱ njoukouli ko̱ mi ba bo̱ko̱baï, da kli on ko̱ mi wan njaka léou, da di sing léou mingta.

³⁹ Da ko̱ kème ri guè bil voulou tou, kè sa hi kli: Baïfèn da ouime ba bo̱ko̱baï ka wan njaka léou on lé? Goune waïn aïn mi tane ga hou ya, kè na ba name.

⁴⁰ Da klime saka nè maïya. Da afal ko̱ Jésus mi téne kli tèn kala tou, kème ya baba a goune on kira ma nè jing kli on ko̱ mi ndé ba nè gui, ka sé guè guèl on ko̱ goune mi kaou rou.

⁴¹ Da kème ba ndo̱ka goune on ka sa hi nè: Talitha koumi, on mi sa ba: Goune tikila, mè sa hi mo, mo ourou siya.

⁴² Da koukoulion goune tikila on mi ourou siya, ka sé; baï ko̱ kème ma saka botoulè‐séré. Koukoulion laou kli bon mi sé siya maïya.

⁴³ Da Jésus mi gna bi njaka kli pou ta; baï an njoukouna mbéo mi tane tou fèn aïn ya, da kème sa hi kli an klime hi fèn sona hi goune tikila aïn.