Saint Marc 4 - Féké Testament 1947

¹ Da Jésus mi kaïn tissaon ba aféké baï to̱ko̱na fèn ni njoukouli an bèl loukou mbi. Da ro̱kè njoukouli maïya mi ndoï guè monè, mono on kème kaou bil kombone, ka kaou guè rou an toul loukou mbi, da ro̱kè njoukouli on bon mi kaou kon koukoula an njaka nguéng.

² Da kème to̱ko̱ fènli nyèta hi kli ka ba ébèlbaïli, kè sa hi kli ka ba mboro to̱ko̱nafèn nè.

³ Oui la, mono njou‐mèna mèrèn hana mbéo mi sé baï mèna mèrènfèn,

⁴ da baï mi gui mahana ka on, ko̱ kème yé mènakè, hanali mi ta lé bèl domboro; da ndoïli mi gui ka té nè.

⁵ Da afékéli mi ta lé kon njaka bang kone, guèl ko̱ sissili mi nyè ya, da koukoulion kème lang mone baï ko̱ sissili mi diya;

⁶ da ko̱ séssé mi jang tou, kè rèn ka ho̱ko̱ baï ko̱ saonkè mi tane nyè ya.

⁷ Da kène afékéli mi ta lé kon woro nzara; da nzara mi ndé hon jing nè, ka ta toulè, da kème tane lé lénakè ya.

⁸ Da afékéli mi ta lé kon bèla koukoula; da lang mone ka hon, da lé lénakè nyèta, hanali bongkè‐saï da afékéli bongkè‐difala‐mbéo da hanali té.

⁹ Da Jésus mi sa: Kè on ko̱ soukè mi ou ta, dadaon an kème la.

¹⁰ Da ko̱ Jésus mi kaou ka ho̱kè, kli on ko̱ mi kaou gui ki nè, tèn kli on botoulè‐séré mi oui nè toul ébèlbaï aïnli.

¹¹ Da kème sa hi kli: Ba baï abaï baï touna didissi fèn toul bilkaou a Ouone; da ba baï akli on ko̱ kaou kala, mi ko̱ fènli bon ko̱ to̱ko̱ ka ba ébèlbaïli,

¹² baï ko̱nakè, kli ma ko̱ da yé kli ba ko̱nakè tang ti ya, da lanakè, kli ma la da yé kli ba tounakè nguite tiya, baï ko̱ ka touya kli ma komo mboro kli, da mi yèng bi mboro békéfèn kli.

¹³ Da kème sa hi kli: Oui tane ga tou ébèlbaï aïn ya lé? Fèn mèlé oui ma baï touna ébèlbaïli on bon kong ba fèn ya lé?

¹⁴ Njou‐mèna mèrèn mi mèn baïnjaka.

¹⁵ Da aïnli ko̱ an bèl domboro ba kli an guèl on ko̱ mi mèn baïnjaka hi kli; da ko̱ klime la, koukoulion Satan mi gui ka bi baïnjaka on guèfal ko̱ mi mèn kon bil kli tou.

¹⁶ Da mono, aïnli ko̱ mi mèn an njaka bang kone, ba kli on ko̱ klime la baïnjaka, da koukoulion kli mi ya ka wala;

¹⁷ da saon akli fèn kli mi tiya, klime tane laïbi bongkè di ya, da afal ko̱ to̱ko̱nassé tèn sènafèn mi gui baï toul baïnjaka koukoulion klime bèn.

¹⁸ Da aïnli on ko̱ mi mèn kon woro nzara, ba kli on ko̱ mi la baïnjaka,

¹⁹ da baï bina hang kli toul pina an saka naï, da rongnafèn a nguèra da nzala baï fèn afékéli mi ri bilkè, moungnourou baïnjaka da kè tane lé lénakè ya.

²⁰ Da aïnli ko̱ mi mèn kon bèla koukoula, ba kli on ko̱ mi la baïnjaka, ka ya an go̱ro̱, da lé lénakè hanali bongkè‐saï, da afékéli bongkè‐difala‐mbéo, da hanali té.

