Saint Luc 2 - Féké Testament 1947

¹ Da baï mi gui mahana ka on ka name o̱kèo̱, mono, César Auguste mi koung guingna ka pi an njou‐koukoulali bon mi sé baï déna ling kli an takarata.

² Titili déna ling kli a takarata tissaon ko̱ Quirinus ba njou‐name gangna a Syrie.

³ Da njoukouli bon mi sé guè dodok pou kli, baï déna ling kli.

⁴ Da Joseph kéng mi ourou an pou Nazareth guèl Galilée baï héna sé guè pou Bethléhem, an guèl Judée, an pou a David, baï ko̱ kè gui ka voula da mèran David,

⁵ baï déna ling‐è jing Marie waïn nè, ko̱ kème baka nè, ko̱ mi mbabil pé tou.

⁶ Da baï mi gui mahana ka on, ko̱ kème pane kaouna ndourou, name mboungna a Marie mi tèn tou.

⁷ Da kème mboung boutaïn nè ba goune wonron. Kè kiwili nè ka la, da bou nè bil kouba sona laka ndaïyali, baï ko̱ guèl mi tane ti wonron voulou baï akli ya.

⁸ Da njou‐kora badouali makaou toul mbaou an mbé pou on, baï ko̱ra badoua klili an ndourou ka hangnachoung.

⁹ Da mono, ange a Nanjou mi tèn guè mone kli, da jonafèn a Nanjou mi cha gui ki kli. Da waou mi i kli maïya.

¹⁰ Da ange mi sa hi kli: Oui waou ya; baï ko̱ mème gui baï to̱ko̱na bèlabaï hi oui, ko̱ ba fèn jangnandaï ka wala, baï a njoukouli bon:

¹¹ ka name aïn an pou a David, Njou‐yana‐baï‐toul baï ko̱ ba Christ da Nanjou mi ko̱ tèn tou.

¹² Da on ba fèn to̱ko̱nakè hi oui: Yé oui ma ko̱ jo̱ï goune ko̱ klime kiwili nè ka la, da kème na bou an bil kouba sona laka ndaïyali.

¹³ Da koukoulion ro̱kè wilkè ka nonkala mi tèn gui jing ange aïn, da klime jone Ouone, ka sa:

¹⁴ Jonafèn hi Ouone an nonkala an sèkèrè guèl ndèk. Da go̱ro̱ iki an koukoula an wora njoukouli ko̱ kème ko̱ kli bèl monè ta!

¹⁵ Da baï mi gui mahana ka on, ko̱ angeli mi ourou an mone kli ka féré ré sé guè nonkala, njou‐kora badouali mi bakèdakè jing hana, ka sa: Gui, an name sé bo̱l tèn pou Bethléhem, ka ko̱ fèn aïn ko̱ mi tèn tou, ko̱ Nanjou mi to̱ko̱ hi na.

¹⁶ Da klime sé gata, ka ko̱ Joseph kira Marie jing jo̱ï goune, ko̱ mi na bou an bil kouba sona laka ndaïyali.

¹⁷ Da ko̱ klime ko̱ nè, kli do̱li ka to̱ko̱ baï aïn ko̱ klime la ti dambèl an toula goune aïn guèbambèl.

¹⁸ Da laou a njoukouli bon ko̱ mi la baï aïn, mi sé siya toul fèn aïnli ko̱ njou‐kora badouali mi sa hi kli.

¹⁹ Da Marie mi pèng baï aïnli bon bèlta ka bi laou‐è toulkè.

²⁰ Njou‐kora badouali mi féré fal, ka jone Ouone da jone nè baï toul fènli on bon ko̱ klime la ka ko̱ tou, mahana ka aïn ko̱ angeli mi sa hi kli ka titilikè.

²¹ Da ko̱ name mi mane difala‐saï tou, baï bina goune aïn baï ina gassa, kli bi ling‐è ba Jésus, ling on ko̱ ange mi ti di hi nè ambèl da ma nè mi tissaon mbanabil.

²² Da ko̱ name dofèn toura akli mi o̱tou, mahana ka bong guingna Moïse, Joseph da Marie mi bi nè sé guè pou Jérusalem, baï hina nè hi Nanjou,

²³ mahana ka on ko̱ mi dé an guingna Nanjou: Boutaïn goune wonron bon ba njou‐tangna fofoto hi Nanjou,

²⁴ da baï hina sacrifice mahana ko̱ bong guingna Nanjou mi sa: Nguédéli séré maléba jo̱jo̱li pigeonli séré.

²⁵ Da mono, njoukouna mbéo makaou an pou Jérusalem, ling‐è ba Siméon. Njoukou aïn ba guédék, ka pèng bong njaka Ouone, kè voro kè on ko̱ ma lé mbèla Israël, da Saint‐Esprit mana toulè.

