Saint Luc 9 - Féké Testament 1947

¹ Da Jésus mi di njou‐séna bong nèli botoulè‐séré jing hana, ka hi njèran hi kli, da sa bi njaka kli baï nina zabololi, da baï haïna mona njou‐jangmali.

² Da kè pi kli baï sana mboura bilkaou a Ouone; da baï haïna mona njou‐jangmali.

³ Da kè sa hi kli: Oui tane bi fèna mbéo baï a domboro ya, ti ba di bana ya, maléba ngou ya, maléba mapa ya, maléba mbo̱ri ya, da oui sé jing la siya dala fal hana séré ya.

⁴ Bil voul hana ko̱ ouime ri guè ndourou, oui kaou ndourou, bo̱lgo̱ oura abaï an pou on.

⁵ Da kli on ko̱ tane ga pame oui ya, ko̱ ouime yé oura an pou on, oui to sassal an sabo̱ko̱ baï, ko̱ ba sana bongbaï hi kli.

⁶ Da kli ourou da sé bil pouli bon ka sa mboura bèlabaï, da haï mona njou‐jangmali manguèl bon.

⁷ Da Hérode tétrarque mi la baï fèn on ko̱ Jésus mi nding, kè kèrè ka go̱rè nyèta, baï ko̱ njoukou hanali mi sa ba Jean mi tome an wora houli;

⁸ da afékéli mi sa Élie mi gui tou, da afékéli mi sa ba hana mbéo an wora tang prophèteli on ko̱ mi tome tou.

⁹ Da Hérode mi sa: Mè koung sol a Jean guèfal tou, da njoukou on ba guè ko̱ mème la baï aïnli guè toulè lé? Da kè nza mborokè baï ko̱na nè.

¹⁰ Da ko̱ njou‐mboro‐pinali mi féré, kli to̱ko̱ bong fènli bon hi nè ko̱ klime nding. Da kè pame kli, da kè ya kli sé guèl aféké katoul, an bèl pou on ko̱ lingkè ba Bethsaïda.

¹¹ Da ko̱ ro̱kè njoukouli tou on, kli sé falè. Da kème pame kli bèlta, da kè sa hi kli toul bilkaou a Ouone; da kè haï mona njoukouli on ko̱ mi jiji.

¹² Da ko̱ séssé mi ri tou, njoukou nèli botoulè‐séré mi guè monè, da sa hi nè: Mo sa hi ro̱kè njoukouli an klime sé an bil pouli da njaka wakali ko̱ na diya baï kaouna, ka nza laka son; baï ko̱ name pane woropa guèl aïn.

¹³ Da kè sa hi kli: Oui hi laka hi kli an klime son. Da kli sa: Na jing tarou dioui da njouïli séré bo̱l, maléba name sé ka zé laka hi njoukou aïnli bon.

¹⁴ Baï ko̱ klime ba njoukouli ko̱ hèdi ténakè‐bongkè‐dioui, Da kè sa hi njou‐séna bong nèli: Oui sa hi kli an klime ndoï joup joup manguèl bongkè‐dioui, dioui.

¹⁵ Da kli nding on, da njoukouli bon mi kaou koukoula.

¹⁶ Da kè ya tarou dioui on da njouïli séré, kè ènrèn sé guè nonkala ka same kli, da kème haou, da hi njou‐séna bong nèli baï walakè hi ro̱kè njoukouli on.

¹⁷ Da kli bon mi son ka mba, da kli fan gara boutoukè on ko̱ mi na mane mba karo botoulè‐séré.

¹⁸ Da baï mi gui mahana ka on, ko̱ Jésus mi hiou Ouone ka foli, da njou‐séna bong nèli kaou jing nè, kè oui kli, ka sa: Rokè njoukouli on, sa ba mè ba guè lé?

¹⁹ Da klime féré sa, ka sa: Kli sa ba mo ba Jean‐Baptiste; da afékéli sa, mo ba Élie; da afékéli mi kaïn sa, mo ba hana mbéo an wora tang prophèteli on ko̱ mi tome tou.

²⁰ Da kè sa hi kli: Da abaï oui sa ba mè ba guè lé? Da Pierre mi féré sa, ka sa: Mo ba Christ a Ouone.

²¹ Da kème gna bi njaka kli, da sa bi njaka kli, baï an klime sa fèn aïn hi njoukouna mbéo ya.

