Romainli 14 - Féké Testament 1947

¹ Da oui pame kè on ko̱ mi tane ti njèrèn jing tounassaon ya, da tane ti ba baï ouina nè jing njakana ya.

² Njoukou mbéo mi jing tounassaon baï sona fènli bon; da njoukou on ko̱ mi tane ga ti njèrèn ya, kè son ba ngoï haï ka ho̱kè bo̱l.

³ Da an kè on ko̱ mi son fènli bon, mi tane aïli kè on ko̱ mi son laka ya, da an kè on ko̱ mi tane son fènli bon ya, mi tane wal baï kon toula kè on, ko̱ mi son fènli bon, baï ko̱ Ouone mi pame nè tou.

⁴ Mo ba guè baï wala baï kon toula njou‐bakara a njoukou aféké lé? Tokoré kème o siya, maléba kème lé, on ba baï a nanjou nè. Ka babaï yé kè ma o siya, baï ko̱ Nanjou mi jing njèran baï bana nè bi.

⁵ Njoukou mbéo mi wal baï ko̱ name mbéo mi bèlta toul name aféké; da jing njoukou aféké kè wal baï ko̱ name bon mi bèl mabahana. Dadaon an njoukouli mane mbéo mbéo bon, go̱ro̱ kli mi iki mahana ko̱ klime bi laou kli rou.

⁶ Njoukou on ko̱ mi pèng name kème pèng baï toula Nanjou, da kè on ko̱ mi son laka, kème son baï toula Nanjou, baï ko̱ kème kaou koukoula hi Ouone. Da kè on ko̱ mi chang laka, kème chang baï toula Nanjou, da kème ndé kaou koukoula hi Ouone kéng.

⁷ Baï ko̱ njoukouna mbéo an woro na mi tane yan ba baï nè fènè ya, da njoukouna mbéo mi tane hou ba baï nè fènè ya.

⁸ Baï tokoré name yan, name yan ba baï a Nanjou; maléba tokoré name hou name hou ba baï a Nanjou. Baï on, tokoré name yan, maléba name hou, na ba a Nanjou.

⁹ Baï on ko̱ Christ mi hou ka tome jing yana, baï an kème ma baï tèna Nanjou a houli tèn akli on ko̱ mi yan.

¹⁰ Da amo, baïfèn da mome wal baï kon toula yine no lé? maléba amo, baïfèn da mome aïli yine no lé? baï ko̱ yé na bon ma o njaka bara walabaï a Ouone.

¹¹ Baï ko̱ mi dé: Mahana ko̱ mème yan Nanjou mi sa on, Yé njaka toukou mane mbéo mbéo bon ma houkou an mbèli. Da yé léme sél mane mbéo mbéo bon ma jone Ouone.

¹² Mono yé na mane mbéo mbéo bon ma foul fal mona fèna hi Ouone.

¹³ Mono on, an name wal baï kon toul hana ba aféké ya; dadaon an ouime wal baï kon ba toul fèn aïn mbéo bo̱l, an njoukouna mi tane bou fèn bèna an domboro hi yine nè ya, maléba fèn fana an kème lé.

¹⁴ Mè toutou da on mi kara mi ka bila Nanjou Jésus, ko̱ fèna mbéo mi tane ti ba fèn dakame ka kli‐monè ya, wara kè on ko̱ mi ko̱ ba fèn dakame, da on ba fèn dakame jing ba kè ho̱kè.

¹⁵ Da tokoré go̱ra yine no mi sé nè baï toul laka hana, mo tane ga sé ka mboro sénahang ba aféké ya. Mo bo njoukou on, ka mboro laka no ya, kè on ko̱ Christ mi hou baï nè tou.

¹⁶ Mono on, mo yèng an njoukouna mi poukou bélafèn no ya.

¹⁷ Baï ko̱ bilkaou a Ouone mi tane ti ba fèn sona tèn fèn njona ya, da ba ndingna guédék da go̱ro̱ iki, da jangnandaï ka bila Saint‐Esprit.

¹⁸ Baï kè on ko̱ mi kaou koï a Christ, kème mapélékè jing Ouone, da kème mabongkè an nona njoukouli.

¹⁹ Mono, dadaon an name sé ba fal fèn on ko̱ mi hi go̱ro̱ iki, da fèn on ko̱ ma pou mona jing hana.

²⁰ Mo tane moungnourou pina a Ouone bi baï toul fèn sona ya. Ka babaï fènli bon mi tangta, da mi bèlya jing ba njoukou on ko̱ mi son ko̱ ba fèn bèna jing njoukou aféké.

²¹ On mi bèlta baï sona naïn maléba njona vin ya, maléba ndingna fèna ko̱ ba fèn bèna jing yine no, maléba kème lé.

²² Mo pèng tounassaon no baï no fèno an nona Ouone, Jangnandaï mi ba baï a kè on ko̱ mi tane ga wal baï kon toulè fènè ya, jing fèn on ko̱ kème ko̱ mabongkè tou.

²³ Da kè on ko̱ mi kaou ka ndouri kème kon barabaï kon toulè fènè ko̱ kème son laka, baï ko̱ kème tane ga son ka tounassaon ya. Da fènli on bon ko̱ mi tane ga gui ka tounassaon ya ba békéfèn.