TAKARATA A JACQUES KO̱ DÉ 2 - Féké Testament 1947

¹ Yine nili, oui tane pèng tounassaon a Nanjou na Jésus‐Christ da Nanjou a jonafèn ka ba mboro dikna njoukou ta hana ya.

² Baï ko̱ tokoré njoukouna mbéo mi guè bil synagogue abaï jing woé ndo̱ko̱ l’or an ndo̱kè, ka bou bèla la, da foïna njoukou on ko̱ mi bou tang mbobodi la mi ndé guè kéng,

³ da ouime dik kè on ko̱ mi bou bèla la, ka sa hi nè: Mo kaou an bèla guèl aïn! da oui sa hi foïna njoukou on: Mo o soko! maléba: Mo kaou toul mbata ndana ka mbo̱ko̱ ni!

⁴ — ouime tane ko̱ njoukou ta hana an woro baï ya, da ouime tèn ba njou‐walabaïli jing kèrafèn bèlya an bil go̱ro̱ baï ya lé?

⁵ Oui la yine nili on ko̱ mème sé hang baï ta: Ouone mi tane ga sane kli on ko̱ ba foïna njoukouli an wora njou‐koukoulali baï an kli on mi nguèrè jing tounassaon ya lé, da kli ba njou‐yanapéléli an bilkaou on ko̱ kème bi gonjaka hi kli on ko̱ mi sé hang‐è lé?

⁶ Da abaï, ouime bi ba chonron nona njou‐foïna! Tane ti ba njou‐nguèrali mi ko̱ nding wonron jing oui ya, da ba kli mi ko̱ bourou oui sé guèl walabaï lé?

⁷ Tane ti ba kli mi ko̱ poukou bèla ling on ya ko̱ mi na bi toul baï lé?

⁸ Da tokoré ouime bou fal loukou guingna on bon mahana ko̱ Takarata a Ouone mi sa: Dadaon an mome sé hang a ba no mahana ka mono fèno, oui nding bèlta.

⁹ Da tokoré ouime dik njoukouna ta hana, oui nding ba békéfèn tou, baï ko̱ guingna mi sa kon toul baï mahana ka ba njou‐séla guingnali.

¹⁰ Baï njoukou on ko̱ mi bou fal guingna bon da kème bèn jing bina baïnjaka aïn mbéo, barabaï guingna bon mi na bi toulè.

¹¹ Baï kè on ko̱ mi sa: Mo nding maïn ya, kème ndé sa kéng ba: Mo i njoukou ya. Mono on, tokoré mome tane ga nding maïn ya, da mome i njoukou, mo tèn njou‐séla guingna.

¹² Oui sa baï ka nding fèn mabahana yé ba njoukouli on ko̱ yé mi wal baï kli mabong guingna séna ka laou,

¹³ baï ko̱ walabaï mi tane ti jing haïo ya an toula njoukou on ko̱ mi tane ga nding haïo ya. Haïo mi ko̱ jangndaï kon toula walabaï.

¹⁴ Yine nili njoukouna ma jing ba fèn, tokoré kème sa ba kème jing tounassaon da kème tane ga nding pinakèli ya lé? Yé tounassaon on mi ma baï kouna nè lé?

¹⁵ Tokoré yine goune wonron hana maléba njo̱‐waïn fèn hana mi tane ti jing la ya, ka nak jing laka mane name bon,

¹⁶ da njoukouna mbéo an woro baï mi sa hi kli: Oui sé ka go̱ro̱ iki, ka non hèlè da son ka mba! da ouime tane ga hi ba fènli on ko̱ mi mabong kli‐mone kli ya, on mi nding bèla fèn ba fèn lé?

¹⁷ Mabahana on jing tounassaon tokoré mi tane ga ti jing pinakèli ya, mi hou ka monè fènè.

¹⁸ Da yé njoukouna ma sa: Amo, mo jing tounassaon; da ami mè jing ba pinakèli. Mo to̱ko̱ tounassaon ni hi mi on ko̱ mi na tane pinakèli, da yé mè ma to̱ko̱ tounassaon ni hi mo ka mboro pina nili.

¹⁹ Mo la bilaou ko̱ Ouone ba mbéo bo̱l, mo nding bèlta; zabololi mi ndé la bilaou on kéng da mone kli mi to̱.

²⁰ Da mo ji baï touna o njoukou mi ko̱ cho̱k bo̱on, ko̱ tounassaon on ko̱ mi tane ti jing pinakèli ya mi na bo̱on lé?

²¹ Abraham tangko na mi tane gui guédék ka ba mboro pina ya lé, ko̱ kème hi goune nè Isaac mahana ka sacrifice an toul autel lé?

²² Mo ko̱ tounassaon mi ndé nding mabahana jing pina nèli, da ka mboro pinali mi ko̱ tounassaon mi gui guédék.

²³ Da an tènrèn none Takarata a Ouone mi tèn kala ka babaï ko̱ mi sa: Abraham mi la Ouone bi laou‐è, da Ouone mi kèn tounassaon nè mahana ko̱ kè ba guédék; da mi di nè ba bako̱la a Ouone.

²⁴ Mono on oui ko̱ njoukou mi gui guédék ka ba mboro pinali, da tane ti ka ba mboro tounassaon ka ho̱kè bo̱l ya.

²⁵ Da mabahana on Rahab, ba waïn maïn mi tane ga gui guédék ka mboro pinali ya lé, ko̱ kème pame njou‐mboro pinali, ka pi kli ki ka domboro aféké lé?

²⁶ Baï ko̱ mahana ka kli‐mone on ko̱ mi tane ti jing esprit ya mi hou tou, ndé mabahana on jing tounassaon ko̱ mi tane ti jing pinakèli ya, mi hou tou.