²² Kè sa: Yé Goune a njoukou ma to̱ko̱ssé jing fènli nyèta, da tangchidoli da loukou sacrificateurli tèn njou‐to̱ko̱na bong guingnali ma pong nè, ka i nè, da name an saïkè kè ma tome.

²³ Da kè sa hi kli bon: Tokoré njoukouna mi ji guina fali, dadaon an kème njomo monè fènè da bi di‐croix nè mane name bon, ka gui fali,

²⁴ baï ko̱ njoukouna ko̱ mi ji kouna yana nè, yé kè bo̱l yana nè, da njoukouna ko̱ mi bo̱l yana nè baï touli, yé kè kou yana nè.

²⁵ Da yé njoukouna mi jing ba fèn, ko to̱ko̱ré kème jing bilkaou koukoula bon, da laou‐è mi bo̱l ka bo lé?

²⁶ Baï njoukouna ko̱ mi nding chonron baï touli da baï toul baïnjaka nili, yé Goune a njoukou ma ndé bi chonron baï toulè kéng, ka name on ko̱ kème guè an bil jonafèn nè, da an bil jonafèn a Baba; da tangna fofoto angeli.

²⁷ Da mème sa hi oui ka babaï: An hanali an wora kli on ko̱ o guèl aïn, yé kli ba ko̱na houl tane tiya, bo̱l tèn klime ko̱ bilkaou a Ouone.

²⁸ Da baï mi gui mahana ka on, ko̱ name mi hèdi difala‐saï afal ko̱ kème sa baï aïnli, kè ya Pierre da Jean tèn Jacques sé jing nè, ka hé toul souraguèl baï hiouna Ouone.

²⁹ Da ko̱ kème pane hiouna Ouone nonè mi komo, da la nè mi poukou ta, ka cha maïya.

³⁰ Da mono, njoukouli séré mi sa baï hi nè, kli ba Moïse kira Élie,

³¹ kli on ko̱ mi tèn bil jonafèn, da sa baï toul houlè, ko̱ kè ding baï houl an pou Jérusalem.

³² Da name mi ba Pierre, da kli on ko̱ kaou jing nè, da ko̱ klime tome name tou kli ko̱ jonafèn a Jésus tou, da njoukouli séré ko̱ o jing nè.

³³ Da baï mi gui mahana ka on, ko̱ klime yé oura an bèl monè ka guè séna, Pierre mi féré sa hi Jésus: Njou‐to̱ko̱nafèn, on bèlta baï an name kaou guèl aïn; da an name bara tentli saï, aïn mbéo baï no, da aïn mbéo baï a Moïse, da kènkè ba baï a Élie. Kè tane ga tou fèn on ko̱ kème sa ya.

³⁴ Ko̱ kème pane sana baï on, da yiri mbame mi gui da goukou toul kli, da waou mi i njou‐séna bongli ta ko̱ klime ri sé bil yiri mbame on.

³⁵ Da bounaka mi ba gui ka bil yiri mbame on, ka sa: Kè on ba Goune ni, ko̱ mème sé hang‐è nyèta: oui la nè!

³⁶ Da ko̱ bounaka mi ba, kli ko̱ ba Jésus ka ho̱kè on, Da njou‐séna bongli kaou yime, da kli tane ga sa hi njoukouna mbéo ka name o̱kèo̱ toul fènli on ko̱ klime ko̱ ya.

³⁷ Da baï mi gui mahana ka on, ko̱ pélé mi taka, ko̱ klime diri souraguèl ro̱kè njoukouli mi woutoul jing Jésus.

³⁸ Da mono njoukouna mbéo an wora ro̱kè njoukouli on mi wan njaka guè siya, ka sa: Njou‐to̱ko̱nafèn, mè sa jo̱jo̱ no an mome ko̱ goune wonron ni, baï ko̱ kème ba pomboï goune mbéo ni.

³⁹ Da mono, esprit hana mbéo mi mba nè, da kè hidifèn mingta; da kou mi nding nè, da njakè fourou, da ko̱ monè mi na boulèboulè esprit on mi lé tèna an monè pélé.

⁴⁰ Da mè sa jo̱jo̱ njou‐séna bong noli, an klime ni nè tèn kala, da kli tane mapélékè ya.

⁴¹ Da Jésus mi féré sa, ka sa: O! mèran njoukou aïnli ko̱ kaou ka ndouri da sé maï maï, yé mè kaou jing oui bongkè di ane, da panran oui lé? Mo ya goune no gui moni.

