Saint Luc 13 - Féké Testament 1947

¹ Name o̱kèo̱ njoukou hanali makaou soko, da kli sa baï toula njou‐Galiléeli hi nè, ko̱ jinguèl Pilate mi ya séme akli, ka gnama jing sacrifice aklili.

² Da Jésus mi féré sa, ka sa hi kli: Oui kèrè ba njou‐Galiléeli on mi ba njou‐békéfènli ta gara njou‐Galiléeli bon, baï ko̱ klime to̱ko̱ssé jing fènli on lé?

³ Mè sa hi oui, haï. Da tokoré ouime tane ga hèkè békéfèn abaï ya, yé oui bon ma limna mahana ka kli.

⁴ Maléba ouime kèrè ko̱ njoukouli mi mane botoulè‐difala‐saï, ko̱ gangnafèn Siloé mi lé toul kli, ka i kli, kli on mi ba njou békéfènli ta njoukou afékéli bon ko̱ bi a pou Jérusalem lé?

⁵ Mè sa hi oui, haï. Da tokoré ouime tane ga hèkè békéfèn abaï ya, yé oui bon ma limna mahana ka kli.

⁶ Da kè sa ébélbaï aïn: Njoukouna mbéo mi goro di njouï mbéo an bil waka nè. Da kè gui baï nzana lénakè an ndourou, da kè tane ko̱ hana mbéo ya.

⁷ Da kè sa hi njou‐ko̱ra waka on: Mo ko̱, ma saka saï tou, da mè gui baï nzana léna di njouï on, da mè tane ga ko̱ hana mbéo ya. Oui koung di on: baïfèn da kè mi dèn koukoula on bi bo̱on lé?

⁸ Da kème féré sa, ka sa hi nè: Nanjou, mo yèng nè ka sakanaï da; da yé mème guéré sissili bi saonkè, da mème fan wènrèn kon bo̱ko̱kè kéng.

⁹ Da tokoré mi lé lénakè bo̱l go on bèlta; da tokoré mi tane lé ya, yé mo ma koung nè kon koukoula.

¹⁰ Da Jésus mi pane to̱ko̱na fèn an bil synagogue hana ka name sabbat.

¹¹ Da mono, waïn hana mbéo ko̱ kaou jing esprit jangma ko̱ komoron nè mane saka botoulè‐difala‐saï; kè biri, da sé guè siya pélé.

¹² Da ko̱ Jésus mi ko̱ nè, kè di nè, ka sa hi nè: Waïn, mè sél mo an jangma komoron no tou.

¹³ Da kè goukou ndo̱kè toulè, da koukoulion kè ourou siya tane guédék, ka jone Ouone.

¹⁴ Da go̱ro̱ a zaworo synagogue mi sé nè ta, baï ko̱ Jésus mi haï mona njou‐jangma, ka name sabbat, da kème féré sa, ka sa hi ro̱kè njoukouli: Name difala‐mbéo mana ko̱ njoukouli ma baï ndingna pina aklili, da mono on, oui gui ka name o̱kèlio̱ an kème haï mona njou‐jangma abaïli, da oui tane gui ka name sabbat ya.

¹⁵ Da Nanjou mi féré sa hi nè, ka sa: Oui njou‐mongnafènli, oui mbéo mbéo bon, ka name sabbat, mo sél ndaïya no tèn torofio no an bil hila aklili, ka miri kli sé guè mbi njona ya lé?

¹⁶ Da waïn on, ko̱ ba goune waïn a Abraham, kè on ko̱ Satan mi gna nè ma saka botoulè‐difala‐saï on, mapélékè yé mè sélè, ka name sabbat, an fèn on ko̱ mi gna nè ya lé?

¹⁷ Da ko̱ kème pane sana baï on, bakèlion bon mi kaou ka chonron da ro̱kè njoukouli on mi jangndaï baï fèn bon ko̱ hi jonafèn ko̱ kème nding.

