Romainli 2 - Féké Testament 1947

¹ Mono baï on, mo ma paribaï jing rou pélé, o njoukou, mo on, ko̱ wal baï hi njoukou aféké, baï baï on ko̱ mome wal kon toula njoukou aféké, mo wal baï kon ba toulo̱ fèno, baï mo on ko̱ mi wal baï, mo ndé nding fèn on mabahana kéng.

² Da name toutou ko̱ walabaï a Ouone mi ba ka mboro babaï hi kli on ko̱ nding fèn aïnli.

³ Mo kèrè fal mono, o njoukou, mo on, ko̱ wal baï hi kli on ko̱ nding fèn aïnli, da mo fèno mi ndé nding fèn aïnli mabahana kéng, yé mo ma pènrèn walabaï a Ouone dé?

⁴ Maléba ko̱ mome pong nguèra bèla go̱rè da pana monè, da vonamboï nè, da mo tane ga toutou ko̱ bèla go̱ra Ouone mi ko̱ lang mo baï hèkèna békéfèn ya lé?

⁵ Da ka mboro name wang a go̱ro̱, ko̱ mi tane ji baï hèkèna békéfèn ya, mo mang ba hèrè kon toulo̱ fèno, ka name hèrè tèn name wéra none walabaï guédék a Ouone.

⁶ Yé kè ma féré cho̱ko̱kè hi njoukouli mane mbéo mbéo bon mabong ndingna fèn nèli.

⁷ Kè ma hi yana kambèlè hi kli on bon ko̱ laïbi ka nding bèlafèn, ka nza jonafèn da dikna da yana kambèlè on ko̱ ba poumna tane tiya;

⁸ da hi barabaï jing hèrè hi kli on ko̱ njaka ka pong babaï, da kli on ko̱ nding maï maï.

⁹ To̱ko̱nassé da go̱ro̱ séta na gui kon toul laou a njoukouli mane mbéo mbéo bon, ko̱ nding békéfèn, toul Juifli ka titilikè da ndé toul Grecli kéng!

¹⁰ Da jonafèn da dikna tèn go̱ro̱ iki hi njoukouli mane mbéo mbéo bon ko̱ nding bèlafèn hi Juifli ka titilikè da ndé hi Grecli kéng!

¹¹ Da ko̱ Ouone mi tane ga dik njoukouna ta hana ya.

¹² Baï ko̱ on bon ko̱ nding békéfèn tane guingna, yé kli ma limna tane guingna kéng, da kli on ko̱ nding békéfèn an bo̱ko̱ guingna, yé mi wal baï hi kli ka ba mboro guingna.

¹³ Baï ko̱ mi tane ti ba kli on ko̱ la guingna bo̱on, mi ko̱ gui guédék an nona Ouone ya, da ba kli on ko̱ bou fal bong guingna, yé kè ma ko̱ kli ba guédék.

¹⁴ Baï ko̱ Gentili on ko̱ mi tane ti jing guingna ya, klime kèrè ka laou kli ka nding bong njaka guingna, kli on ko̱ mi tane ti jing guingna ya, kli jing ba dodok guingna akli fèn kli ka bo̱ko̱di akli;

¹⁵ baï ko klime to̱ko̱ bong fèn ndingna a guingna on, ko̱ mi dé an go̱ro̱ kli tou, da laou‐tounafèn kli mi ndé sa bongbaï an bil go̱ro̱ kli kéng, da kèrafèn kli mi to̱ko̱ békéfèn kli hi kli, maléba mi paribaï kli jing hana.

¹⁶ Da baï aïnli ma tèn ka séssé o̱kèo̱ ko̱ Ouone mi wal baï kon toul ndingna fèn a njoukouli ka foli, mahana ka bong bèlabaï ni ka mbora Jésus‐Christ.

¹⁷ Da tokoré mome bi ling‐o̱ fèno ba Juif, da mome kaou an bil guingna, da jone mono ka bila Ouone,

¹⁸ da mome toutou kaouna mara fal toulè, da mo ma baï léna ka tou kakaïya fènli bèlta guèbambèl, baï ko̱ mome tou fèn ko̱ guingna mi to̱ko̱;

¹⁹ da mo on ko̱ go̱ro̱ mi na rou fèno ko̱ mo ba njou‐mira njou‐foukoura, da ba takanafèn a kli on ko̱ kaou an bil yilime,

²⁰ da ba njou‐to̱ko̱nafèn a njou‐ngawali, da njou‐to̱ko̱nafèn hi joï goundi, baï ko̱ ka bil guingna, mo jing ba fèn léna cho̱kna da a babaï.

²¹ Mono on, mo ko̱ to̱ko̱ fèn hi njoukou aféké, mo ndé to̱ko̱ hi mono fèno kéng ya lé? Mo ko̱ sa mboura hi njoukouna baï toul rinafèn ya, da mo fèno mi ri fèn lé?

²² Mo ko̱ sa mboura hi njoukouna baï ndingna maïn ya, da mo fèno mi nding maïn lé? Mo ko̱ pong fèn ndamli, da mo fèno mi ri fèn an bil templeli lé?

²³ Mo ko̱ jone mono ka bil guingna, mo ka mboro séla guingna mo bi chonron an nona Ouone dé?

²⁴ Baï ko̱ klime poukou ling a Ouone an wora Gentili baï toul baï, mahana ko̱ mi dé.

²⁵ Ina gassa hi bèlta, tokoré mome bou fal bong njaka guingna, da toko̱ré mome ba njou‐séla guingna, ina gassa no, mi tèn ba ina gassa ya.

²⁶ Mono on, tokoré njou‐ina gassa ya, mi bou fal do baïnjaka guingna, yé ina gassa amè ya, mi na mahana ka ba ina gassa ya lé?

²⁷ Da njou‐ina gassa ya ka bo̱ko̱di nè, tokoré kème bou fal bong njaka guingna bon, yé kè ma wal baï kon toulo̱ ya lé, mo on ko̱ mi jing takarata guingna, da baï ina gassa, da mome ko̱ ba njou‐séla guingna lé?

²⁸ Njoukou mi tane ga ti ba Juif ya, baï ko̱ klime ko̱ nè mahana ka Juif, da on mi tane ti ba ina gassa ya, ko̱ klime ko̱ an naïn‐mone.

²⁹ Da kè ba Juif ka babaï ko̱ ba Juif ka laou‐è, da ina gassa ba fèn a go̱ro̱ ka babaï ka bil laou, da tane ti ka ba mboro fèn déna ya. Da jona njoukou aïn tane ga gui ka mona njoukouli ya, da gui ka Ouone.