⁴² Da ko̱ kème pane guina, zabolo mi wou nè bou koukoula, da to̱ko̱ssé hi nè ta. Da Jésus to esprit dakame on, ka haï mona goune aïn, da féré hi nè hi baba nè.

⁴³ Da laou kli bon mi sé siya baï toul bassana loukou njèran a Ouone. Da ko̱ klime pane kaouna hidong toul fènli bon on ko̱ Jésus mi nding, kè sa hi njou‐séna bong nèli:

⁴⁴ Oui yèng baïnjaka aïnli, an mi gui soukou baï, baï ko̱ yé kli ma souti Goune a njoukou bi ndo̱ka njoukouli.

⁴⁵ Da kli mi tane ga tou saon baï aïn ya; da baï on mi mou jing kli, baï ko̱ kli ma baï tounakè nguite ya; da waou mi i kli baï ouina nè toul baï aïn.

⁴⁶ Da kli kèrè ka bo̱ko̱ go̱ro̱ kli jing hana, ba yé guème ko̱ ta toula ba nèli lé?

⁴⁷ Da ko̱ Jésus mi toutou kèrafèn an bo̱ko̱ go̱ro̱ kli, kè ya lélé goune ka bi nè bi bèl monè,

⁴⁸ ka sa hi kli: Njoukouna ko̱ mi ya lélé goune aïn ka ling ni, kème ya ba mè tou; da njoukouna ko̱ mi ya mi, kème ya ba kè on ko̱ mi pi mi. Baï ko̱ kè ba bètèrèkè an woro baï bon, kè mini ko̱ ba loukoukè.

⁴⁹ Da Jean mi féré sa, ka sa: Njou‐to̱ko̱nafèn, na ko̱ njoukouna ko̱ mi ni zabololi ka bil ling‐o̱; da name dèn nè bi, baï ko̱ kème tane ga sé fal jing na ya.

⁵⁰ Da Jésus mi sa hi nè: Oui tane dèn nè bi ya, baï ko̱ njoukouna ko̱ mi tane pong oui ya, mi jing oui.

⁵¹ Da baï mi gui mahana ka on, ko̱ name nè mi hèdi manabongkè tou an kème ourou an koukoula, ka sé guè nonkala, kè bi hang‐è rou baï séna guè pou Jérusalem.

⁵² Da kè pi njou‐mboro pinali ti dambèl hi nè, da kli sé ka kan pou a njou‐Samarieli mossona guèl koro nè.

⁵³ Da njoukouli an soko mi tane ga pame nè ya, baï ko̱ kème bi hang‐è baï séna guè pou Jérusalem.

⁵⁴ Da ko̱ njou‐séna bong nèli, Jacques kira Jéan ko̱ fèn on, kli sa: Nanjou, mo jiji an name oui baï an hèlè mi diri gui ka nonkala, ka rèng kli lé?

⁵⁵ Da Jésus mi ki monè, ka to kli, da kè sa: Oui tane ga tou laou a ésprit on ko̱ kaou an bil baï ya.

⁵⁶ Baï ko̱ Goune a njoukou mi tane ga gui baï ina njoukouli ya, kè gui baï kouna njoukouli. Da kli sé guè pou aféké.

⁵⁷ Da ko̱ klime sé domboro, njoukouna mbéo mi sa hi nè: Guèl bon ko̱ mome sé, yé mè ma sé falo̱.

⁵⁸ Da Jésus mi sa hi nè: Kou a guéli mana, da ndoïli an nonkala makaou ka voula kli; da guèl mi tane ti an Goune a njoukou mi bi toulè guè rou ya.

⁵⁹ Kè sa hi aféké: Mo gui fali. Da kè sa: Nanjou, yèng mi an mème sé ka goro baba ni ti dambèl da.

⁶⁰ Da Jésus sa hi nè: Mo yèng an houli mi goro dodok houl klili fèn kli; da mo sé ka sa mboura bilkaou a Ouone.

⁶¹ Da aféké mi sa kéng: Nanjou, mè ma sé falo̱, da mo yèng mi an mème sé ti dambèl, ka name kli ko̱ kaou bil voulou jing mi.

⁶² Da Jésus sa hi nè: Njoukouna ko̱ bi pan bi ndo̱kè baï panapaï, da ki ènrèn kaïn‐è, kè mapélékè an bilkaou a Ouone ya.