Romainli 3 - Féké Testament 1947

¹ Mono on, Juifli mi ta njoukou afékè ka mboro hane ndé? Maléba bèlafèn baï ina gassa an hane ndé?

² Mi nding bèlta mane mboro bon, ka titilikè Ouone mi hi baïnjakè bi ndo̱ko̱ kli.

³ Da mono, tokoré hanali mi tane ti jing tounassaon ya, ndingna ka ndouri akli mi nding lodok a Ouone gui bo̱on lé?

⁴ Tane ti on ya. Oui yèng ka ko̱ Ouone ba babaï, da njoukouli bon ba njou‐bana wo̱ko̱li, mahana ko̱ mi dé: An klime ko̱ mo ba guédék ka mboro baïnjako̱, Da ko̱ mome tèn gui guèl walabaï mo ma sa mba kli.

⁵ Da tokoré ndingna maï maï ama mi bi saon guédék a Ouone kala, yé na sa ba fèn lé? Ouone mi nding maï maï ko̱ kème gui jing hèrè lé? (Mè sa mahana ka mbora njoukouli.)

⁶ Tane ti on ya, maléba yé Ouone ma wal baï hi njou‐koukoulali ane dé?

⁷ Baï tokoré babaï a Ouone mi taïnkon nyèta ka hi jonafèn hi nè, ka mboro bana wo̱ko̱ ni, baïfèn da on mi pane walabaï hi mi mahana ko̱ mè ba njou‐békéfèn lé?

⁸ Da baïfèn da name nding békéfèn an bèlafèn mi tèn ya lé, mahana ko̱ hanali mi kèkè na ka sa ba na fèna mi sa on? Barabaï on ko̱ mi lé an toul kli ba guédék.

⁹ Fèn mèlé? Na bèlta kli lé? Haï, tane ti on ya, baï ko̱ name ti sa baï kon toula Juifli da Grecli jinguèl, ko̱ kli bon mi kaou bo̱ko̱ békéfèn.

¹⁰ Mahana ko̱ mi dé: Njoukouna mbéo mi tane ti guédék ya, Hana mbéo tiya:

¹¹ Njoukouna mbéo mi tane tou saonkè nguite ya, Njoukouna mbéo mi tane ga nza Ouone ya;

¹² Kli bon mi wol mborokè tou, da kli bon mi kaou poulame, Njou‐ndingna bèlafèn hana mbéo mi tane tiya; Hana mbéo tiya;

¹³ Mboro koung kli mi na mahana ka pal on ko̱ mi bourou; Kli mong fèn ka léme sél kli ta; Béré a choï mi na an bo̱ko̱ njaka kli;

¹⁴ Haou kli mi mba jing kèkènafèn tèn joungna baï;

¹⁵ Bo̱ko̱ kli mi ji baï ndana séme da;

¹⁶ Fén bonafèn da go̱ro̱ séta mana an mboro kli;

¹⁷ Kli tane ga tou mboro goro iki ya;

¹⁸ Kli tane ga ngou waou nona Ouone ya.

¹⁹ Da na toutou baïli on bon ko̱ guingna mi koung, mi koung hi kli on ko̱ kaou an bo̱ko̱ guingna, baï ko̱ njaka bon ma tou bi rou, da yé koukoula bon ma baï kaouna bo̱ko̱ walabaï a Ouone.

²⁰ Baï ko̱ ka mboro pina guingna tane ma baï ndingna naïn‐mone hana mbéo gui guédék an nonè ya, baï ka mboro guingna mi ko̱ none békéfèn wéré bi kala.

²¹ Da kassénaï none guédék a Ouone mi tèn kala ka babaï, ko̱ mi tane ti ka mboro guingna ya, ko̱ guingna da prophèteli mi sa bongbaï toul fèn aïn.

²² Mono guédék a Ouone ka mboro tounassaon a Jésus‐Christ, ba akli on bon ko̱ la bilaou. Sélkè mi tane tiya.

²³ Baï ko̱ njoukouli bon mi nding békéfèn da pènrèn jonafèn a Ouone;

²⁴ ko̱ mi nding kli gui guédék jing ndingna mbo̱l aïnli ka bavè, ka mboro chonakè on ko̱ mi na ka bila Christ‐Jésus.

²⁵ Kè on ko̱ Ouone mi same, ka hi nè ba sacrifice cho̱ko̱kè, ka mboro tounassaon ka séme nè, baï to̱ko̱na guédék nè baï ko̱na tang békéfènli pa, ka mboro pana mona Ouone.

²⁶ Da baï to̱ko̱na guédék nè ka saka naï, mono on, ko̱ kè ba guédék, da njou‐ndingna guédék, kli on ko̱ mi jing tounassaon a Jésus.

²⁷ Mono on jona mone an hane ndé? mi den tou. Ka mboro guingna ba fèn lé? Jing guingna ndingna pina lé? Haï, da jing ba guingna a tounassaon.

²⁸ Mono, na ko̱ko̱ ko̱ njoukou mi gui guédék mbo̱l tounassaon, da mi tane ti ka ba mboro ndingna pina guingna ya.

²⁹ Maléba Ouone, ba Ouone a Juifli ka ho̱ko̱ kli lé? Kè ba ndé Ouone a Gentili kéng ya lé? Ii, kè ba ndé Ouone a Gentili kéng, ko̱ Ouone ba mbéo bo̱l,

³⁰ da yé kè ma nding njou‐ina gassali gui guédék ka mboro tounassaon, da njou‐ina gassali ya ka mboro mbo̱l tounassaon.

³¹ Mono on, na ma aïli guingna ka mboro mbo̱l tounassaon lé? Tane ti on ya. Da name pou guingna bi.