²¹ Da Jésus mi sa hi kli: Njoukou mi bi lampe baï bana bi bo̱ko̱ dodo, maléba bana bi ba bo̱ko̱ toko lé? Tane ti ba baï bana bi ba toul gangnafèn ya lé?

²² Baï ko̱ fèna mbéo mouna bi tiya, yé tèn kala bon, maléba goune dèkèra baï hana mbéo ka foli tane tiya ko̱ yé tèn kon kala ka ba nona sé.

²³ Tokoré njoukouna ko̱ soukè mi outa, dadaon an kème la.

²⁴ Da kème sa hi kli: Oui pèng mone baï jing fèn on ko̱ ouime la. Kli ma lé hi oui mahana ka on ko̱ ouime ndé lé hi kli, da ma kaïn hi aféké kon toulkè hi oui.

²⁵ Baï kè on ko̱ mi yé jing fèna, yé kli ma hi aféké hi nè; da kè on ko̱ mi tane ti jing fèna ya, yé kli ma ya fèn on guèfal ko̱ mi na ndo̱kè.

²⁶ Da kème sa: Bilkaou a Ouone mi na mahana ka on, ko̱ njoukouna mi mèn mèrènfèn kon koukoula,

²⁷ da ko̱ kème na name ka hangnachoung da tome ka guèlapélé, mèrènkè mi toung ka lome, da kème tane ga tou mborokè ya.

²⁸ Koukoula mi ko̱ hi lénakè fènè, ka titilikè ba goïkè, da afal on ba toulkè, da kaïnakè ba lénakè bi toulkè.

²⁹ Da afal ko̱ lénakè mi sèn tou, koukoulion kème sé jing ba pata?-?ngali baï ko̱ féou loura fèn paï mi tèn tou.

³⁰ Da kème oui: Na ma sa ba bilkaou a Ouone mi mabahana ka fèn lé? Maléba yé name tou ba ébèlbaï fèn baï wéra nonkè rou lé?

³¹ Kè mahana ka mèrèn sénevé, ko̱ klime mèn kon koukoula, da mi na yèlèlè ta gara mèrènfènli bon an koukoula;

³² da afal ko̱ klime mèn nè tou, kème gang ka hon ta toul gara mbo̱ro̱me fènli bon, da bou loukou wanando̱ko̱kèli, mono on ko̱ ndoïli an nonkala mi ma baï guina ka kaou bo̱ko̱ tétémkè.

³³ Jing ba ébèlbaïli nyèta mahana on ko̱ kème sa baïnjaka hi kli, ko̱ kli ma baï lanakè.

³⁴ Da kème tane ga sa baï hana hi kli ya, wara ko̱ kème sa ka ba ébèlbaï ya; da ka foli kème wéré none fènli bon hi dodok njou‐séna bong nèli.

³⁵ Ka name o̱kèo̱, ko̱ bèlaléou mi lé tou, Jésus mi sa hi kli: Oui gui an name hé ta sé guè mboro hélé mbi an lèkè.

³⁶ Da afal ko̱ kli yèng ro̱kè njoukouli on sé, klime ya Jésus guè bil kombone, mahana ko̱ kème ti kaou; da lélé kombone afékéli mi ndé na jing nè.

³⁷ Da koukouna bine‐té mi kou ka wou mbi kon bil kombone, mono on mbi mi nding baï mbana bil kombone.

³⁸ Da kème pane nana name an taka kombone an toul fèn bounatoul. Da klime tome nè, ka sa hi nè: Njou‐to̱ko̱nafèn mo tane bi hang‐o̱ toulkè on ya, ko̱ yé na hou lé?

³⁹ Da kème tome ka to koukouna, da sa hi loukou mbi on: Mo o chiou! Da koukouna mi o, da guèl mi na chiou.

⁴⁰ Da kème sa hi kli: Baïfèn da ouime ngou waou on lé? Fèn mèlé oui tane ga ti jing tounassaon ya lé?

⁴¹ Da waou mi ba kli maïya, da klime sa jing hana: Kè on ba guè, da koukouna tèn loukou mbi mi ndé la baï nè on lé?