Romainli 16 - Féké Testament 1947

¹ Mè sa bèla bongbaï toula njo‐waïn fèna, ko̱ ling‐è ba Phoebé, hi oui, kè on ko̱ ba ndé waïn bakara a église an pou Cenchrées kéng.

² Baï an ouime pame nè ka bila Nanjou, mahana ko̱ kè mabong an njou‐lana‐bilaouli, da oui lé mbèlè jing fèn mone nèli on ko̱ mi nak na, baï ko̱ kè fènè mi ndé lé mbèla njou‐afékéli nyèta, da tèn mè kéng.

³ Oui name Prisca da Aquilas, ndo̱ko̱ba ndingna bakara nili ka bila Christ‐Jésus,

⁴ baï ko̱ klime yèng mone kli bou houl baï kouna yana ni. Da tane ga ti ba mè ka ho̱ko̱ ni on mi ko̱ kaou koukoula hi kli ya, da tèn égliseli bon a Gentili kéng.

⁵ Oui name église ko̱ mi na an bil voul kli kéng, oui name Épaïnète kè on ko̱ mème sé hang‐è ta, kè ba titili lénakè baï a Christ an guèl Asie.

⁶ Oui name Marie ko̱ mi nding bakara nyèta baï toul baï.

⁷ Oui name Andronicus da Junias, yine nili, da njou‐ndo̱ko̱ba voul jo̱bo̱ nili, kli on ko̱ ba loukou njoukouli an wora njou‐mboro‐pinali, da kli on ko̱ na an bila Christ ti dambèl hi mi.

⁸ Oui name Amplias kè on ko̱ mème sé hang‐è ta ka bila Nanjou.

⁹ Oui name Urbain ndo̱ko̱ba bakara na ka bila Christ, da Stachys, kè on ko̱ mème sé hang‐è ta.

¹⁰ Oui name Apellès kè on ko̱ mi mabongkè an bila Christ. Oui name kli on an bil voula Aristobule.

¹¹ Oui name Hérodion yine ni, oui name kli on an bil voula Narcisse, kli on ko̱ mi kaou ka bila Nanjou.

¹² Oui name Tryphène da Tryphose, kli on ko̱ mi nding bakara ka bila Nanjou. Oui name Perside kè on ko̱ klime sé hang‐è ta, ko̱ kème nding bakara nyèta ka bila Nanjou.

¹³ Oui name Rufus kè on ko̱ Ouone mi sane nè ka bila Nanjou tèn ma nè ko̱ ba ma ni kéng,

¹⁴ Oui name Asyncrite, Phlégon, Hermès, Patrobas, Hermas tèn yindi on ko̱ mi kaou jing kli.

¹⁵ Oui name Philologue da Julie, Nérée, tèn njo‐waïn fènè, da Olympe da njou‐lana‐bilaouli bon on ko̱ kaou jing kli.

¹⁶ Oui name hana ka oula soukou hana ko̱ ba tangna fofoto. Égliseli a Christ bon mi name oui.

¹⁷ Mè sa jo̱jo̱ baï yindi, oui ènrèn mbora kli on, ko̱ mi nding fèn wala hana an zéng baï, da bou fèn bèna baï pongna to̱ko̱nafèn on ko̱ ouime lala jinguèl. Oui pong kli.

¹⁸ Baï ko̱ njoukouli mahana ka on mi tane ga nding bakara hi Christ Nanjou na ya, da an bil kli fèn kli, kli mong laou a njoukouli on ko̱ mi kaou ka rongo jing bèla njaka bong baï kli.

¹⁹ Baï ko̱ tiri lana baï abaï mi ti ri souka njoukouli bon. Mono on, mè jangndaï baï toul baï, da mè ji an ouime kaou ka cho̱kna baï tounafèn on ko̱ mi bèlta da bou rongo jing fèn on, ko̱ mi tane ga bèlya.

²⁰ Da koukoulion yé Ouone go̱ro̱ iki mi nda Satan ka bil bo̱ko̱ baï. An ndingna mbo̱l a Nanjou na Jésus‐Christ mi na jing oui.

²¹ Timothée ndo̱ko̱ba bakara ni mi name oui da Lucius da Jason, tèn Sosipater, yine nili name oui.

²² Mè Tertius ko̱ mi dé takarata aïn, mè ndé name oui kéng ka bila Nanjou.

²³ Gaïus njou‐pèngna mi tèn njoukouli bon an bil église mi name oui. Éraste ko̱ mi pèng mbo̱ri an loukou pou aïn tèn yine Quartus kéng, klime name oui.

²⁴ An ndingna mbo̱l a Nanjou na Jésus‐Christ mi na jing oui bon! Amen!

²⁵ Da an kè on ko̱ njèrèn baï pouna mone baï ka mbora bèlabaï ni, ka mboro sana mboura a Jésus‐Christ mabong baï on ko̱ mi wéré nonkè bi kala, didissi baï on ko̱ mi mou ka foli jinguèl ka titilikè ambèl hi name mossona koukoula.

²⁶ Da kassénaï mi tèn kala an bil Takarata a Ouone a prophèteli mahana ka bina baïnjaka Ouone kambèlè, da mi to̱ko̱ hi mèran pime pouli bon baï an klime la ka bong tounassaon.

²⁷ Mi hi jonafèn hi ba Ouone ka ho̱kè, ko̱ mi cho̱kta, ka mbora Jésus‐Christ kambèlè! Amen!