Saint Luc 24 - Féké Testament 1947

¹ Da titili name semaine, ka toulapélé, kli gui njaka pal jing épice dongui ko̱ kli mosso tou.

² Da kli ko̱ loukou kone saou an njaka pal mi bourou guèfal tou.

³ Da kli sé guè bilkè ka ko̱ mona Nanjou Jésus ya.

⁴ Da baï mi gui mahana ka on, ko̱ klime pane kaouna chon, njoukounali séré mi o bèl mone kli da la kli mi o̱ ta.

⁵ Da ko̱ waou mi i kli maïya, kli ding toul kli guè koukoula, da njoukouli on mi sa hi kli: Baïfèn da ouime nza kè on ko̱ mi yan an wora houlkèli lé?

⁶ Kè tane ti guèl aïn ya, da kè tome tou. Oui kèrè an bil go̱ro̱ baï ka mboro baï on ko̱ kème sa hi oui ambèl an guèl Galilée,

⁷ ka sa: Yé kli ma souti Goune a njoukou bi ndo̱ka béké njoukouli, da kli ma bara nè bi di‐croix da name an saïkè kè ma tome.

⁸ Da kli kèrè ka go̱ro̱ kli bong baïnjaka Jésus.

⁹ Da kli ourou an njaka pal ka féré, da kli sa fènli on bon hi kli on botoulè‐mbéo, da garakèli bon.

¹⁰ Waïnli on ko̱ mi sa fènli on hi njou‐mboro‐pinali ba Marie a Magdala, Jeanne da Marie ma a Jacques tèn waïn afékéli ko̱ mi kaou jing kli.

¹¹ Kli la baïnjaka kli mahana ko̱ kli sa bo̱on ka none kli, da kli tane ga la baï aïn bi laou kli ya.

¹² Da Pierre mi ourou siya ka ngou sé njaka pal. Kè ding ka po ènrèn sé bil lo̱ko̱ pal, kè ko̱ la lin mana an koukoula; da kè sé voulè, go̱rè dou ta baï fèn aïn ko̱ mi tèn tou.

¹³ Mono on, ka name o̱kèo̱ njoukouli séré an woro kli mi sé guè pou aféké ko̱ klime di lingkè ba Emmaüs, ko̱ mi na hèdi kilomètre botoulè‐séré baï séna guè pou Jérusalem.

¹⁴ Da kli sa kènakè jing hana baï toul fènli on bon ko̱ mi tèn tou.

¹⁵ Da baï mi gui mahana ka on, ko̱ klime pane sanakè ka kèrè ka bo̱ko̱ go̱ro̱ kli, Jésus fènè mi gui bèl mone kli, ka sé domboro jing kli.

¹⁶ Da none kli mi tou birou tou, baï an klime tane tou nè ya.

¹⁷ Da kè sa hi kli: On ba baïfèn mi oui an sa kèna toulkè jing hana ko̱ ouime sé domboro lé? Da kli o da ko̱ none kli mahana ko̱ go̱ro̱ kli mi sé kli ta.

¹⁸ Da hana mbéo ko̱ ling‐è ba Cléopas mi féré sa, ka sa hi nè: Mo ho̱ko̱ on ko̱ mi bi an pou Jérusalem, da mo tane ga tou fèn on ko̱ mi tèn ka name aïnli ya lé?

¹⁹ Da kè sa hi kli: Fèn ba fèn lé? Da kli féré sa hi nè: Ba baï a Jésus a pou Nazareth, ko̱ ba njèran prophète, ka mboro ndingna fèn, tèn baïnjaka an nona Ouone, tèn nona njoukouli bon,

²⁰ da ka mbora hane mi ko̱ loukou sacrificateurli da zaworo nali mi souti nè, baï an klime kon barabaï houl toulè, ka bara nè bi di‐croix.

²¹ Da na oli ba kè mini ko̱ ma cho Israël, da baï aïn mi ta fènli on bon kassénaï ba name saïkè ko̱ fènli on mi tèn tou.

²² Da laou na mi sé siya baï toula waïn hanali an wora na, kli on ko̱ mi sé guè njaka pal ka toulapélé,

²³ da ko̱ klime tane ga ko̱ monè ya, kli gui, ka sa, kli ndé ko̱ angeli mahana ka lo̱la kéng, da kli sa ba kè makaou ka none.

²⁴ Da njoukou afékéli an woro na mi sé guè njaka palkè, da kli ko̱ fèn mahana ko̱ waïnli on mi sa, da kli tane ga ko̱ nè ya.

²⁵ Da Jésus sa hi kli: Oui njou‐touna fènli ya, da go̱ro̱ baï mi tane ga la bilaou fènli bon ko̱ prophèteli mi sa tou!