¹⁸ Da mono on, kè sa,: Bilkaou a Ouone mahana ka fèn lé? da yé mè lé nè mahana ka fèn lé.

¹⁹ Kè mahana ka mèrèn sènévé, ko̱ njoukou mi ya ka wou kon bil waka nè; da bou da lang mone ka tèn ba di, da ndoïli an nonkala mi kaou an bong wanando̱ko̱kèli.

²⁰ Da kè sa ba aféké: Yé mè lé bilkaou a Ouone mahana ka fèn lé?

²¹ Kè mahana ka vounafèn on ko̱ waïn mi ya ka mou an bil chome mapa, ko̱ lé yong saï, bo̱l yé ko̱ mi vou mapa bon on.

²² Da Jésus sé mboro amè, ka ta loukou pouli tèn lélé pouli, ka to̱ko̱ fèn, da ta sé guè domboro séna pou Jérusalem.

²³ Da njoukouna mbéo mi sa hi nè: Nanjou, njoukouli ko̱ kou, kli mi nyè ya lé? Da kè sa hi kli:

²⁴ Oui joung hang baï, baï rina sé bil njaka mboro ko̱ mi aya. Mè sa hi oui, yé njoukouli nyèta ma nza mborokè baï rina sé guè bilkè, da kli mapélékè baï rina sé guè bilkè ya.

²⁵ Da tokoré nanjou voulou mi ourou ka tou njakakè birou tou, da ouime kaou kala, oui tissaon baï hangna njaka mboro, ka sa: Nanjou, bourou njaka mboro hi na! Da kè ma féré sa, ka sa hi oui: Mè tane tou oui ya, da mè tane tou guèl ko̱ ouime ourou an ndourou ya.

²⁶ Da on yé oui tissaon baï sanakè: Na son ka njo an nono, mome to̱ko̱ fèn an bong pou nali.

²⁷ Da kè ma sa: Mè sa hi oui, mè tane ga tou kong oui gui ka ba guèl hane dé; oui ourou an bèl moni, oui bon ko̱ ba njou ndingna fèn maï maï.

²⁸ Guèl ko̱ lénaléou da sona sél kli mana an ndourou, ouime ko̱ Abraham da Isaac da Jacob da prophèteli bon an bilkaou a Ouone, da abaï kli ma wou oui tèn kala.

²⁹ Da kli ma gui ka mboro tènassé da ka mboro rinassé da ka mboro nord da sud; da makaou bèl table an bilkaou a Ouone.

³⁰ Da mono, njoukouli ko̱ ba sèkèrèkèli ma féré tèn ba titilikèli, da njoukouli ko̱ ba titilikèli ma féré tèn ba sèkèrèkèli.

³¹ Ka l’heure o̱kèo̱ pharisien hanali mi gui, kli sa hi nè: Mo ourou guèl aïn da sé guèl aféké, baï ko̱ Hérode ji baï ina mo.

³² Da kè sa hi kli: Oui sé ka sa hi guè on: Ko̱, mè ni zabololi da haï mona njou‐jangmali kassénaï da yépélé, da name a saïkè mè nding fèn nili o̱tou.

³³ Da mono, mè ma sé mboro ni kassénaï da yépélé da péla féké; baï ko̱ prophète mbéo ma baï houl an guèl aféké ya, wara pou Jérusalem ya.

³⁴ Jérusalem, Jérusalem, mo ko̱ i prophèteli ka wou kli ka kone, kli on ko̱ Ouone mi pi kli guè mono, bo̱ko̱ ro̱ko̱ta mè ji ndoïna goune noli jing hana, mahana ka ma kaka ko̱ ndoï goune nèli an bo̱ko̱ bassane nè, da oui tane ji ya!

³⁵ Mono on, voul baï mi na bo̱on jing oui da mè sa hi oui: Yé oui ma ko̱ mi ya, bo̱l ko̱ ouime sa: Same kè on ko̱ mi gui ka ling a Nanjou!