TAKARATA A JACQUES KO̱ DÉ 3 - Féké Testament 1947

¹ Yine nili, tane ma an njoukouli nyèta an woro baï mi tèn ba njou‐to̱ko̱nafènli ya, baï ko̱ oui toutou yé na ma jing barabaï nyè maïya ta on.

² Baï ko̱ na bon mi bèn jing fènli nyèta. Tokoré njoukouna mi tane bèn ka loï jing baïnjakè ya, kè ba njou‐guédék ka ndé ma baï nanliya kli‐monè bon, kéng.

³ Da tokoré name bi réme an njaka yangali baï an klime la na, na ndé miri kli‐mone kli bon kéng.

⁴ Mono on tèn bateauli kéng, tongna on ko̱ kli ba loukoukèli da koukouna mingta mi fan kli, da goune lélé fèn kina bateau mi ki kli, an guèl on ko̱ go̱ra njou‐kina bateau mi ji.

⁵ Mono mahana ka léme sél ko̱ ba goune lélé fèn mone, da kème jone monè nyèta. Oui ko̱ goune lélé hèlè mi ma baï pèna loukou woropa.

⁶ Da léme sél kéng ba hèlè, ko̱ ba bilkaou a békéfèn. Léme sél mi na on an wora fèn mone nali ka hi kli‐mona bon tèn ba dakame, da bou hèlè an mboro yana aïn, da guèl hèlè a zabolo mi bou hèlè an bil léme sél on.

⁷ Da mèran njoukouli mi ma baï panran mèran naïnli bon, tèn ndo̱ïli, da fènli on ko̱ koro tèn naïn mbili, da njoukouli mi panran kli tou,

⁸ da an léme sél, njoukou mbéo mi tane ma baï panran nè ya; on ba békéfèn ko̱ njoukou mi tane ma baï dèna bi ya; ka mba jing béké béré ina njoukouli.

⁹ Ko̱ jing rou name same Nanjou tèn Baba na, da jing rou name ndé poukou njoukouli kéng, kli on ko̱ mi mosso kli ka tétéme a Ouone.

¹⁰ Samnafèn tèn poukounafèn mi tèn kala jing ba njaka mbéo, yine nili, dadaon an fèn on mi tane na on ya.

¹¹ Rina mbi jing joungna mbi mi ndé tèn kala an guèl toutoung mbi an bil lo̱ko̱ mbéo lé?

¹² Yine nili, di njouï mi ma baï léna léna oliveli lé, maléba di kiwila mi ma baï léna njouï lé? Mono mbi a tome mi tane ga ma baï hina rina mbi ya.

¹³ Guè an woro baï ko̱ mi jing cho̱kna da tounafèn nyèta lé? Dadaon an kème to̱ko̱ pina nèli ka mboro bèla séna nè jing bouna monè guè koukoula ka cho̱kna.

¹⁴ Da tokoré oui jing joungna fanahang tèn njakana an bil go̱ro̱ baï, oui tane jone mone baï ya, ka tane sa wo̱ko̱ kon toul babaï ya.

¹⁵ Cho̱kna on mi tane ti ba cho̱kna ko̱ gui ka nonkala ya, da ba a koukoula, an naïn‐mone tèn a zabolo.

¹⁶ Baï ko̱ an guèl on ko̱ fanahang tèn njakana mana, maï maï fèn tèn béké pinali bon ma ndé na.

¹⁷ Da cho̱kna on ko̱ mi gui ka nonkala ka titilikè mi na tang fofoto, da afal mi jing vona go̱ro̱ ka pan, ka ji bo̱ko̱ baï rèkè dèk, ka mba jing haïo, da jing bèla lénakè ka tane lang ya, da tane mong fèn ya.

¹⁸ Da mi mèn léna a guédék an bil go̱ro̱ iki, baï akli on ko̱ mi kaïn féré ikina go̱ro̱.