²⁶ Da Saint‐Esprit mi ti to̱ko̱ hi nè ambèl ba yé kè ma ko̱ Christ a Nanjou ambèl da afal kè ma hou.

²⁷ Esprit fènè mi déou laou‐è an kème sé bil temple, da ko̱ Marie kira Joseph mi bi jo̱ï goune Jésus guè bil temple, baï ndingna jing nè mahana ko̱ bong guingna mi sa,

²⁸ kè bi nè bi ndo̱kè da same Ouone, ka sa:

²⁹ Kassénaï, Nanjou, mo yèng koï no, An kème guè ka go̱ro̱ iki, mahana ko̱ baïnjako̱ mi sa,

³⁰ Baï ko̱ noni mi ko̱ mboro yana‐baï‐toul amo tou,

³¹ Ko̱ mome mosso an nona mèran njoukouli bon tou.

³² Takanafèn baï chana kon toula mèran gentili, Da jonafèn a njou‐Israëli, njoukou noli.

³³ Laou a baba nè tèn ma nè mi sé siya, baï toul fèn aïnli ko̱ kème sa toulè.

³⁴ Da Siméon mi same kli, ka sa hi Marie, ma Jésus: Mo ko̱, baï an Goune aïn, yé njoukouli nyèta an Israël, ma lé ka kaïn ourou siya ba aféké, da kè ma tèn ba fèn to̱ko̱nakè ko̱ ma joukourou njoukouli da kli ma na bil hana,

³⁵ da yé gamba ma ndé té laou‐o̱ kéng; ka bi none kèrafènli ka go̱ro̱ a njoukouli nyèta kala.

³⁶ Da prophète waïn mbéo makaou ndourou ling‐è ba Anne, goune a Phanuel, ka douk a Aser. Kème po̱ko̱ro̱ maïya, ka kaou jing wa nè jinguèl hèdi saka difala‐séré bo̱l ko̱ kème pane ka tikila.

³⁷ Da kème kaou ba waïn soré mane saka bongkè‐difala‐saï‐faltoulkè‐nèng, ka tane ourou an bil temple ya. Kè laïbi ndingna bakara hi Ouone ka hangnachoung tèn séssé jing changna laka ka sana jojo Ouone.

³⁸ Kème ndé gui kéng ka mbé l’heure o̱kèo̱ da kaou koukoula hi Ouone, ka sa toula Jésus hi kli on bon ko̱ voro yana‐baï‐toul a Jérusalem.

³⁹ Da ko̱ klime nding mahana ka bong guingna Nanjou o̱tou, Joseph kira Marie mi yé réna féré fal sé guè dodok pou kli Nazareth guèl Galilée.

⁴⁰ Da jo̱ï goune aïn mi mbambi, ka gui njèrèn, da mba ka cho̱kna nyèta; da ndingna mbo̱l a Ouone mi na toulè.

⁴¹ Da ma nè kira baba nè mi hanran siya saka bon sé guè pou Jérusalem baï gnèna laka Pâque.

⁴² Da ko̱ saka nè mi mane botoulè‐séré tou, klime hé sé guè pou Jérusalem mahana ka do gnèna laka.

⁴³ Da ko̱ name kli mabongkè tou, klime yé féra fal, goune Jésus mi pane fal an pou Jérusalem. Ma nè kira baba nè mi tane tou on ya.

⁴⁴ Da klime kèrè ba kè ma pane guina an wora ro̱kè njoukouli on, kli sé ma name mbéo, da klime nza nè guè mona yine klili tèn an mona bako̱la klili.

⁴⁵ Da ko̱ klime tane ga ko̱ nè ya, kli kaïn ré féré fal guè pou Jérusalem baï nzana nè.

⁴⁶ Da baï mi gui mahana ka on, afal name saï klime jing nè an bil temple; kè kaou wora njou‐to̱ko̱nafènli baï lana baï kli da baï ouina kli.

⁴⁷ Njoukouli bon ko̱ mi la baï nè, laou kli mi sé siya baï lana cho̱kna nè, da baï on ko̱ kème féré sa hi kli.

⁴⁸ Da ko̱ klime ko̱ nè tou, laou kli mi sé siya, da ma nè mi sa hi nè; Goune ni, baïfèn da mo nding on jing na lé? Mo ko̱ baba no tèn mè, mi nza mo jing go̱ro̱ séta.

⁴⁹ Da kè sa hi kli: Baïfèn da oui an nza mi lé? Oui tane ga tou ko̱ dadaon ma an mème nding pina Baba ni ya lé?

⁵⁰ Da klime tane ga tou baï aïn ko̱ kème sa hi kli ya.

⁵¹ Da kème diri jing kli, ka sé guè pou Nazareth, ka la mboura kli; da ma nè mi pèng baï aïnli bon bi laou‐è.

⁵² Da Jésus mi hon ka cho̱kna, da jing mbo̱do̱ monè, da Ouone tèn njoukouli mi ko̱ nè bèl mone kli ta.