Saint Marc 16 - Féké Testament 1947

¹ Da ko̱ name sabbat mi ta tou, Marie Magdala, da Marie ma Jacques, tèn Salomé, klime zé bèla épice dongui, baï an klime kon toul houla Jésus.

² Ka titili name semaine ka toulapélé, ko̱ séssé mi pane tèna, klime gui njaka pal.

³ Da klime sa jing hana: Yé guème ma ki kone guèfal an njaka pal hi na lé?

⁴ Da ko̱ klime bi none kli guè siya, kli ko̱ kone on ko̱ ba loukoukè mi ki guèfal tou.

⁵ Da ko̱ klime ri guè bil pal on, kli ko̱ bala goune makaou mboro wonron ndo̱ko̱, ka bou pouki la, da laou kli mi sé siya.

⁶ Da kème sa hi kli: Laou baï mi sé siya ya; oui nza ba Jésus an Nazareth, ko̱ klime bara nè bi di‐croix. Kè tome tou, ka tane ti guèl aïn ya; oui ko̱ guèl on ko̱ klime bou nè rou!

⁷ Da oui sé ka sa hi njou‐séna bong nèli da Pierre ko̱ kème sé ti dambèl hi oui guè guèl Galilée tou. Yé oui ma ko̱ nè an ndourou soko, mahana ko̱ kème ti sa hi oui jinguèl.

⁸ Da klime tèn kala an bil pal ka ngou sé; baï ko̱ mone kli mi to̱ kli, da go̱ro̱ kli mi dou ta. Da klime tane sa hi njoukouna ya baï ko̱ waou mi i kli.

⁹ Ko̱ Jésus mi tome ka titili name semaine, kè ti tèn guè mona Marie Magdala ka titilikè, kè on ko̱ kème ni zabololi difala‐séré tèn kala an bilè jinguèl.

¹⁰ Waïn aïn mi sé ka sa bongkè hi kli on ko̱ mi sé jing Jésus jinguèl, ko̱ go̱ro̱ kli mi sé kli ta, da kli pane léna léou.

¹¹ Da ko̱ klime la ba Jésus makaou ka none, da waïn on mi ko̱ nè tou, kli tane ga la baï nè bilaou kli ya.

¹² Afal fèn aïnli Jésus mi to̱ko̱ monè ka mbora féké ka toul hi njoukouli séré an woro kli, ko̱ klime guè séna waka.

¹³ Da klime sé ka to̱ko̱ bongkè hi gara njou‐séna bongli, da klime tane ga ndé la baï kli bilaou kli ya kéng.

¹⁴ Da afal on Jésus mi tèn guè mona kli on botoulè‐mbéo, ko̱ klime kaou sona laka; ka ba baï hi kli baï ko̱ klime kaou ka ndouri, da go̱ro̱ kli mi na bang on, da baï ko̱ klime tane ga la baï akli on ko̱ mi ko̱ nè tou bilaou kli ya, afal ko̱ kème tome tou.

¹⁵ Da kème sa hi kli: Oui sé toula koukoula bon, ka sa mboura bèlabaï hi mèran njoukouli bon.

¹⁶ Kè ko̱ mi la bilaou da ya baptëme ma kou, da kè ko̱ tane la bilaou ya, barabaï ma lé toulè.

¹⁷ Da njèran pinali ko̱ ma gui an fala kli on ko̱ mi la bilaou; ka bil ling ni yé kli ma ni zabololi tèn kala; kli ma sa njaka baïli toutoul;

¹⁸ kli ma ba choïli; da tokoré klime njo béké mbéré fènli, ba ndingna bèlya jing kli tane tiya; da kli ma goukou ndo̱ko̱ kli kon toula njou‐jangmali, da mone kli ma haï.

¹⁹ Mono, afal ko̱ Nanjou mi sa baï hi kli o̱tou, mi bi nè sé guè nonkala, da kème kaou mboro wonron ndo̱ka Ouone.

²⁰ Da klime sé, ka sa mboura manguèl bon. Da Nanjou mi nding pina jing kli ka mboro njèran pinali ko̱ mi gui fal, mi to̱ko̱ ko̱ baïnjaka ba babaï. Amen.