Saint Luc 19 - Féké Testament 1947

¹ Ko̱ Jésus mi gui pou Jéricho, kè ta sé bil pou.

² Da mono, nguèra njoukou makaou ko̱ ling‐è ba Zachée, ko̱ ba loukou njoukou ko̱ mang l’impôt.

³ Kè nza mborokè baï ko̱na kong Jésus ba guè lé; da kè tane mabongkè ya baï ko̱ njoukouli ro̱ko̱ta, da kè ba pong njoukou.

⁴ Da kè ngou ti dambèl ka hé di sycomore baï ko̱na nè, baï ko̱ Jésus ma ta domboro aïn.

⁵ Da ko̱ Jésus mi gui guèl on kè ènrèn guè siya, ka sa hi nè: Zachée, mo diri gui tiya gata; baï ko̱ dadaon an mème guè bil voulo̱ baï kaouna jing mo kassénaï.

⁶ Da kè diri guè tiya gata ka pame nè ka jangnandaï:

⁷ Da ko̱ klime ko̱ fèn on, kli bon gnonron fèn jing hana, ka sa: Kè sé da kaou jing njoukou ko̱ ba njou‐békéfèn.

⁸ Da Zachée mi o ka sa hi Nanjou: Mo ko̱, Nanjou, mè wal hanguèl fèn nili hi foïna njoukouli, da tokoré mème pènrèn ndo̱ko̱ ka ya fèn an ndo̱ka njoukouna, mè féré ka fèn nèli hi nè mane bo̱ko̱ nèng.

⁹ Da Jésus sa hi nè: Kassénaï, yana baï toul mi gui bil voulo̱ tou, baï ko̱ kè ba goune a Abraham kéng.

¹⁰ Baï ko̱ Goune a njoukou mi gui baï nzana da kouna kli on ko̱ mi bo̱l tou.

¹¹ Da ko̱ klime la baï on, Jésus mi sa ébèlbaï aféké kon toulkè, baï ko̱ kème hèdi bèl pou Jérusalem, da kli kèrè ka go̱ro̱ kli, bilkaou a Ouone mi hèdi baï guina tou.

¹² Da mono kè sa on: Njoukouna mbéo ko̱ mi tèn an voula gangna njoukou, kè sé guèl aféké dita baï jingna bilkaou baï nè fènè soko, da féré.

¹³ Da kè di koï nèli bo da wal mbo̱ri bo hi kli mbéo mbéo bon, da kè sa hi kli: Oui jing afékéli kon toulkè bo̱l ko̱ mème féré da.

¹⁴ Da njou‐pou nèli mi jèk nè, da kli pi njou‐mboro pina sé falè, ka sa: Na tane ji bo̱ko̱kè an njoukou aïn mi na gangna toula ya.

¹⁵ Da baï mi gui mahana ka on, ko̱ nanjou mi féré ka pou aféké tou, ka ya bilkaou nè, kè di koï nèli ko̱ kème wal mbo̱ri hi kli, an kème toutou fèn aïn ko̱ klime jing kon toulkè.

¹⁶ Titili njoukou mi guè monè, ka sâ: Nanjou, mborikè mo jing afékéli bo kon toulkè.

¹⁷ Da nanjou mi sa hi nè: Mo nding bèlta, bèla koï; baï ko̱ mè ko̱ mo ndik laou‐o̱ toul goune fènli, mo na gangna toul pouli bo.

¹⁸ Da njou‐bakara an sérékè mi guè, ka sa: Nanjou, mborikè mo jing afékéli dioui.

¹⁹ Da najou mi sa hi nè kéng: Mo na gangna toul pouli dioui.

²⁰ Da aféké mi gui, ka sa: Nanjou, mo ko̱ mbo̱rikè mo, ko̱ mo hi mi, mi naï. Mè pèng bi bil la ni;

²¹ baï ko̱ mè ngou waou nono ta, baï ko̱ mo ba njèran njoukou; mo ya fèn ko̱ mo tane ga bou an ndourou ya, da mo lourou ba fèn ko̱ mome tane ga mèn ya.

²² Da nanjou mi sa hi nè: Mè ma wal baï hi mo ka ba baï njako̱ fèno̱, mo ba béké koï. Mo toutou mè ba njèran njoukou, da mè ya fèn ko̱ mè tane ga bou an ndourou ya, da mè lourou, ba fèn ko̱ mème tane ga mèn ya.

²³ Da on baï fèn da mo tane ga yèng mbo̱ri ni bi voul pèngna mbo̱ri, da on tokoré mème féré mè jing mbo̱ri ni afékéli kon toulkè ya lé?

