Romainli 10 - Féké Testament 1947

¹ Yindi, fèn on ko̱ na hang ni da mè sa jo̱jo̱ a Ouone baï toul kli, baï an klime kou.

² Baï ko̱ mème sa bongbaï akli ko̱ none kli mi sènta baï toula Ouone, da tane ti ka mboro tounafèn ya.

³ Baï ko̱ klime tane ga tou mboro guédék a Ouone ya, da klime nza mboro baï mossona dodok guédék akli, kli tane ga kaou mara fal toul mboro guédék a Ouone ya.

⁴ Baï ko̱ Christ ba sèkèrè guingna, baï hina guédék hi njoukouli bon on ko̱ mi la bilaou.

⁵ Baï ko̱ Moïse mi dé takarata: Njoukou on ko̱ mi nding guédék ka mboro guingna, yé kè ma yan ka mboro on.

⁶ Da ko̱ guédék ka mboro tounassaon mi sa on: Mo kèrè ka laou‐o̱ ya: Yé guème ma sé guè nonkala lé? on mi sa ba bina Christ ka diri nè guè tiya.

⁷ Maléba yé guème ma diri an bil loukou lo̱ko̱ yilime lé? on mi sa ba bina Christ an wora houli.

⁸ Da takarata mi sa ba fèn lé? Baïnjaka on ko̱ na diya jing mo, an bil njako̱, da ndé an bil go̱ro̱ kéng, on mi sa ba baïnjaka tounassaon on, ko̱ name sa mboura.

⁹ Baï ko̱ tokoré mome sa bi kala ka njako̱, ko̱ Jésus ba Nanjou, da tokoré mome la bilaou ka go̱ro̱ ko̱ Ouone mi tome nè an wora houli, yé mo ma kou.

¹⁰ Baï njoukou on ko̱ mi tou saon ka laou‐è mi kan guédék, da ka sana bi kala ka njaka mi ko̱ njoukou jing yana‐baï‐toul. Baï ko̱ Takarata a Ouone mi sa:

¹¹ Njoukou on ko̱ mi la bilaou‐è chonron ba séna nè tane tiya.

¹² Baï Juif da Grec, sélkè tane tiya, baï ko̱ Nanjou akli bon ba mbéo bo̱l, da kème nguèrè ta baï akli on bon ko̱ mi di ling‐è.

¹³ Baï njoukou on ko̱ mi di ling a Nanjou yé kè ma kou.

¹⁴ Da ka mboro hani ko̱ klime ma baï dina ling‐è on ko̱ klime tane ga la bilaou‐è ya lé? Da ka mboro hani ko̱ klime ma baï lana bilaou an kè on ko̱ klime tane ga la baï nè ya lé? Da ka mboro hani ko̱ klime ma baï lana ko̱ njou‐sana mboura hi kli tane tiya lé?

¹⁵ Da tokoré mi tane ga pi kli ya, kli ma baï sana mboura ane mèlé? Mahana ko̱ mi dé: Bo̱ko̱ kli mi bèl maïya, Kli on ko̱ sa mboura toul bèlabaï ikina go̱ro̱, Kli on ko̱ sa mboura toul bèlabaï!

¹⁶ Da kli bon mi tane ga la bèlabaï bi go̱ro̱ kli ya. Baï ko̱ Ésaïe mi sa: Nanjou, Guème ko̱ la sanamboura na lé?

¹⁷ Mono, tounassaon mi gui ka mboro lanabaï, da lanabaï mi gui ka mboro baïnjaka a Christ.

¹⁸ Da mè sa: Klime lala tou ya lé? Kli lala ka babaï! Tiribaï kli mi ti ka sèrè mane toul koukoula bon, Da baïnjaka kli mi sé bo̱l tèn guè mona sèkèrè njou‐koukoulali bon.

¹⁹ Da mè sa: Israël mi tane ga tou ya lé? Da Moïse mi sa: Ka titilikè yé mè ma zara oui an ouime passèra jing kli on, ko̱ pime pou kli mi tane tiya, da yé mè ma gna oui, an hèrè mi ba oui jing pime pou on, ko̱ mi tèn ngawa.

²⁰ Da Ésaïe mi sa ndo̱t, ka sa: Kli on ko̱ mi tane ga nza mi ya, mi jing mi tou, Da kli on ko̱ mi tane ga oui baï ni ya, mè tèn an none kli.

²¹ Da kème sa baï an voula Israël on: Mè ndara ndo̱ko̱ ni guèbassoko hi njoukouli on ko̱ mi kaou bang, Da njou‐fana baïli.