Saint Marc 15 - Féké Testament 1947

¹ Koukoulion ka guèlapélé, loukou sacrificateurli jing tangchidoli da njou‐to̱ko̱na bong guingnali tèn njou‐walabaïli, kli bon mi ndo̱ï baï bana kèdakè, da gna Jésus, ka ya nè sé, da hi nè bi ndo̱ka Pilate.

² Da Pilate mi oui nè: Mo ba Nanjoukaou a Juifli lé? Da Jésus mi féré sa, ka sa hi nè: Mo sa on tou.

³ Da loukou sacrificateurli mi sa kita kon toulè nyèta.

⁴ Da Pilate mi kaïn oui nè ba aféké ka sa: Mo ba sana fal njako̱ tane tiya lé? Mo ko̱ klime sa kita kon toulo̱ toul fènli nyèta.

⁵ Da Jésus mi tane féré fal njakè ya, da mono on laou a Pilate mi sé siya.

⁶ Guèbassoko jinguèl ka name loukou laka kème yèng njou‐jo̱bo̱ mbéo on, ko̱ klime ji.

⁷ Da njoukouna mbéo ko̱ ling‐è ba Barabbas kaou jobo jing kli on ko̱ nding nzaou jinguèl, njoukouli on ko̱ nding nzaou mi i njoukouli.

⁸ Da rokè njoukouli mi ourou siya da tissaon baï ouine Pilate an kème nding mahana ka on ko̱ kème ti nding jinguèl.

⁹ Da Pilate mi féré sa hi kli, ka sa: Oui jiji ba mème sél Nanjoukaou a Juifli hi oui lé?

¹⁰ Baï ko̱ kème toutou ko̱ loukou sacrificateurli mi hi Jésus bi ndo̱kè ka ba fanahang.

¹¹ Da loukou sacrificateurli mi lang ro̱kè njoukouli on, an Pilate mi yèng ba Barabbas hi kli, guèl bo̱ka Jésus.

¹² Da Pilate mi kaïn sa ba aféké, ka sa hi kli: Mono on, yé mè nding ba fèn jing kè on ko̱ ouime di nè ba Nanjoukaou a Juifli lé?

¹³ Da klime kaïn wan njaka guè siya ho: Bara nè bi di croix.

¹⁴ Da Pilate mi sa hi kli: Fème ko̱ kè nding bèlya lé? Da klime wan njaka guè siya ho mingta: Bara nè bi di‐croix.

¹⁵ Da Pilate, baï ko̱ kème ji bina wélé toula Juifli, kème sél ba Barabbas hi kli; da afal ko̱ kème jo̱ Jésus ka baraza, kè hi nè baï an klime bara nè bi di‐croix.

¹⁶ Da tourougouli mi ya nè sé guè njaka bara, ko̱ ba voul walabaï, da klime ndoï sarang tourougouli bon guè ndourou.

¹⁷ Da klime bou bitibiti la hi nè, ka kang mbélé ngassadi, da goukou bi toulè.

¹⁸ Da klime tissaon baï namna nè, ka sa: Woromon, Nanjoukaou a Juifli!

¹⁹ Da klime jo̱ toulè jing pakala, ka san same kon toulè, da houkou an mbèlè, ka hiou nè.

²⁰ Da ko̱ klime gaï nè tou, kli voulou bitibiti la guèfal, da kli bou ba dodok la nè fènè hi nè. Da klime ya nè sé kala baï bara nè bi di‐croix.

²¹ Da njoukouna mbéo ko̱ ling‐è ba Simon an pou Cyrène, baba a Alexandre da Rufus, ko̱ mi féré gui pou ka waka; klime to̱ko̱ssé hi nè baï hola di‐croix a Jésus.

²² Da klime ya Jésus gui guèl on ko̱ klime bi lingkè ba Golgotha, on mi sa ba guèl hourou.

²³ Da klime ji hina vin ko̱ klime joukourou jing myrhe hi nè an kème njo, da kème tane ji njonakè ya.

²⁴ Da klime bara nè bi di‐croix, ka wal la nè jing hana, da rou mbadé rou baï ko̱na kong ba guème ko̱ ma i.

²⁵ L’heure mane saï, ko̱ klime bara nè bi di‐croix.

