TAKARATA A JACQUES KO̱ DÉ 5 - Féké Testament 1947

¹ Abaï kassénaï oui njou‐nguèrali! oui lé léou ka wan njaka, baï toul fèn bèlya abaï, on ko̱ mi nding baï léna toul baï.

² Fèn nguèra abaïli mi poume tou, da sènssènèli mi son la abaïli.

³ L’or abaï tèn l’argent abaï mi laka; da yé lakana akli on ma sa bongbaï kon toul baï, da ma son naïn‐mone baïli mahana ka hèlè. Oui mang fèn nguèra abaïli ka ba sèkèrè namli tou.

⁴ Mono toul ndo̱ka njou‐bakarali on ko̱ mi lourou fèn paï an waka baï, ko̱ ouime dèn ka riya, mi wan njaka guè siya, da wananjaka akli on ko̱ mi lourou fèn paï mi ri souka Nanjou a wilkèli.

⁵ Oui kaou an koukoula baï ndingna ba fèn gangnali, da baï ndingna ba fènli ko̱ na laou baï, da go̱ro̱ baï mi mba jing bèla fènli nyèta, ka name koungna sola njoukou.

⁶ Oui kon barabaï o̱tou, oui i njou‐guédék tou, da kème tane pong oui ya.

⁷ Mono on yindi, oui kaou ka pana mone, bo̱l tèn name guina an Nanjou. Oui ko̱ njou‐ko̱ra waka ko̱ mi voro bèla lénakè an koukoula, kème voro ka pana mone bo̱l tèn ko̱ kème jing to̱na titili mbame, tèn mbame an sèkèrèkè da.

⁸ Oui ndé kaou ka pana mone kéng, oui ndik laou baï pou, baï ko̱ guina a Nanjou mi hèdi tou.

⁹ Yindi, oui tane gnonronfèn jing hana ya, baï an barabaï mi tane lé toul baï ya; oui ko̱ njou‐walabaï mi o njaka mboro.

¹⁰ Yindi, oui ya prophèteli on ko̱ mi sa baï ka bil ling a Nanjou jinguèl, mahana ka ba mèrèn to̱ko̱nassé jing pana mone.

¹¹ Mono, ko̱ name sa jangnandaï akli on ko̱ mi laïbi jing noungna sél. Oui lala baï toul laïnabi jing noungna sél a Job, da oui ko̱ ko̱, ko̱ ka sèkèrèkè Nanjou mi lé mbèlè, baï ko̱ Nanjou mi mba jing ndingna haïo tèn ko̱na sé.

¹² Da baï on ko̱ mi ta toul baïli bon, yine nili dadaon an ouime tane han fèn ka ling a nonkala, maléba ling a koukoula ya, maléba oui tane han fèn afékéli ka toul ya kéng. Dadaon an ii abaï mi na ba ii, tèn an haï abaï mi na ba haï. Mono on an barabaï mi tane lé toul baï ya.

¹³ Njoukouna an woro baï mi to̱ko̱ssé lé? Dadaon an kème hiou Ouone. Njoukouna mi jangndaï lé? Dadaon an kème di sing ka jone Ouone.

¹⁴ Njoukouna an woro baï mi na jangma lé? Dadaon an kème di tangchidoli a église, da an klime hiou Ouone kon toulè, ka bi nome toulè ka bil ling a Nanjou;

¹⁵ da hiouna Ouone ka tounassaon ma kou njou‐jangma on, da Nanjou ma ko̱ko̱ nè bi siya; da tokoré kème nding békéfènli, yé kè ma yèng bi mboro békéfèn nèli.

¹⁶ Mono on, oui hèkè békéfèn abaïli bi kala jing hana, ka hiou Ouone baï toul hana, baï an mone baï mi haï. Sana jo̱jo̱ Ouone ka laou a njou‐guédék mi bassa ta ka pina nè.

¹⁷ Élie ba mbé njoukou ka mbé bo̱ko̱di nè mahana ka na; da kème hiou Ouone bassa ta baï an mbame mi tane to̱ ya, da mbame mi tane to̱ an koukoula ya, mane saka saï ka féou difala‐mbéo.

¹⁸ Da kème kaïn hiou Ouone ba aféké da nonkala mi hi mbame, da koukoula mi lé lénakè.

¹⁹ Yine nili, tokoré njoukouna an woro baï mi wol mboro babaï, da njoukouna mi kaïn lang nè féré fal,

²⁰ an kème tou njoukou on ko̱ mi ki go̱ra njou‐békéfèn baï féra fal an béké mboro nè, njoukou on mi kou laou mbéo an bil houl, da kè ma goukou toul békéfènli bi nyè maïya.