Romainli 13 - Féké Testament 1947

¹ Dadaon laouli bon mi kaou bo̱ko̱ ndo̱ka gangna pouli; baï ko̱ bina baïnjaka hana mbéo mi tane na bo̱on ya, wara ko̱ mi gui ka Ouone ya, da ba Ouone mi ko̱ bi gangna pouli on da klime na gangna.

² Baï on, njoukouna ko̱ mi pong njèran on, kè pong do baï a Ouone ko̱ bi, da kli on ko̱ pong, yé kli ma ko̱ko̱ barabaï fèn kli kon toul kli.

³ Baï ko̱ gangna pouli mi tane hi waou baï bèla pina ya, da klime hi waou ba baï toul béké pina. Da mo tane ga ji baï ngouna waou an njèran on ko̱ mi o toulo̱ ya lé? Mo nding fèn bèlta, da yé kè ma jone mo.

⁴ Baï ko̱ gangna pou ba njou‐bakara Ouone ka mboro baï hina bèlta hi mo. Da toko̱ré mome nding fèn bèlya mo ngou waou; baï ko̱ kème tane lou loukou gamba bo̱on ya, baï ko̱ kè ba njou‐bakara Ouone, da njou‐féra gnana ka kon barabaï toula njoukou on, ko̱ mi nding bèlya.

⁵ Dadaon oui kaou bo̱ko̱ ndo̱kè, tane ti ba baï ngouna waou barabaï ka ho̱kè ya, da ba baï ndé tènrèn nonkè ka laou‐tounafèn kéng.

⁶ Baï on, oui ndé hi l’impôt kéng. Baï ko̱ gangna pouli ba njou‐bakara a Ouone baï laïnabi ndingna bong fèn on.

⁷ Oui hi fèn kli hi kli bon, oui hi l’impôt hi kli on ko̱ mi mang l’impôt, oui hi douane hi kli on ko̱ mi oui baï douane, dadaon oui ngou waou nona kli on ko̱ ma an ouime ngou waou kli, dadaon, oui dik kli on ko̱ ma an ouime dik kli.

⁸ An ouime tane bi ko̱da bi toul baï ya, da bo̱l ba sénahang hana, baï kè on ko̱ mi sé hang a njoukou afékéli, kème bou fal bong guingna bon tou.

⁹ Bong njaka guingna mini: Mo nding maïn ya, mo i njoukou ya, mo ri fèn ya, mo fan hang ya, da tokoré bina baïnjaka guingna aféké mana, saonkè mi na an bil baïnjaka aïn: Dadaon mo sé hang ba no mahana ka mono fèno.

¹⁰ Sénahang mi tane ga nding bèlya jing ba nè ya, mono sénahang ba bouna fal bong guingna bon.

¹¹ Da oui nding fèn on baï an ouime tou namkè, baï ko̱ kassénaï séssé mi mabongkè tou an ouime tome name. Baï ko̱ kassénaï yana‐baï‐toul ama mi gui diya ta name on ka titilikè jinguèl ko̱ name la bilaou.

¹² Hangnachoung mi hèdi baï tana tou, da séssé mi nding baï tèna. Mono, dadaon an name njomo pina yilime ka bou fèn béré a takanafèn.

¹³ An name sé ka mbonatoul an nona ro̱kè ka séssé tane ndingna fèn ka ndo̱l ya, tane houl houl vone ya, tane nzala ndingna békéfèn ya, tane ndingna maïn ya, tana njakana ya, maléba tane fanahang ya.

¹⁴ Da oui bou Nanjou Jésus‐Christ, da oui tane pame naïn‐mone, baï bouna fal nzalakè ya.