Saint Marc 13 - Féké Testament 1947

¹ Da ko̱ Jésus mi yé tèna kala an bil temple, da njou‐séna bong nè hana mbéo mi sa hi nè: Njou‐to̱ko̱nafèn, mo ko̱ kondi on ba fèn, da zana voulou aïnli ba fèn!

² Da Jésus mi sa hi nè: Mo ko̱ko̱ loukou voul aïnli lé? Yé kone hana mbéo ma kane toula ba nè ya, ko̱ mi tane mourou ya.

³ Da ko̱ kème kaou toul souraguèl Oliviers, ènrèn guè temple, Pierre, da Jacques da Jean, tèn André mi oui nè ka foli:

⁴ Mo sa hi na ko̱ yé fèn aïnli ma gui ka name fèn lé? Yé fèn to̱ko̱nakè ba fèn ko̱ nding baï to̱ko̱na hi na ko̱ fèn aïnli mi hèdi tou lé?

⁵ Da Jésus mi tissaon baï sana hi kli: Oui ènrèn mone baï bèlta baï an njoukouna mbéo mi tane mong oui ya.

⁶ Yé njoukouli nyèta ma gui ka bil ling ni, ka sa ba: Mè mini. Da kli ma mong njoukouli nyèta.

⁷ Da ko̱ ouime la tiri rouna béré, tèn tiri hidinafèn béré, mone baï mi tane hou mbi ya, yé fèn aïnli ma gui; da tane ga ti ba sèkèrèkè mono ya.

⁸ Baï ko̱ yé pime pouli ma ourou siya baï pongna pime pou afékéli, da bilkaou ma ourou siya baï pongna pime pou afékéli; da yé koukoula ma to̱ an guèl an hanali, da bana ma ba pou. Fèn aïnli ba titili fèn hina go̱ro̱ séta.

⁹ Da oui ènrèn mone baï; baï ko̱ yé kli ma souti oui bi ndo̱ka njou‐walabaïli, da yé kli ma jo̱ oui an bil synagogueli; da yé oui ma o nona njou‐name gangnali tèn nanjoukaouli baï touli, ko̱ ba sana bongbaï hi kli.

¹⁰ Yé kli ma sa mboura bèlabaï hi pime pouli bon mane ti dambèl da.

¹¹ Da ko̱ klime ya oui ka souti oui guè guèl walabaï, oui tane bi hang baï toul fènli ti dambèl baï sanakè ya, ka kèrè kong ba yé oui ma sa ba fèn lé ya, da fèn on ko̱ mi tèn gui bil njaka baï ka l’heure o̱kèo̱, oui sa on; baï ko̱ tane ti ba ouime ko̱ sa ya, da ba Saint‐Esprit.

¹² Da yé yine ma souti yine bi houl, da baba ma ndé nding on jing goune nè; da yé goundi ma ourou siya ka pong baba klili tèn ma klili, ka hi kli bi houl.

¹³ Da yé njoukouli bon ma jèk oui baï toul ling ni, da kè on ko̱ mi laïbi pou ta bo̱ltèn sèkèrèkè, yé kè ma kou.

¹⁴ Da ko̱ ouime ko̱ ko̱ sènafèn mi bo bilkaou ka o guèl on ko̱ mi tane ma an kème o rou ya, — dadaon an kè ko̱ kèn mi tou nguite, — yé kli on ko̱ mi kaou an guèl Judée mi ngou hé sé guè toul souraguèl;

¹⁵ da kè on ko̱ kaou toul voulou mi diri gui tiya ya, baï rina bil voulou, baï bina fèna an bil voulè ya.

¹⁶ Da kè on ko̱ kaou waka mi féré ré fal baï bina loukou la nè ya.

¹⁷ Da go̱ro̱ séta mi ba baï a waïn bili, tèn kli on ko̱ mi hi pame hi goundi ka name o̱kèo̱!

¹⁸ Da oui hiou Ouone baï an fèn on mi tane gui ka ba féou tétél ya.