²⁶ On ba baï a Christ, an kème to̱ko̱ssé toul fènli on ka ri sé guè bil jonafèn nè ya lé?

²⁷ Da kè tissaon jing Moïse tèn prophèteli bon, baï to̱ko̱na saon baï an guèli bon ko̱ Takarata a Ouone mi sa baï toulè.

²⁸ Da ko̱ kli hèdi pou on, ko̱ klime guè séna rou, kè nding mahana ko̱ kè ji tana.

²⁹ Da kli dèn nè bi, ka sa: Mo kaou jing na, baï ko̱ bèlaléou mi lé tou da guèl mi ndé tama tou. Da kè sé guè bil voulou ka kaou jing kli.

³⁰ Da baï mi gui mahana ka on, ko̱ kème kaou table jing kli, baï sona laka kè ya mapa; ka same, da kè haou mapa, ka hi kli.

³¹ Da none kli mi bourou tou, da kli tou nè; da kè bo̱l an none kli.

³² Da kli bakèdakè jing hana: Go̱ro̱ na sé na mahana ka hèlè, ko̱ kème sa baï hi na an domboro soko, da ko̱ kème wéré none Takarata a Ouone hi na lé?

³³ Da kli ourou siya ka l’heure o̱kèo̱ ka féré sé pou Jérusalem, da kli jing kli on botoulè‐mbéo ko̱ mi ndoï guèl mbéo, da njoukou afékéli ko̱ mi kaou bèl mone kli,

³⁴ ka sa: Nanjou mi tome ka babaï tou, da mi tèn guè mona Simon.

³⁵ Da njoukouli séré on ko̱ mi to̱ko̱ baï toul fèn on ko̱ mi nding jing kli an domboro, da ka mboro hani mi ko̱ kli toutou nè ko̱ kème haou mapa.

³⁶ Da ko̱ klime pane sana baï on, Jésus fènè mi o an wora kli, ka sa hi kli: Go̱ro̱ iki mi gui mone baï.

³⁷ Da kli kaou ka ba waou da go̱ro̱ kli mi dou ta, da kli sa an bil go̱ro̱ kli ba kli ko̱ esprit hana tou.

³⁸ Da kè sa hi kli: Baïfèn da mone baï mi hou mbi on da baïfèn mi oui an sa ka go̱ro̱ baï lé?

³⁹ Oui ko̱ ndo̱ko̱ ni tèn bo̱ko̱ ni on ba mè fèni, oui fakara mi ka ko̱ mi; baï ko̱ esprit tane ti ka naïn tèn hourou mone ya, mahana ko̱ ouime ko̱ mi.

⁴⁰ Da afal ko̱ kème sa on tou kè to̱ko̱ ndo̱kè tèn bo̱kè hi kli.

⁴¹ Da ko̱ klime pane da tane ga la bilaou ya baï jangnandaï, laou kli sé siya da kè sa hi kli: Laka mana jing oui an guèl aïn lé?

⁴² Da kli hi boutou njouï on ko̱ kli to̱ko̱ da souna jourou hi nè.

⁴³ Da kè ya ka son an none kli.

⁴⁴ Da kè sa hi kli: On ba baïnjaka ni, ko̱ mè sa hi oui jinguèl, ko̱ mème pane jing oui, mapélékè a baï ni bon mi wéré kon kala ka babaï, ko̱ mi dé an bil guingna Moïse tèn prophèteli da psaumeli.

⁴⁵ Da afal kè bourou laou kli an klime tou saon Takarata a Ouone.

⁴⁶ Da kè sa hi kli: Mahana ka on ko̱ mi dé, yé Christ ma to̱ko̱ssé, ka tome an wora houlkèli ka name an saïkè.

⁴⁷ Da kli ma tissaon an pou Jérusalem baï sana mboura hèkèna da kona békéfèn pa ka bi ling‐è, hi pime pouli bon.

⁴⁸ Da oui ba njou‐sana bongbaïli toul fènli on.

⁴⁹ Da mono, mè ma pi kè on ko̱ Baba ni bi gonjakè hi oui; da oui kaou an pou Jérusalem bo̱l tèn oui bou njèran ko̱ mi tèn an nonkala da.

⁵⁰ Da kè sé jing kli bo̱l tèn an klime kaou bèl pou Béthanie, da kè dara ndo̱kè guè siya ka same kli.

⁵¹ Da baï mi gui mahana ka on, ko̱ kè same kli, kè yèng kli, ka hé sé guè nonkala.

⁵² Da kli hiou nè ka féré gui pou Jérusalem ka jangnandaï nyèta.

⁵³ Da kli kaou an bil temple guèbassoko ka jone Ouone.