²⁶ Da fèn on ko̱ klime dé bi guè siya an laou toulè mi to̱ko̱ none fèn on ko̱ klime sa kon toulè ko̱ sa ba: NANJOUKAOU A JUIFLI.

²⁷ Da klime ndé bara njou‐riya séré jing nè kéng: aïn mbéo an mboro wonron ndo̱kè da kènkè an mboro waïn ndo̱kè.

²⁸ Mono on an tènrèn none Takarata a Ouone mi tèn kala ka babaï: Kli ndé kèn nè mabahana jing njou‐séla guingnali.

²⁹ Da kli on ko̱ ta ndourou mi poukou nè, ka tékéré toul kli, da sa: En! Mo ko̱ bèngnèrèn temple aïn ka kaïn za nè ma name saï,

³⁰ mo kou mono fèno, ka diri gui tiya an toul di‐croix aïn!

³¹ Da mono on, loukou sacrificateurli tèn njou‐to̱ko̱na bong guingnali mi ndé gaï nè jing hana kéng, ka sa: Kème kou ba njou‐afékéli, kè tane ma baï kouna monè fènè ya!

³² Oui yèng an Christ, Nanjoukaou a Israël, mi diri gui tiya kassénaï an toul di‐croix, an name ko̱ ka la bilaou! Da kli on ko̱ klime bara kli bi di‐croix an bèl monè, mi ndé kèkè nè kéng.

³³ Da ko̱ l’heure mi mane difala‐mbéo, guèl mi yiri kon toul koukoula bon bo̱l tèn l’heure difala‐nèng.

³⁴ Ka l’heure a difala‐nèngkè Jésus mi wan njaka mingta guè siya: Éloï. Éloï, lama sabachthani? On mi sa ba: Ouone ni, Ouone ni, baïfèn da mome yèng mi lé?

³⁵ Da hanali an wora kli ko̱ mi o an ndourou, ko̱ klime la on, kli sa: Oui ko̱, ko̱ kème di Élie.

³⁶ Da hana mbéo mi ngou sé, da ko̱ kème bou raro bil fona mbi lènadi mba, kè gna bi njaka pakala, baï hina Jésus an kème njo, ka sa: Oui yèng, an name ko̱ kong ba yé Élie ma gui baï dira nè gui tiya.

³⁷ Da Jésus mi wan njaka mingta guè siya, ka yèng esprit nè.

³⁸ Da loukou la voile an bil temple mi go̱ro̱ mane séré ka siya bo̱l tèn tiya.

³⁹ Da ko̱ kabita tourougouli ko̱ o bèl mona Jésus ka ko̱, ko̱ kème yèng esprit nè mahana ka on, kè sa: Babaï, njoukou aïn ba Goune a Ouone.

⁴⁰ Waïnli mi ndé kaou dita kéng ka ko̱. An zéng kli ba Marie Magdala, da Marie ma a lélé Jacques da Joses da Salomé,

⁴¹ kli on mono, ko̱ Jésus mi pane kaouna guèl Galilée, klime sé falè, ka nding bakara hi nè, tèn gara waïn afékéli nyèta, ko̱ mi hé gui jing nè jinguèl ka pou Jérusalem.

⁴² Da ko̱ bèlaléou mi lé tou, — baï ko̱ ba name réknafèn ti dambèl hi name sabbat, —

⁴³ Joseph an pou Arimathée mi gui. Kè ba cho̱kna njou‐bana kèdakè, da kè fènè mi ndé voro bilkaou a Ouone kéng. Da kème sé guè mona Pilate ndo̱t tane waou ka oui nè baï houl a Jésus.

⁴⁴ Da laou a Pilate mi sé siya ko̱ kème la ba Jésus mi hou tou gata on, da kème di kabita toulougouli, ka oui nè ba Jésus mi hou gata on tou.

⁴⁵ Da ko̱ kème la ko̱ kabita toulougouli mi sa tangta ba kème hou ka babaï tou, kè hi houla Jésus hi Joseph.

⁴⁶ Da Joseph mi zé la lin, da bi houla Jésus guè tiya an toul di‐croix, ka kiwili nè ka la lin on, da goro nè an bil pal on, ko̱ klime dang an bil loukou kone, da kè ki kone saou bi njaka pal on.

⁴⁷ Da Marie Magdala, da Marie ma Joses, mi ènrèn guè guèl on ko̱ klime bou nè rou.