TAKARATA A JACQUES KO̱ DÉ 4 - Féké Testament 1947

¹ Béré tèn wana hana mi gui ka hani an woro baï lé? Mi tane gui ka ba guèl on ya, jing nzala abaï ko̱ mi rou béré an bil fèn mone baïli ya lé?

² Oui bi hang baï toul fèn da ouime tane ga ti jing rou ya; oui i njoukou, ka fan hang, da oui tane ma baï jingna fèn ya; oui wan hana ka rou béré, da oui tane ga ti jing fèn ya, baï ko̱ ouime tane ga oui ya.

³ Oui oui, da tane ga ya ya, baï ko̱ ouime tane ga oui ka ba mborokè ya, da oui ji ba baï sona on ka ba nzala abaï.

⁴ Oui njou‐maïnli tèn waïn‐maïnli oui tane ga tou ya, ko̱ séna hang bilkaou koukoula aïn ba pongna Ouone ya lé? Mono on njoukou on ko̱ mi ji bana bako̱la jing bilkaou koukoula aïn, kè fènè ba bakèo̱ jing Ouone.

⁵ Maléba ouime kèrè ba Takarata a Ouone mi sa baï bo̱on lé? Esprit on ko̱ kème hi bi bila mi bi hang‐è baï fana hang lé?

⁶ Da kème hi ndingna mbo̱l guèbambèl, baï on ko̱ Takarata a Ouone mi sa: Ouone mi pong njou‐gnaïna, Ka hi ndingna mbo̱l hi njoukouli on ko̱ bou mone kli guè koukoula.

⁷ Mono on oui kaou bo̱ko̱ ndo̱ka Ouone; ka pong zabolo, da kè ma ngou dita jing oui.

⁸ Oui dong guè bèl mona Ouone, da yé kè ma dong gui bèl mone baï. Oui tourou ndo̱ko̱ baï, oui njou‐békéfènli, oui tourou go̱ro̱ baï tang, oui njou‐laou séré séréli.

⁹ Oui tou go̱ro̱ séta kaouna a baï; da lé léou ka mbiléou; an sanafèn abaï mi féré tèn léou, da an jangnandaï abaï mi féré tèn go̱ro̱ séta.

¹⁰ Oui bou mone baï guè koukoula an nona Nanjou, da kè ma bi oui guè siya.

¹¹ Yindi, oui tane sa bèlya kon toul hana ya. Njoukou on ko̱ mi sa bèlya kon toula yine hana, maléba kème wal baï kon toula yine nè kème sa bèlya kon ba toul guingna, ka wal baï hi ba guingna. Da tokoré mome wal baï kon toul guingna, mo tane ti ba njou‐pèngna fèn on ko̱ guingna mi koung ya, da mo ba njou‐walabaï.

¹² Njoukou mbéo bo̱l ko̱ ba njou‐koungna guingna tèn njou‐walabaï, da ba kè on ko̱ ma baï kouna fèn tèn ina fèn, da amo, mo ba guè da wal baï kon toula njoukou on ko̱ mi kaou bèl mono lé?

¹³ Da abaï kassénaï oui sa ba: Kassénaï maléba yépélé yé na ma sé guè bil pou on, da kaou guè ndourou ma saka mbéo, ka ma jé da jo̱l fèn, da jing fèn!

¹⁴ Oui on ko̱ mi tane ga tou fèn ko̱ ma tèn ka yépélé ya! yana abaï ba fèn lé? Baï ko̱ oui mabahana jing goune gourifèn on ko̱ mi tèn bongkè diya bo̱l, da afal païn on mi fan.

¹⁵ Da dadaon, an ouime sa mahana ka on ba: Tokoré Nanjou mi ji bo̱ko̱kè da name yan, da yé na ma nding fèn aïn maléba fèn on.

¹⁶ Da kassénaï oui jangndaï jing kèrafèn ndo̱ïna abaï. Jangnandaï on bon ba békéfèn.

¹⁷ Mono njoukou on ko̱ mi toutou baï ndingna bèlafèn da tane ga nding ya, on ba békéfèn nè.