Saint Jean 3 - Féké Testament 1947

¹ Da njoukouna mbéo an wora pharisienli ling‐è ba Nicodème, ko̱ ba zaworo a Juifli, makaou.

² Kè gui mona Jésus ka hangnachoung, ka sa hi nè: Rabbi, na toutou ko̱ mo ba njou‐to̱ko̱nafèn on ko̱ gui ka mona Ouone; baï ko̱ njoukouna tane ma baï ndingna fèn‐to̱ko̱nakè aïnli mahana ko̱ mome nding ya, wara ko̱ Ouone mi tane ti jing nè ya.

³ Jésus mi féré sa, ka sa hi nè: Babaï, babaï, mi mè sa hi mo, tokoré njoukou ko̱ mi tane ga tèn ba fékékè ya, kè ba ko̱na bilkaou a Ouone tane tiya.

⁴ Nicodème sa hi nè: Njoukou ma tèn ba aféké ka handé, afal ko̱ kème po̱ko̱ro̱ tou lé? Kè ma ri bila ma nè bo̱ko̱ séré da tèn ba aféké lé?

⁵ Jésus mi féré sa: Babaï, babaï, mi mè sa hi mo, tokoré njoukou ko̱ mi tane ga tèn ka mbi da Esprit ya, kè ba rina an bilkaou a Ouone tane tiya.

⁶ Kè ko̱ naïn‐mone mi mboung kè ba naïn‐mone, da kè ko̱ Esprit mi mboung kè ba esprit.

⁷ Laou‐o̱ mi sé siya ya, baï ko̱ mème sa hi mo: Yé oui tèn ba fékékè.

⁸ Koukouna mi kou sé guèl bon mahana ko̱ kème ji, da mo la ba tilikè, mo tane ga tou guèl hani mi ko̱ kè ourou, maléba guèl hani mi ko̱ kè sé rou ya. Mono mahana ka njoukouli on bon ko̱ Esprit mi mboung.

⁹ Nicodème mi féré sa, ka sa hi nè: Fèn aïn gui ka hane dé?

¹⁰ Jésus mi féré sa, ka sa hi nè: Mo ba njou‐to̱ko̱nafèn a Israël, da mo tane ga tou fèn aïnli ya lé?

¹¹ Babaï, babaï, mi mè sa hi mo, na to̱ko̱ toul fènli on ko̱ name toutou, da na sa bongbaï toul fènli on ko̱ name ko̱ tou, da oui tane ga la bongbaï na ya.

¹² Tokoré mème sa ba toul fènli an koukoula hi oui, da oui tane la bilaou ni ya, yé oui la bilaou ni, ko̱ tokoré mème sa hi oui toul fènli an nonkala ane mèlé?

¹³ Njoukouna mbéo tane ga hé sé nonkala ya, wara kè on ko̱ mi diri gui tiya ka nonkala ya, kè ba Goune a njoukou ko̱ kaou an nonkala.

¹⁴ Mahana ko̱ Moïse mi haka choï guè siya jinguèl an guèl woropa, mono, yé kli ma haka Goune a njoukou guè siya ndé mahana ka on kéng.

¹⁵ Da mono, njoukouna ko̱ mi la bilaou‐è mi jing yana kambèlè.

¹⁶ Baï ko̱ Ouone sé hang an njoukouli ta mi ko̱ kè hi pomboï Goune nè, njoukou ko̱ mi la bilaou‐è kè ma limna ya, yé kè jing yana kambèlè.

¹⁷ Baï Ouone tane ga pi Goune nè gui mona njou‐koukoulali baï wala baï hi njou‐koukoulali ya, da kème gui an njoukouli bon mi kou mbo̱l kè.

¹⁸ Njoukou on ko̱ mi la bilaou‐è walabaï nè tane tiya, da njoukou ko̱ mi tane ga la bilaou‐è ya, walabaï mi lé toulè tou, baï ko̱ kème tane ga la bilaou ling a pomboï Goune a Ouone ya.

¹⁹ Da walabaï aïn ba mini, ko̱ takanafèn mi gui mona njou‐koukoulali tou, da njoukouli mi sé hang yilime ta takanafèn, baï ko̱ pina kli mi bèlya.

²⁰ Baï njoukouli bon ko̱ mi kaou bo̱ko̱ békéfèn mi jèk takanafèn tou, kè tane tèn an takanafèn ya baï ngouna waou takana béké pina nèli bi kala;

²¹ da kè on ko̱ mi nding ka ba babaï mi tèn takanafèn, baï bina none pina nèli kala, baï ko̱ pina on ba a Ouone.

²² Afal fèn aïnli, Jésus da njou‐séna bong nèli mi do̱li sé guè guèl Judée; da kè pane jing kli an ndourou baï ndingna baptême.

²³ Jean mi ndé pane ndingna baptême kéng an Énon, diya Salim baï ko̱ mbi nyèta mana ndourou; njoukouli mi gui da kè nding baptême hi kli.

²⁴ Baï ko̱ Jean pane ga kaou jo̱bo̱ ya.

²⁵ Da njou‐séna bongli a Jean mi njaka jing Juif hanali baï toul dofèn toura a Juifli.

²⁶ Da klime gui mona Jean, ka sa hi nè: Rabbi, kè on ko̱ kaou jing mo an hélé mbi Jourdain, kè ko̱ mome sa bongbaï toulè jinguèl, mo ko̱, kè mini ko̱ nding baptême da njoukouli bon mi guè monè.

²⁷ Jean mi féré sa ka sa: Njoukou mbéo tane ma baï yana fèna ya, wara ko̱ nonkala mi tane ga hi nè hi nè ya.

²⁸ Oui fèn baï ba njou‐sana bongbaï nili toul baï on ko̱ mème sa hi oui jinguèl tou: Mè tane ti ba Christ ya, da kème pi mi ti dambèl hi nè.

²⁹ Kè ko̱ ya waïn nè tou, kè ba wa waïn; da bako̱la nè mi o baï lana baï nè, jangndaï nyèta baï lana mbo̱ko̱ baï a wa waïn on; mono, jangnandaï ni on mi mba.

³⁰ Amè, kè ma gui guèbambèl, da ami, mè ma yèmèrèn.

³¹ Kè on ko̱ mi diri gui tiya ka nonkala mi ko̱ ta afékéli bon;

³² Baï on ko̱ kème la da ko̱ tou, kè sa bongbaï on, da njoukouna mbéo tane ga la bongbaï nè ya.

³³ Kè on ko̱ mi la bongbaï nè tou, kè ji bo̱ko̱ baï on, ko̱ Ouone ba babaï;

³⁴ baï kè ko̱ Ouone mi pi nè, kè sa baïnjaka Ouone, baï ko̱ Ouone mi tane ga lé Esprit hi nè ya.

³⁵ Baba fènè mi sé hang a Goune on ta, da kème hi fènli bon bi ndo̱kè tou.

³⁶ Kè on ko̱ la bilaou a Goune on jing yana kambèlè; da kè ko̱ tane ga la bilaou a Goune on ya, kè ba ko̱na yana tane tiya, yé hèrè a Ouone pane toulè.