Philippienli 2 - Féké Testament 1947

¹ Mono on, tokoré baï wara hana mana ka bila Christ, tokoré baï pouna mone hana mi mana jing sénahang, tokoré vona ka go̱ro̱ mbéo jing Esprit mana, tokoré ndingna haïo da ko̱na passé mana,

² oui bi hang baï toul baï mbéo bo̱l jing hana, mbé sénahang, ka laou mabahana, mbé laou kèrafèn, mono on, oui hi jangnandaï ko̱ mba hi mi.

³ Oui tane nding fèna mbéo ka mboro nzana baï ya, maléba joungna mone ya, da ka laou baï kaouna lome oui bon mi kèrè ka laou baï ba yine aféké mi ko̱ ta toul baï.

⁴ Da oui mbéo mbéo bon mi nza ba mboro dodok fèn abaï ya, da oui mbéo mbéo bon mi ndé nza fèn baï toula njoukou aféké kéng.

⁵ An laou‐kèrafèn on mi bi an bil baï ko̱ mi ndé bi an bila Christ‐Jésus jinguèl.

⁶ Kè on ko̱ mi kaou mahana ka mona Ouone fènè jinguèl, an nonè kè ko̱ kaouna mahana ka Ouone tane ti ba fèn chingna ya.

⁷ Da kème yèng jonafèn nè fènè bou, ka ya mone koï da tèn mahana ka kli‐mona njoukouli.

⁸ Da baï ko̱ kème ya kli‐mona njoukou, kè bou monè fènè guè koukoula ka la baï bo̱l tèn houl, da houl on an di croix.

⁹ Da mono baï on kéng, Ouone mi hi ling‐è ti nyèta, da bi ling‐è ta toul ling afékéli bon.

¹⁰ Da baï ka ling a Jésus yé njaka toukou mane mbéo mbéo bon mi ma baï houkouna an koukoula, tongna an nonkala da tongna an koukoula, maléba tongna an bo̱ko̱ koukoula bon,

¹¹ da yé léme sél mane mbéo mbéo bon ma sa bi kala ko̱ Jésus‐Christ ba Nanjou ka hi jonafèn hi Ouone Baba fènè.

¹² Mono, baï on yindi, ko̱ mème sé hang baï ta, mahana ko̱ oui ba mbéré njoukouli guèbassoko, ti ba baï noni ka ho̱kè ya, da kassénaï mi ta guèbambèl ko̱ mème tane ti jing oui ya, oui nding dodok yana‐baï‐toul abaï bi kala ka ngouna waou jing to̱na mone,

¹³ baï ko̱ ba Ouone mi ko̱ nding an bil baï, an ouime ji bo̱ko̱kè da nding fèn on, ko̱ mi na hang‐è bèlta.

¹⁴ Oui nding fènli bon tane gnonranfèn da tane njakana.

¹⁵ Mono on, an ouime ma baï kaouna ka rongo ka nding pan bil, ko̱ ba goundi a Ouone guédék, an wora mèrèn njoukouli ko̱ mi sé maï maï, da laou kli mi na bang, da oui cha an wora kli an koukoula aïn mahana ka mèssè,

¹⁶ oui ko̱ ndara baïnjaka yana bi kala; mono on an mème jing fèn jangnandaï, ka name a Christ, baï ko̱ mème tane ga ngou jinguèl bo̱on da tane ga nding pina bo̱on ya.

¹⁷ Da tokoré mi si mi kon mahana ka offrande, fèn njona an toul sacrifice da ndingna bakara tounassaon abaï, mè kaou ka jangnandaï da ndé wal jing oui kéng.

¹⁸ Da mono on oui ndé jangndaï kéng da ndé wal mabahana jing mi kéng.

¹⁹ Da mè oli ka bila Nanjou Jésus baï pina Timothée guè mone baï koukoulion an mème la baï abaï da, ka bi hang ni guè tiya bèlta kéng.

²⁰ Baï ko̱ njoukou aféké ko̱ kèrè mahana ka mè, ko̱ bi hang‐è baï pèngna oui mi tane ti guèl aïn jing mi ya.

²¹ Baï ko̱ kli bon mi nza ba mboro dodok fèn aklili, da tane ga nza mboro fèn a Jésus‐Christ ya.

²² Da oui toutou léna nè mono, baï ko̱ kème chome bo̱ko̱ pina bèlabaï jing mi mahana ka goune ko̱ mi lé mbèla baba nè.

²³ Mono on, mè oli baï pina nè guè mone baï koukoulion, afal on ko̱ mème tou fèn on ko̱ klime guè ndingnakè jing mi da.

²⁴ Da go̱ro̱ ni mi vo ka bila Nanjou ko̱ yé mè fèni ma ndé guè mone baï kéng koukoulion.

²⁵ Da mème ko̱ bèlta baï pina Épaphrodite guè mone baï ti dambèl, yine ni da njou‐ndo̱ko̱ba bakara ni da njou‐ndo̱ko̱ba béré ni, da njou‐mboro pina abaï tèn njou‐bakara hi mi.

²⁶ Baï ko̱ kème bi hang‐è toul baï baï ko̱na oui bon, da monè mi hou mbi baï ko̱ oui mi lala ko̱ kème na jangma.

²⁷ Da ka babaï, kème na jangma ka hèdi houl; da ba Ouone mi nding haïo hi nè, da ti ba kè ka ho̱kè ya, da tèn mè kéng, baï ko̱ yé go̱ro̱ ni mi sé mi ta guèbambèl ya.

²⁸ Mono baï on, mè pi nè koukoulion guè mone baï, baï an ouime ko̱ nè ba aféké ka jangnandaï, da go̱ro̱ ni ma vo païn.

²⁹ Mono on, oui pame nè ka bila Nanjou ka jangnandaï, da dik njoukouli bon ko̱ mahana ka aïn.

³⁰ Baï ko̱ ba baï toul pina a Christ mi ko̱ kème hèdi houl, ka yèng monè bou houl, baï ndingna bakara on hi mi, ko̱ oui mi pènrèn baï ndingnakè hi mi.