Saint Marc 3 - Féké Testament 1947

¹ Da Jésus mi kaïn ri sé guè bil synagogue ba aféké. Da njoukouna makaou ndourou ko̱ ndo̱kè mi ho̱ko̱ ko̱kcho̱do̱.

² Da klime ènrèn guè mona Jésus wongnonli baï ko̱na kong ba yé kè ma haï monè ka name sabbat lé, baï an klime sa kita nè.

³ Da Jésus mi sa hi njoukou on ko̱ ndo̱kè mi ho̱ko̱ ko̱kcho̱do̱: Mo ourou siya, ka o hanguèl kli.

⁴ Da kème sa hi kli: Ka mbora guingna yé mabongkè baï ndingna bèlafèn ka name sabbatli maléba ba baï ndingna ba fèn bèlya lé? Baï kouna ba njoukou maléba baï ina ba njoukou lé? Da klime kaou yime.

⁵ Da ko̱ Jésus mi ènrèn kli gui ki go̱rè mi sé nè maïya baï ko̱ go̱ro̱ kli mi na bang, da kème sa hi njoukou on: Mo ndara ndo̱ko̱. Da kème ndara ndo̱kè, da ndo̱kè mi haï tou.

⁶ Da pharisienli mi tèn kala, da koukoulion kli jing hérodienli, mi bakèdakè jing hana toul ling a Jésus, ka nza mborokè baï ina nè.

⁷ Da Jésus kira njou‐séna bong nèli mi do̱li ka ourou sé guè bèl loukou mbi. Da ro̱kè njoukouli nyèta an guèl Galilée, tèn an guèl Judée mi sé falè;

⁸ da an pou Jérusalem, da an guèl Idumée, da an hélé mbi Jourdain, da an bèl pou Tyr tèn Sidon, da ko̱ klime la kakaïya fènli on ko̱ kème nding rokè njoukouli nyèta mi gui monè.

⁹ Da kème sa hi njou‐séna bong nèli, ba kème ji an klime pèng goune lélé kombone bi koro nè, mono on an ro̱kè njoukouli on mi tane chome nè ya;

¹⁰ baï ko̱ kème haï jangma a njoukouli nyèta, mono njoukouli bon on ko̱ na jangma mi tèn lé toulè baï dana nè.

¹¹ Da ko̱ esprit dakamli mi ko̱ nè klime lé bou koukoula an mbèlè, ka wan njaka guè siya, ka sa: Mo ba Goune a Ouone.

¹² Da Jésus mi gna bi njaka kli pou ta, baï an klime tane to̱ko̱ nonè hi njoukouli ya.

¹³ Da Jésus mi hé sé guè toul souraguèl; ka di kli on ko̱ kème ji, da klime guè monè.

¹⁴ Da kème sane njou‐mboro pinali botoulè‐séré, baï an klime kaou jing nè, da baï an kème pi kli baï sana mboura,

¹⁵ da mono on klime jing njèran baï nina zabololi tèn kala.

¹⁶ Da kli botoulè‐séré ko̱ kème sane kli mini ba: Simon ko̱ kème bi kène ling‐è hi nè ba Pierre,

¹⁷ da Jacques goune a Zébédée, tèn Jean yine a Jacques; da kème bi ling kli ba Boanergès, ling on mi sa ba: Goundi a ndounambame;

¹⁸ da André; Philippe; Barthélemy; Matthieu; Thomas; da Jacques goune a Alphée; Thaddée, da Simon le Cananite;

¹⁹ tèn Judas Iscariot kè on ko̱ mi jo̱l Jésus.

²⁰ Da klime ri guè bil voulou, da ro̱kè njoukouli mi kaïn ndoï ba aféké, mono on klime tane ma baï sona laka ya.

²¹ Ko̱ njou‐voulèli mi la baï on, kli tèn gui baï bana nè; baï ko̱ klime sa ba: Toulè mi ki nè tou.

²² Da njou‐to̱ko̱na bong guingnali on ko̱ mi diri gui ka pou Jérusalem, klime sa ba: Kème jing Béelzébul; ko̱ kème ni zabololi tèn kala jing ba njèran zaworo a zabololi.

²³ Da Jésus mi di kli guè monè, ka sa hi kli ka ébèlbaï: Ka mboro hani mi ko̱ Satan ma baï nina Satan lé?

²⁴ Tokoré bilkaou hana mbéo mi wal monè fènè, bilkaou on mi tane ma baï name kan ya.

²⁵ Da tokoré voulou mi wal monè fènè, voul on mi tane ma baï name kan ya.

²⁶ Da tokoré Satan mi ourou siya ka jèk monè fènè ka wal tou, kè tane ma baï name kan ya, sèkèrè nè mi tèn tou.

²⁷ Da njoukouna mbéo mi tane ga ri sé guè bil voula njèran njoukou ka bo fèn nèli ya, wara ko̱ kème tane ga gna njèran njoukou on bon ti dambèl ya; da afal on kè ma bo fèn nèli bo̱on.

²⁸ Babaï, mi mè sa hi oui, békéfènli bon a goune a njoukouli tèn béké poukounafènli on bon ko̱ klime poukou, yé kli ma jing yèngna bi mboro békéfènli bon;

²⁹ da njoukou on ko̱ mi poukou Saint‐Esprit kè ba jingna yèngna bi mborokè hi nè tane tiya; da barabaï on mi na bi go̱ kambèlè.

³⁰ Jésus mi sa on, ba baï ko̱ klime sa ba: Kème jing esprit dakame.

³¹ Da ma nè tèn yine nèli mi gui da o kala, ka pi guè monè baï dina nè.

³² Da ro̱kè njoukouli mi kaou gui ki bèl monè, da klime sa hi nè: Mo ko̱, ma no tèn yine noli makaou soko, ka ma nza mo.

³³ Da kème féré sa hi kli, ka sa: Guè ba ma ni tèn yine nili lé?

³⁴ Da kème ki monè ènrèn guè mona kli on ko̱ mi kaou gui ki bèl monè, ka sa: Oui ko̱ ma ni tèn yine nili.

³⁵ Baï ko̱ kè on ko̱ kaou mara fal toula Ouone, kè on ko̱ ba yine ni, da njo̱ waïn fèn ni, tèn ma ni.