²⁴ Da kè sa hi kli on ko̱ mi o bèlkè: Oui ya none mbo̱ri an ndo̱kè, ka hi njoukou on ko̱ mi jing mbo̱ri bo.

²⁵ Da kli sa hi nè: Nanjou, kè jing mbo̱ri bo.

²⁶ Mè sa hi oui, njoukouna ko̱ mi yé jing fèna, yé kli ma hi aféké hi nè, da njoukouna ko̱ mi tane ti jing fèna ya, yé kli ma ya fèn on guèfal ko̱ mana an ndo̱kè:

²⁷ Da bakèlio̱ jing mi, ko̱ mi ji ba an mème na gangna toul kli ya, oui ya kli gui guèl aïn ka i kli an noni.

²⁸ Da afal ko̱ Jésus mi sa baï on tou, kè sé dambèl baï héna sé guè pou Jérusalem.

²⁹ Da baï mi gui mahana ka on, ko̱ Jésus mi hèdi bèl pou Bethphagé da pou Béthanie da souraguèl on ko̱ lingkè ba Oliviers, kè pi njou‐séna bongli séré,

³⁰ ka sa: Oui sé fène baï guè bil pou on ko̱ na an bèl baï yo̱, da ko̱ ouime kan pou aïn tou, yé oui ma ko̱ goune torofio ko̱ klime gna nè ko̱ njoukouna mi tane ga kaou toulè ya. Oui sélè ka ya nè gui.

³¹ Da tokoré njoukouna mi oui oui ba: Baïfèn da oui sélè lé? Oui féré sa hi nè ba: Nanjou fènè mi ji nè.

³² Da kli on ko̱ kème pi kli, kli sé ka ko̱ fèn on mahana ko̱ Jésus mi sa hi kli.

³³ Da ko̱ klime sé ka sél goune torofio on tou, nanjou goune torofiokè mi sa hi kli: Baïfèn da oui sél goune torofio lé?

³⁴ Da kli sa: Nanjou fènè mi ji nè.

³⁵ Da kli gui jing goune torofio aïn hi Jésus, da kli kon la aklili toulè, da kli bi Jésus bi toulkè.

³⁶ Da ko̱ kème guè séna domboro, kli ba la aklili kon domboro.

³⁷ Da ko̱ kème hèdi pou Jérusalem tou, da ko̱ kème yé dira an souraguèl Oliviers, ro̱kè njou‐séna bongli bon tissaon baï jangnandaï da jone Ouone ka wan njaka baï toul njèran pinali bon on ko̱ klime ko̱ tou,

³⁸ ka sa: Same nanjoukaou ko̱ mi gui ka ling a Nanjou: Longna pou ba nonkala da jonafèn an nonkala an sèkèrè guèl ndèk.

³⁹ Da pharisien hanali an wora ro̱kè njoukouli mi sa hi Jésus: Njou‐to̱ko̱nafèn, mo ba baï hi njou‐séna bong noli.

⁴⁰ Da kème féré sa, ka sa: Mè sa hi oui, da tokoré klime kaou ka njaka kli, yé kondi ma sa baï!

⁴¹ Da ko̱ Jésus hèdi, kè ko̱ loukou pou an ndourou, da kè léléou baï toul loukou pou on,

⁴² ka sa: Tokoré mome toutou on kéng kassénaï ba name amo, yé fènli ko̱ ma hi longna pou hi mo! Da kassénaï kli moumou an nono tou.

⁴³ Baï namkè ma gui mono ko̱ bakèlio̱ jing mo ma dang lo̱ko̱ gui ki mo bon, da kli joro mo ka dèn domboro gui ki mo bon.

⁴⁴ Da yé kli ma bèngnèrèn mo tèn goune noli bon, da kli ma yèng kana kone hana bi toula ba nè ya, baï ko̱ mome tane tou name ko̱ Ouone mi gui mono tou ya.

⁴⁵ Da Jésus mi ri sé guè bil temple da kè tissaon baï nina kli on ko̱ mi jo̱l fènli an ndourou.

⁴⁶ Da kè sa hi kli; mahana ko̱ mi dé: Vouli ba voul baï hiouna Ouone da oui mosso nè tèn ba kou a njou‐riyali.

⁴⁷ Da kè to̱ko̱ fèn name bon an bil temple, da loukou sacrificateurli da njou‐tokona bong guingnali tèn loukou njoukouli aklili, mi nza mborokè baï ina Jésus.

⁴⁸ Da kli tane tou mborokè ya, baï ko̱ njoukouli bon mi pane lana baï nè bèl mone kli ta.