¹⁹ Baï ko̱ ka name o̱kèo̱, yé fèn to̱ko̱nassé ma gui ko̱ mi tane ga ti on jinguèl ka tang ambèl ya, ka titilikè ko̱ Ouone mi mosso koukoula bo̱l tèn kassénaï, da yé fèn on ma tèn mahana ka on ka séssé hana ya.

²⁰ Da tokoré Nanjou mi tane ga koung gara name on bi guè mbèl ya, yé njoukouna mbéo ba kouna tane tiya; da ba baï toula kli on ko̱ Ouone mi wal kli bi ka sane kli, mi ko̱ kème koung namkè bi.

²¹ Ka name o̱kèo̱ tokoré njoukouna mi sa hi oui: Mo ko̱, Christ makaou guèl aïn! Maléba: Kè makaou guèl o̱; oui tane la baï nè ya.

²² Baï ko̱ yé wo̱ko̱ christli, da wo̱ko̱ prophèteli ma tèn gui, da kli ma nding fèn to̱ko̱nakèli tèn fèn sakamli, baï an klime mong kli on ko̱ Ouone mi wal kli bi, tokoré klime mabongkè.

²³ Da oui ènrèn mone baï bèlta; baï ko̱ mème ti sa fèn aïnli bon hi oui ka kome.

²⁴ Da ka name o̱kèo̱, sèkèrèkè fèn to̱ko̱nassé on, séssé ma féré tèn yirikè, da féou ba chana tane tiya,

²⁵ da yé mèssèli ma ta lé gui tiya ka nonkala, da njèranli, on ko̱ na nonkala ma to̱.

²⁶ Da afal on, yé kli ma ko̱ Goune a njoukou mi yé guina an toul yiri mbame, jing loukou njèran da jonafèn.

²⁷ Da afal on, yé kè ma pi angeli, baï mangna njoukouli on, ko̱ kème walbi, ka mboro guèl koukounali nèng, da ka an sèkèrè guèl ndèk an koukoula bo̱l tèn sèkèrè guèl ndèk an nonkala.

²⁸ Da yé di njoui mi to̱ko̱ ébèlbaï hi oui. Ko̱ wanando̱ko̱kèli mi toung bourourou, baï an goïkè mi lome, yé oui toutou ba zal mi hèdi tou.

²⁹ Mono oui kéng, ko̱ ouime ko̱ none fèn aïnli mi yé guina, oui toutou ba Goune a njoukou diya tou, da hèdi njaka mboro tou.

³⁰ Babaï, mi mè sa hi oui, yé mèrèn njoukou aïnli ba tana tiya, bo̱l tèn ko̱ none fèn aïnli bon mi tèn kala ka babaï.

³¹ Yé nonkala tèn koukoula ma ta, da baïnjaka nili ba tana tane tiya.

³² Da baï an name o̱kèo̱ tèn l’heure o̱kèo̱ njoukouna mbéo mi tane tou ya, yé angeli an nonkala tou ya, tèn Goune, bo̱l ba Baba fènè ka ho̱kè.

³³ Oui ènrèn mone baï bèlta, oui zèng, ka hiou Ouone; baï ko̱ ouime tane ga tou namkè ya.

³⁴ Mabahana ka njoukouna on ko̱ mi sé bi amè guè pou aféké, ka yèng voulè, da sa bi njaka koï nèli, da hi bakara hi kli mane mbéo mbéo bon, da kème sa bi njaka njou‐pèngnakè an kème ndé zèng kéng.

³⁵ Mono on, oui zèng, baï ko̱ oui tane tou namkè ko̱ nanjou voulou mi gui ya, tongna ka bèlaléou, maléba ka hangnachoung loukou, maléba ka kanaka a kaka, maléba ka guèlapélé;

³⁶ baï ko̱ tokoré kème gui gata, kème ko̱ oui an toul name ya.

³⁷ Da fèn aïn ko̱ mème sa hi oui, mè sa hi ba njoukouli bon: Oui zèng.